SAMDI 22

Koulè Wouj

SESIL KI SEN, Vyèj e Mati

(Memwa)

PREMYE LEKTI

«De pwofèt sa yo fè moun yo ki abite sou tè a pase mizè».

LEKTI LIV APOKALIPS APOT JAN KI SEN 11, 4-12

Vwa a di m’, mwen menm, Jan: «Men de temwen m’ yo; se de pye oliv ak de chandelye ki kanpe devan Granmèt tè a. Si yon moun vle nui yo, dife ap sòti nan bouch yo, l’ap devore ènmi yo; epi si yon moun vle fè yo ditò, se konsa li gen pou l’ mouri. Yo gen pouvwa pou fèmen syèl la, pou lapli pa tonbe pandan tan y’ap fè deklarasyon pwofèt la; yo gen pouvwa sou dlo yo pou fè yo vin tounen san, pou yo frape tè a ak move maladi, chak fwa yo vle.

Lè y’ap fin fè deklarasyon pwofèt yo, bèt la k’ap monte sot nan bafon anba a, l’ap fè lagè kont yo, l’ap ranpòte viktwa sou yo, l’ap touye yo. Kò yo ap ret sou plas gran vil la, sa a yo rele an parabòl Sodòm ak Ejip la, kote yo te kloure Granmèt yo a sou kwa a. Ras, pèp, lang ak nasyon ap wè kò yo pandan twa jou edmi yo p’ap kite yo depoze kò yo nan kavo. Moun yo ki abite sou tè a ap kontan sou yo, y’ap fete, youn ap voye kado bay lòt; paske de pwofèt sa yo te fè moun ki abite sou tè a pase mati.

Aprè twa jou edmi, espri lavi a sot nan Bondye, li antre nan yo. Yo kanpe sou pye yo; gran sezisman tonbe sou moun ki wè yo.

Yo tande gran vwa a sot nan syèl la, k’ap di yo: «Monte isit la». Yo monte nan syèl la nan nyaj la; ènmi yo wè yo.

Pawòl Granmèt la.

SÒM REPONS  143, 1. 2. 9-10 (r.: la)

R/ Konpliman pou Granmèt la, defans mwen an.

Konpliman pou Granmèt la, defans mwen an, li menm ki antrene men m’ pou batay, ak dwèt mwen pou yo fè lagè.R.

Mizerikòd mwen ak fòs mwen, kachèt mwen ak sovè mwen;

Pwoteksyon m’, nan li mwen espere, li menm ki pliye pèp mwen an anba m’.R.

Bondye, se yon kantik nouvo m’ap chante pou ou, nan enstriman dis kòd la m’ap jwe pou ou, ou menm ki bay wa yo delivrans, ki delivre David sèvitè ou anba epe mechan an.R.

LEVANJIL

«Bondye pa Bondye moun mouri, men Bondye moun ki vivan».

MEN BÒN NOUVÈL JEZIKRI A DAPRÈ SEN LIK 20, 27-40

Lè sa a:

Kèk nan sadiseyen yo pwoche, yo menm ki refize kwè rezireksyon, yo poze Jezi kesyon, yo di: «Mèt, Moyiz te ekri pou nou: «Si frè yon moun vin mouri, antan li te gen yon madanm li pa t’ gen pitit, se pou frè l’ la marye ak madanm li, pou l’ leve yon desandans pou frè li a». Konsa te gen sèt frè, premye a marye, li mouri san pitit; sa k’ suiv la pran l’, li menm tou li mouri san pitit; twazyèm nan pran l’, epi konsa tou pou tou le sèt: yo pa kite desandans, epi yo mouri.

Aprè yo tout, madanm nan mouri tou. Konsa, nan rezireksyon an, pou kilès nan yo madanm nan ap ye? paske yo tou le sèt te genyen l’ kòm madanm».

Jezi di yo: «Pitit syèk sa a, gason ak fi, y’ap marye; men sa yo ki merite lòt syèk la ak rezireksyon sot nan pami mò yo, yo pa marye, ni gason ni fi; sèke yo pa kapab mouri ankò: yo tankou anj yo epi yo se pitit Bondye, paske yo se pitit rezireksyon.

Kanta kesyon mò yo ki gen pou resisite a, Moyiz te montre sa bò raje ki t’ap boule a, jan l’ di: «Granmèt Bondye Abraam ak Bondye Izaak ak Bondye Jakòb». Bondye pa Bondye moun mouri yo, men Bondye moun vivan yo; sèke tout moun viv pou li».

Kèk nan skrib yo reponn, yo di l’: «Mèt, ou pale byen». Yo pa t’ oze poze l’ okenn kesyon ankò.

An nou fè lwanj ak konpliman pou pawòl Bondye a.

REFLEKSYON: Pawòl Bondye jodi a ap fè nou konnen ke moun mouri gen pou leve; moun ki desann nan fòs yo gen pou kontanple vizaj Bondye, men fwa sa a se ap pou toutan.

Anpil fwa nou menm tou nou konn ap prepare gwo kesyon pou nou poze Granmèt la, nou konn panse nou ka pran l’nan pyèj ; ebyen levanjil jodi a di nou, se pa vre.

Nou wè Jezi, devan direktè lalwa yo, li te gen repons menm sou moun mouri yo, sa vle di, nou pa bezwen ap kraze tèt nou mande Bondye yon pakèt bagay. Jezi te fèmen bouch mesye lalwa yo devan kesyon yo pandan l’ t’ap di yo ke Bondye vivan, kidonk se Bondye moun vivan li ye.

Anpil fwa nou konn mande èske Bondye li menm, li se Bondye nou; avèk eksperyans lavi a nou ka di, nou menm pafwa nou konn pa chwazi pitit li, lè nou vire do ba li. Chak fwa nou fè peche, chak fwa nou dezobeyi Bondye, nou pa viv nan renmen, se kanpe nou kanpe sou kontanplasyon vizaj li, bonte li, lanmou li pou nou.

Men Bondye Papa a ba nou chans sa, chans pou nou leve pami mò yo, chans pou nou renonse a peche a, pou nou viv pou Granmèt la.

Jodi a, nou gen lopòtinite pou reflechi sou lavi Sent Sesil, vyèj mati. Li toujou enteresan pou nou konnen istwa lavi mati yo. Nou konnen ke yon mati se yon moun ki bliye tèt li, ki sakrifye tout sa li te ka fè pou fè pwòp tèt li plezi, pou li kapab fè Bondye plezi antan li mete li nan sèvis Levanjil la ak sila yo ki pi fèb, lè li tounen vwa sila yo kip a gen vwa, lè li defann sila a yo ki san defans.

Se poutèt sa Legliz la pwopoze li kòm yon modèl sou chemen lafwa a e yo konsidere li kòm patwòn mizisyen yo.

LAPRIYÈ : Bondye Granmèt, Bondye lavi a n’ap mande w’ pou ba nou limyè lespri ou la pou klere nou sòti nan bafon peche nou yo ki mennen nou nan lanmò a, pou nou kapab kontanple bonte ou ak renmen ou pou nou epi fè nou gras tounen defansè moun ki san defans yo. Pa pouvwa Jezikri.

PWOPOZISYON : Avèk kouraj, denonse yon abi ou konnen yo fè yon moun ki san defans.

NB: SI YO VLE, YO VA LI:

PREMYE LEKTI: Levitik 19, 1-2. 17-18

SÒM REPONS: Sòm 14, 2-3ab. 3cd-4ab. 5 (r.: 1b)

LEVANJIL: Matye 7, 21-27