LENDI 29

Koulè vyolèt

PREMYE MOSO LABIB

"Te gen anpil moun maladi lalèp nan Izrayèl, pèsonn nan yo pa t’ geri, sof Naaman Siryen an".

NAN DEZYÈM LIV WA YO

5, 1- 15a

Jou sa yo:

Naaman, chèf lame wa Siri a, se te yon mesye ki te gen gran plas kay mèt li, li te gen gwo grad: sèke se pa lentèmedyè l’ Granmèt la te bay Siri delivrans; se te yon mesye ki te gen pouvwa, ki te rich, men li te gen maladi lalèp.

Yon lè, gen bandi ki sòti Siri, yo mèt men sou yon ti fi nan peyi Izrayèl la, ti fi a vin nan sèvis madanm Naaman. Li di metrès li: "Pa pito mèt mwen t’al kot pwofèt ki Samari a! Sètènman li t’ap geri l’ sot nan lalèp li genyen an".

Konsa Naaman antre kay mèt li, li ba l’ nouvèl, li di: "Se tèl jan ak tèl manyè ti fi peyi Izrayèl la pale ak mwen".

Wa Siri a di l’: "Ale, m’ap voye lèt bay wa Izrayèl la".

Li pati, li pran dis pyès lajan avèk li, ak sis mil pyès lò ak dis bèl rad, li renmèt wa Izrayèl la lèt yo, men pawòl lèt yo: "Lè w’ap resevwa lèt sa a, w’a konnen mwen voye Naaman sèvitè m’ nan kote ou pou w’ geri l’ sot nan maladi lalèp li a.

Lè wa Izrayèl la li lèt yo, li chire rad li, li di: "Èske se Bondye mwen ye, pou m’ kapab touye, pou m’ kapab bay lavi, ki fè sila a voye kote m’ nan, pou m’ geri yon moun sot nan lalèp li a: konsidere sa pou nou wè si se pa okazyon l’ap chèche pou l’ fè kont avèk mwen".

Lè Elize, moun Bondye a tande wa a te chire rad li, li voye kote l’, li di: "Poukisa ou chire rad ou a? Vin kote m’ w’a konnen gen yon pwofèt nan Izrayèl".

Konsa Naaman rive ak chwal li, ak kawòs li, li kanpe devan pòt kay Elize. Elize voye yon mesaje kote l’ pou l’ di: "Al lave kò ou sèt fwa nan Jouden an, chè w’ap rekòmanse jwenn lasante, w’ap geri".

Naaman fache, li kòmanse rekile pou l’al fè wout li, li di: "Mwen te panse li t’ap sòti vin jwenn mwen, li t’ap kanpe pou l’ rele non Granmèt Bondye l’ la, li t’ap touche kote m’ gen lalèp la ak men l’, li t’ap geri m’. Èske gran larivyè Damas yo Anama ak Farfar pa pi bon pase tout dlo Izrayèl yo, pou m’ t’a lave kò m’ nan yo, pou m’ ta geri"?

Kòm li t’ap vire pou l’al fè wout li byen fache, sèvitè l’ yo pwoche kote l’, yo di l’: "Papa, si se yon gran bagay pwofèt la te di w’, sètènman ou t’ap fè l’; ou gen plis rezon pou ou fè sa l’ di w’ koulye a: "Lave kò ou, w’ap geri".

Li desann, li lave kò l’ nan Jouden an sèt fwa daprè pawòl moun Bondye a, chè l’ vin an sante tankou chè yon timoun piti, li geri.

Li tounen kot moun Bondye a ansanm ak tout gwoup li a, li rive, li kanpe devan l’, li di: "Reyèlman vre, mwen konnen pa gen dòt Bondye sou tout tè a, sof nan Izrayèl. Mwen lapriyè w’ pou w’ resevwa benediksyon nan men sèvitè w’ la".

Pawòl Granmèt la.

SÒM 41, 2. 3; 42, 3. 4

R/ Nanm mwen swaf kot Bondye vivan an; kilè m’ap parèt devan fas Bondye.

Tankou yon belye anvi al nan sous dlo yo, konsa nanm mwen anvi al kote ou, Bondye.R.

Nanm mwen swaf Bondye, Bondye vivan an; kilè m’a pral parèt devan fas Bondye? R.

Voye limyè w’ la ak verite w’ la; pou yo kondui m’, pou yo mennen m’ sou mòn ou a ki sen an, ak nan joupa w’ la.R.

M’ap antre kot lotèl Bondye a, kot Bondye kè kontan mwen an. M’ap fè lwanj ou sou gita, Bondye m’.R.

LEVANJIL

"Tankou Eli ak Elize, se pa pou Jwif yo sèlman yo te voye Jezi".

MEN BÒN NOUVÈL JEZIKRI A DAPRÈ LIK KI SEN 4, 24- 30

Lè Jezi rive Nazarèt, li di pèp la nan kay reyinyon an;

"An verite mwen di nou, okenn pwofèt pa jwenn moun lakay li resevwa l’ byen.

Se laverite mwen di nou, te gen anpil vèv sou tan Eli nan Izrayèl, lè syèl la te fèmen pandan twazan ak si mwa a, lè te gen gwo grangou sou tout tè a; men se pa kot youn nan yo yo te voye Eli, sof kot vèv la nan Sarepta Sidon an. Te gen anpil moun maladi lalèp nan Izrayèl sou tan pwofèt Elize; youn nan yo pa t’ geri, sof Naaman Siryen an".

Tout moun nan kay reyinyon an plen ak kòlè, lè yo tande sa. Yo leve, yo chase l’ sot nan lavil la; yo kondui l’ sou tèt mòn nan, kote lavil yo te bati a, pou yo jete l’ anba. Li menm menm, li pase nan mitan yo, 1’al fè wout li.

An nou fè lwanj ak konpliman pou pawòl Bondye a.

REFLEKSYON:

Sen Lik fè nou wè Jezi tankou yon moun ki pa jwenn bon akèy, yon moun yo rejte.  Kalite diskou Jezi te lakòz gen yon gwo divizyon nan sosyete a. Sa ki fè yo te vle touye l’.

Frè m’ ak sè m’ yo, kòman nou konprann ke moun ki sòti nan pwòp zòn Jezi pa vle wè l’ konsa? Rezon an senp. Jezi te pote yon nouvèl pou moun sa yo ki te deranje yo. Li t’ap pale yon pawòl ke yo pa t’ janm tande. Li t’ap preche renmen ak rekonsilyason. Tèks jodi a montre nou ke se pa tout moun ki dispoze pou yo akeyi limyè a. Toujou gen moun ki toujou vle rete nan fènwa, paske limyè a mete a klè tout vye bagay y’ap fè.

Nou menm, nou dwe kite limyè Levanjil jodi a klere nou. Pafwa, nou ka vle bay temwayaj sou renmen ak mizerikòd Bondye, men nou jwenn anpil enkonpreyansyon ak mepri. Men, sa pa dwe janm dekouraje nou paske, menm Jezi fè eksperyans la tou. Pwòp fanmi nou kapab tounen ènmi nou lè nou vle idantifye nou ak Kris la. Jezi te deja konstate sa, lè li te di: «Yon pwofèt pa janm twò byen akeyi nan zòn li» (Lik 4, 24).

LAPRIYÈ: Bondye Papa, tanpri ban m’ fòs ak kouraj pou m’ pa janm dekouraje nan misyon pwofetik ou ban mwen an. Pa pouvwa Jezikri. Amèn.

PWOPOZISYON: Pa kritike frè w’ la ak sè w’ la k’ap fè sa ki bon. Pa pale l’ mal, ankouraje l’ nan sa l’ap fè a.