Koulè Blan
NESANS GRANMÈT LA
(Gran Fèt)
NB: POU MÈS GRANMATEN
AN Y’AP LI:
PREMYE
LEKTI: LIV PWOFÈT
IZAYI 62,
11-12
SÒM REPONS
96, 1 e 6.11-12
DEZYÈM
LEKTI: LÈT APOT
PÒL KI
SEN, POU TIT 3, 4-7
LEVANJIL:
LIK 2, 15-20
POU MÈS
LAJOUNEN AN:
PREMYE
LEKTI
“Tout
limit tè a ap wè sove Bondye sove nou an”
NAN LIV PWOFÈT IZAYI 52, 7-10
Ala bèl yo
bèl sou mòn yo, pye moun k’ap anonse bòn nouvèl la, k’ap preche lapè a, k’ap
anonse byen an, k’ap preche sove Bondye sove a, k’ap di Siyon: «Bondye w’ la
wa»! Men vwa santinèl ou yo: yo leve vwa yo, y’ap fè lwanj ansanm, paske y’ap
wè je nan je lè Granmèt la ap tounen Siyon.
Fè kè nou kontan, fè lwanj ansanm,
dezè Jerizalèm yo, paske Granmèt la konsole pèp li a, li rachte Jerizalèm.
Granmèt la drese bra l’ ki sen an devan je tout nasyon yo, tout limit tè a ap
wè sove Bondye sove nou an.
Pawòl Granmèt
la.
SÒM REPONS
97, 1. 2-3ab. 3cd-4. 5-6
R/ Tout limit tè a ap wè sove Bondye
sove nou an.
Chante yon
kantik nouvo pou Granmèt la, poutèt mèvèy li fè.
Sove li
sove a sot nan men dwat li, nan bra li ki sen an.R.
Granmèt
la fè konnen sove li sove a, devan fas nasyon yo li devwale jistis li a.
Li sonje
mizerikòd li ak verite l’ pou kay Izrayèl la.R.
Tout limit
tè a ap wè sove Bondye sove nou an.
Bat bravo
pou Bondye, tout tè a, eklate, danse, chante.R.
Chante
pou Granmèt la sou gita, sou gita ak son mizik;
sou
twonpèt ki dous ak son kòn, fè konpliman devan fas Granmèt la ki wa a.R.
DEZYÈM
LEKTI
“Bondye
pale avèk nou nan Pitit la”
NAN LÈT EBRE YO 1, 1-6
Lontan,
anpil fwa ak anpil manyè, Bondye te pale ak zansèt yo nan pwofèt yo ; nan dènye
jou sa yo, li pale avèk nou nan Pitit la. Se li menm li enstale kòm eritye tout
bagay, se pa lentèmedyè l’ li te fè tan yo. Li menm ki klète glwa li ak pòtre
sa l’ ye a, li pote tout bagay ak pawòl pouvwa l’ la, li pwòpte peche yo, li
chita adwat glwa a nan anwo nèt la ; li gen pi gran plas pase Mesaje yo, non li
eritye a pi gran anpil pase pa yo a.
Kilès
nan zanj yo Bondye te di : «Se Pitit mwen ou ye, mwen menm jodi a mwen anfante
ou » ? Epi tou : «M’ap yon papa pou li, li menm l’ap yon pitit pou mwen ». Epi,
lè l’ap fè Premye Pitit la antre sou fas tè a li di: «Se pou tout zanj Bondye
yo adore l’ ».
Pawòl
Granmèt la.
LEVANJIL
“Pawòl
la vin tounen moun, li abite nan nou”
MEN BÒN NOUVÈL JEZIKRI A DAPRÈ JAN
KI SEN 1, 1-18
Nan
kòmansman se te Pawòl la, Pawòl la te kot Bondye, se Bondye Pawòl la te ye. Li
te kot Bondye nan kòmansman. Tout bagay te fèt pa lentèmedyè l’, san li menm
anyen pa t’ fèt nan sa k’ te fèt.
Nan li
se te lavi, lavi a se te limyè lèzòm; limyè a klere nan fènwa, fènwa yo pa
vlope l’.
Gen yon
moun Bondye voye, yo te rele l’ Jan. Li te vini nan temwayaj, pou l’ sèvi limyè
a temwen, pou tout moun te kapab kwè pa lentèmedyè l’. Li pa t’ limyè li menm,
men se pou l’ te kapab sèvi limyè a temwen.
Te gen
vrè limyè a, sa k’ klere tout moun k’ap vin sou tè sa a. Li te sou tè a, se pa
lentèmedyè l’ tè a fèt, men tè a pa t’ rekonèt li ; li vin lakay li, moun lakay
li pa t’ resevwa l’.
Men tout
moun ki te resevwa l’, li ba yo pouvwa pou yo vin tounen pitit Bondye, yo menm
ki kwè o non l’, ki pa fèt sot nan san yo, ni nan volonte chè a, ni nan volonte
gason, men ki fèt sot nan Bondye.
Pawòl la
vin tounen moun, li abite nan nou; nou wè glwa li, glwa tankou pa Sèl Pitit la
ki sot nan Papa a, plen favè ak verite.
Jan sèvi
l’ temwen, li rele byen fò, li di: “Sa a, se osijè l’ mwen te di: “Sa a k’ap
vini apre m’ nan, li pran plas devan m’, paske li te la anvan mwen”; nan sa l’
ye anplen an, nou tout nou resevwa, epi gras pou gras. Sèke lalwa a yo te bay
li pa lentèmedyè Moyiz, gras la ak verite a menm se pa lentèmedyè Jezikri li
rive. Bondye, pèsòn pa janm wè l’ ; sèl Pitit la, ki nan vant Papa a, li menm
li montre l’.
An nou
fè lwanj ak konpliman pou pawòl Bondye a.
REFLEKSYON:
Mwen swete tout zanmi Sous Lavi yo bòn Fèt Nwèl!
Nwèl se fèt lajwa, fèt gete. Nwèl se Jezi ki vin kase dènye chenn. Pandan fèt
sa a, Bondye vle montre nou, li pa yon Bondye k’ap viv lwen nou, li pa yon
Bondye ki rete nan lespas. Fèt sa a, se Bondye ki vin fè youn avèk nou, Li pran
fòm moun pou li kapab montre nou kijan li pataje menm reyalite ak nou e kijan
li kapab konprann nou nan tout sitiyasyon lavi nou. Jou 25 desanm nan raple nou
Emanyèl ki fèt. Emanyèl ki vle di: Bondye-avèk-nou. Menm jan lè yon
etranje vin lakay nou, nou fè pwòpte pou nou akeyi li, ebyen mwen panse pandan
Tan Lavan an, nou te fè tout sa ki nesesè tankou ale legliz, konfese, netwaye
tout sa ki dwe netwaye nan lavi nou pou kapab akeyi Sovè nou an nan gran jou sa
a.
Youn nan
gwo mistè nou jwenn nan Levajil la, se mistè Enkanasyon an: Bondye ki fè li
tounen moun pou li kapab sove nou. Kijan li kapab sove nou? Sa a se
kesyon prensipal chak kretyen ta dwe poze tèt li. Nou chak grenn moun ki sou tè
a kapab sove avèk yon sèl kondisyon. Se sèlman lè li akeyi Bondye, kidonk, n’ap
kapab wè sa nan fason l’ap aplike Pawòl Bondye a nan lavi li, nan fason l’ap
sèvi frè ak sè li, nan lanmou l’ap genyen pou yo. Sa rèd anpil lè w’ wè yon
moun vin lakay ou epi ou pa resevwa l’. Sa te
toujou konn rive; anpil kote Jezi pase yo pa t’ resevwa li, e jis jounen jodi
a, anpil moun pa resevwa Jezi lakay yo. Lè nou gade mond nou an jodi a, nou
mande nou èske anpil nan moun sa yo gen Jezi nan lavi yo. Tout vye konpòtman
fin anvayi nou.
Anpil
fwa nou pale de Jezi, nou pale de Labib, ata goumen nou goumen sou non li
pafwa. Men lè nou le nou reflechi, lè nou konsidere aksyon nou yo, sa fè nou
tris, tèlman nou manke koerans. Nou menm ki di nou se kretyen, nou menm ki di
n’ap suiv Jezi, se nou ki ta dwe bay premye ekzanp, men elas! Mwen rete sèten
si nou tout ki di nou se kretyen nou te viv daprè kòmandman Gran Frè nou Jezi
te ba nou yo, nou t’ap genyen yon lòt mond, tout bagay t’ap chanje tout bon.
Nan gran jou sa a li enpòtan pou nou aksepte Jezi ak tout nou menm. Resevwa li,
se viv jan li te konn viv, viv jan li mande nou pou nou viv, kwè nan li,
idantifye nou ak li.
Levanjil
la prezante nou Jezi tankou yon limyè. Ebyen zanmi Sous Lavi yo, ann travay pou
menm jan ak Jezi lavi nou kapab tounen yon limyè, yon modèl pou lòt moun kote
n’ap viv yo, pou nou kapab travay pou nou chanje mond nou an.
LAPRIYÈ:
Bondye, ou menm ki fè kè nou kontan chak ane antan n’ap tann redanmsyon nou an,
tanpri, Sèl Pitit ou a, li menm nou resevwa ak kè kontan an kòm Redanmtè a, fè
nou merite wè l’ tou avèk asirans lè l’ap vini kòm Jij la. Pa pouvwa Jezikri.
PWOPOZISYON: M’ap
kontinye fè sa m’ kapab pou fason m’ap viv kapab reprezante yon modèl, yon
limyè pou moun m’ap rankontre sou wout mwen.
No hay comentarios:
Publicar un comentario