MÈKREDI 20 MAS 2013

PREMYE MOSO LABIB

"Li voye Mesaje l’ la, li delivre sèvitè l’ yo".

NAN LIV PWOFÈT DANYÈL 3, 14-20. 91.92. 95

Jou sa yo:

Wa Nabikodonozò di: "Èske se vre, Sidrak, Mizak avèk Abdenago, nou pa sèvi dye m’ yo, nou pa adore pòtre mwen fè avèk lò a? Koulye a, si nou pare, nenpòt kilè n’ap tande sonnen twonpèt, flit, gita, mandolin, bandjo, akòdeyon avèk tout kalite mizik, se pou nou ajenou, pou nou adore pòtre a mwen te fè a. Si nou pa adore l’, menm lè a m’ap lage nou nan boukan dife a k’ap chofe byen fò a, epi kilès Bondye k’ap delivre nou sot nan men m"?

Sidrak, Mizak avèk Abdenago reponn, yo di wa Nabikodonozò: "nou pa bezwen reponn ou sou kesyon sa a; men Bondye nou an, li menm n’ap sèvi a, li kapab delivre nou sot nan boukan dife cho a ak nan men ou, mon wa, l’ap delivre nou. Si l’ pa vle, ou met konn sa, mon wa, nou p’ap sèvi dye w’ yo, epi pòtre ou fè ak lò a, nou p’ap adore l’.

Lè sa a, Nabikodonozò vin plen ak raj, aparans figi l’ vin chanje alega Sidrak, Mizak avèk Abdenago; li pase lòd pou yo chofe boukan an sèt fwa plis pase jan yo konn abitye chofe l’; li pase lòd pou mesye ki gen fòs nan lame l’ la, yo mare pye Sidrak, mizak avèk Abdenago, pou yo jete yo nan boukan dife k’ap boule a.

Aprè sa, wa Nabikodonozò vin sezi, li leve byen vit, li di minis li yo: "Èske nou pa t’ lage twa mesye yo nan mitan dife a avèk pye yo mare"? Yo reponn wa a, yo di:"Se vre, mon wa". Li pran lapawòl, li di: "men mwen wè kat mesye ki lib, k’ap pwomenen nan mitan dife a, yo pa gen okenn dega nan yo, aparans katriyèm nan sanble ak yon pitit Bondye".

Nabikodonozò leve li di: "Konpliman pou Bondye yo a, Bondye Sidrak, Mizak avèk Abdenago, li menm ki voye mesaje l’ la, li delivre sèvitè l’ yo, ki te kwè nan li, yo dezobeyi pawòl wa a, yo renmèt kò yo, pou yo pa sèvi, pou yo pa adore dòt dye, sof Bondye yo a".

Pawòl Granmèt la.

R/Mèsi Bondye, mèsi.

SÒM Dan 3, 52. 53. 54. 55. 56

Konpliman pou ou, Granmèt, Bondye zansèt nou yo, konpliman pou non bèlte w’ la ki sin an.

R/ Li mérite lwanj, li anlè nèt pou tout tan.

Konpliman pou ou nan kay sakre bèlte w’ la ki sen an.

R/Ou merite lwanj anlè nèt ak bèlte anlè nèt pou tout tan.

Konpliman pou ou sou fotèy rèy ou a.

R/ Ou merite lwanj, anlè nèt, ou anlè nèt pou tout tan.

Konpliman pou ou, ou menm ki sonde bafon yo, ou menm ki chita anlè cheriben yo.

R/ Ou merite lwanj, sou anlè nèt pou tout tan.

Konpliman pou ou nan platfòm syèl la,

R/ Ou merite lwanj, ak bèlte pou tout tan.

LEVANJIL

"Si Pitit la delivre nou, n’ap lib tout bon vre".

MEN BÒN NOUVÈL JEZIKRI A DAPRÈ JAN KI SEN  8, 31-42

Lè sa a:

Jezi t’ap di Jwif yo ki te kwè nan li yo: "Si nou rete nan pawòl mwen an, n’ap disip mwen tout bon vre, n’ap konnen verite a, verite a ap delivre nou".

Yo reponn li: "Se ras Abraam nou ye, nou pa janm esklav pèsòn; kòman ou fè di: “N’a vin lib”?

Jezi reponn yo: "An verite, an verite mwen di nou, tout moun ki fè peche, li esklav peche a. Men, esklav la pa ret nan kay la tout tan; se pitit la ki rete tout tan. Konsa si nou menm, Pitit la delivre nou, n’ap lib tout bon vre. Mwen konnen se pitit Abraam nou ye; men n’ap chèche touye m’, paske pawòl mwen pa pran nan nou. Mwen menm se sa m’ wè kay Papa m’, se sa mwen pale, men nou menm se sa nou wè kay papa nou, se li menm n’ap fè".

Yo pran lapawòl: yo di l: “papa nou se Abraam”.

Jezi di yo: “Si nou te pitit Abraam, nou ta fè travay Abraam. Koulye a menm, n’ap chèche touye m’, mwen menm yon moun k’ap pale nou laverite mwen fin tande kot Bondye a; bagay sa a, Abraam pa t’ fè l’. Nou menm n’ap fè travay papa nou".

Yo di l’: “nou menm se pa nan move relasyon nou fèt: se yon sèl papa nou genyen, se Bondye”. Jezi di yo: “Si Bondye te papa nou, nou ta renmen m’ sètènman; mwen menm se nan Bondye mwen sòti pou m’ vini. Mwen pa vini ak pwòp fòs mwen, men se li menm, ki voye m”.

An nou fè Lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON : Frè m’ak sè m’ yo, Legliz la ap envite n' reflechi sou 2 ti moso Labib ki trè rich : premye lekti a ak Levanjil la. Men anvan nou rantre pi fon nan ti refleksyon nou pou jodi a, li ta enteresan pou n' pran yon ti moman pou n' desann nan fon kè nou, nou medite, pou n' kite pawòl nou sot wè nan lekti yo gide klere lespri nou pou yo kapab abite kè n', yon fason pou ti meditasyon n'ap fè a kapab ede nou pote yon chanjman capital nan lavi nou. nou. San sa, ti demach lekti yo ap envite n' fè jodi a p’ap jwenn sans li. Nan premye lekti a pwofèt Danyèl ap envite n' kontanple yon ti sèn lafwa avèk twa sèvitè Bondye ke li site nan tèks li a. Mesye yo te prefere boule nan dife olye pou yo renonse ak Bondye yo a, pi devan tou n'ap wè ke yo rive temwanye grandè Bondye a avèk temwayaj lavi yo. Deside akeyi lanmò se pa janm bagay ki fasil men mesye yo te mete tout konfyans yo nan Bondye yo a, e li te  ba yo pouvwa pou yo te kapab mache nan dife a, sa ki ta pral fè wa a rekonèt grandè Bondye sila a. Sa ki enteresan pou n’ gade nan ti sèn sa a, se kòz ki fè yo mete mesye yo nan dife a; yo chwazi boule yo paske pa vle adore dye wa a t’ap sèvi a ki te yon dye zidòl, men mesye yo te rete fè m’ sou kwayans pa yo.  Sa se yon bon ekzanp lafwa. M’ pa kwè paske m’ te wè mirak fèt sou yon moun, oubyen paske afè m’ bon kounye a. Ou wè danje k’ap genyen si afè m’ ta vin pa bon ankò! Lafwa mande plis ke sa, se esansyèl la. Nou wè sa nan lekti a, mesye yo prefere akeyi chatiman an olye pou yo pèdi lafwa yo. Ti lekti sa a nou li a ap envite n' gade epi analize lavi n' yon lòt fwa ankò, chèche gade nan ki mezi nou prè pou nou ta fè menm jès sa a, pou n' di Bondye mwen pa deside pou m' pa ba ou do. Menm wi m’ te di w’ la, m' vle kenbe l' jis nan bout. An n' chèche anrasinen wi sa a pi plis toujou nan pawòl Granmèt la, menm jan li envite n' fè sa nan Levanjil la, an n' nou kite pawòl sa mennen lavi nou; konsa n’a tounen pòtre Bondye tout bon vre.

LAPRIYÈ: Bondye O, se ou ki atire n' vin jwenn ou nan lanmou san limit ou gen pou nou a, tanpri fè menm lanmou sa a abite kè n' tout tan pou nou vin tounen temwen kè kontan w’ lan nèt ale. Amèn

PWOPOZISYON : An n' chache fè tout ti efò n' kapab pou n' wè si n'a fè kè moun k'ap viv kote nou yo kontan pou jounen an.