LENDI 28

Koulè Vèt

PREMYE LEKTI

"M’ap sove pèp mwen an sot nan peyi solèy leve ak solèy kouche".

LEKTI LIV PWOFÈT ZAKARI 8.1-8

Jou sa yo:

Pawòl Granmèt lame yo rive, li di: "Men pawòl Granmèt lame yo: «Mwen jalou pou Siyon ak yon gran jalouzi, mwen jalou pou li ak yon gran kòlè».

Men pawòl Granmèt lame yo: «M’ap tounen nan Siyon, m’ap abite nan mitan Jerizalèm, y’ap rele Jerizalèm vil laverite a, ak mòn Granmèt lame yo mòn ki sen an».

Men pawòl Granmèt lame yo: «Gran papa ak grann ap abite nan laplas Jerizalèm ankò, ak mesye ki gen baton nan men yo, poutèt anpil laj yo. Laplas lavil la ap plen ak ti moun ak jèn fi k’ap jwe nan laplas li yo».

Men pawòl Granmèt lame yo: «Si bagay sa a parèt difisil nan je rès pèp sa a nan jou sa yo, èske l’ap difisil nan je pa m’?», deklarasyon Granmèt lame yo.

Men pawòl Granmèt lame yo: «Men m’ap sove pèp mwen an sot nan peyi solèy leve ak nan peyi solèy kouche, m’ap mennen yo, y’ap abite nan mitan Jerizalèm, y’ap pèp mwen, m’ap Bondye yo nan laverite ak nan jistis».

Pawòl Granmèt la.

SÒM REPONS 101, 16-18. 19-21. 29 e 22-23 (r.: 17)

R/ Granmèt la bati Siyon, li parèt nan bèlte l’.

Nasyon yo ap respekte non ou, Granmèt, tout wa yo sou tè a ap respekte bèlte ou la;

Paske Granmèt la ap bati Siyon, l’ap parèt nan bèlte l’.

L’ap voye je sou lapriyè pòv la, li p’ap meprize lapriyè yo a.R.

Se pou yo ekri bagay sa yo pou lòt jenerasyon an, pèp y’ap kreye a, l’ap fè lwanj Granmèt la.

Paske li panche sot nan kay sakre l’ la anwo a, Granmèt la gade sou tè a, antan l’ nan syèl la; pou l’ koute rèl prizonye yo, pou l’ delivre pitit lanmò yo.R.

Pitit sèvitè ou yo ap abite, ras yo ap asire devan fas ou, pou yo anonse non Granmèt la nan Siyon, avèk lwanj li nan Jerizalèm; lè pèp yo ap rasanble pou yo fè yon sèl, avèk rèy yo, pou yo sèvi Granmèt la.R.

LEVANJIL

"Sila a ki pi piti nan pami nou tout la, se li menm ki pi gran".

MEN BÒN NOUVÈL JEZIKRI A DAPRÈ SEN LIK 9, 46-50

Lè sa a:

Disip yo t’ap fè diskisyon: kilès nan yo ki pi gran.

Jezi menm wè kalkil kè yo, li pran yon ti moun, li fè l’ kanpe bò kote l’, li di yo: «Tout moun ki resevwa ti pitit sa a o non m’, se mwen menm li resevwa; epi tout moun ki resevwa m’, li resevwa sila a ki voye m’ nan. Reyèlman vre, sila a ki pi piti nan pami nou tout la, se li menm ki pi gran».

Jan menm pran lapawòl, li di: "Mèt, nou te wè yon moun ki t’ap chase demon yo o non ou, nou te anpeche l’, paske li pa t’ap suiv avèk nou».

Jezi menm di l’: "Pa anpeche l’; paske moun ki pa kont nou, se pou nou li ye".

An nou fè lwanj ak konpliman pou pawòl Bondye a.

REFLEKSYON:

Jodi a, pandan Jezi sou wout la ap monte Jerizalèm, «disip yo t’ap fè diskisyon: kilès nan yo ki pi gran» (Lik 9,46). Chak jou, nan medya yo ak nan konvèsasyon nou, gen anpil kòmantè sou enpòtans moun: kòmantè sou lòt yo, kòmantè sou nou tou. Se yon lojik moun ki pwovoke yon dezi siksè, pou yo kapab rekonèt nou, apresye nou, remèsye nou; men tou se yon lojik ki montre kijan nou boulvèse pa anndan, kidonk nou pa gen lapè.

Repons Jezi bay refleksyon ak komantè disip yo, sa fè nou sonje fason ansyen pwofèt yo te konn aji. Premyèman jès yo, answit pawòl yo. Jezi «pran yon ti moun, li fè l’ kanpe bò kote l’» (Lik 9, 47). Epi li ba yo lansèyman « sila a ki pi piti nan pami nou tout la, se li menm ki pi gran»(Lik 9,48).

Nan tan n’ap viv la, gen anpil konkirans pou pouvwa ak richès materyèl. Paske nan lojik mond lan, yon moun ki gen anpil byen materyèl, anpil lajan, se yon moun ki reyisi. Poutan se pa vre. Nou konnen pafwa gen anpil moun ki gen lajan, oubyen ki okipe gwo pòs nan sosyete a, men yo kapab tonbe nan yon segond. Yo ka tonbe nan koripsyon ki fè yo pèdi vale yo ak diyite yo, konsa tou yo ka tonbe anba yon malady, tankou kansè. Epi kisa richès ak pouvwa sèvi aprè?

Frè ak sè m’ yo, an nou pran ekzanp sou Jezi, li menm ki gran, li fè li piti pou li kapab sèvi. An nou pa kite foli lajan ak pouvwa fè nou you ap dechire lòt, okontrè an nou itilize sa Bondye mete a dispozisyon nou pou nou kapab konstwi yon mond ki pi bèl, yon mond fratènèl, yon mond kote solèy lanmou an kapab klere, pou tout moun ka viv ak kè kontan ak kè poze.

LAPRIYÈ: Granmèt, nou bouke diskite pou gwo plas nan sosyete a, men sa pa itil nou anyen. Tanpri, aprann nou fè nou tou piti, pou nou youn ka sèvi lòt, antan n’ap pran ekzanp sou Jezi Gran Frè nou an. Amèn

PWOPOZISYON: Si mwen okipe yon gwo pòs jodi a, se pa paske mwen pi bon, se yon posiblite Bondye ban mwen pou mwen kapab sèvi moun ki pi piti pase mwen. M’ap chanje fason mwen gade lòt, m’ap trete yo pi byen.