MADI 23

Koulè Blan
PREMYE MOSO LABIB
“Yo t’ap pale ak Grèk yo tou, yo t’ap anonse yo Granmèt Jezi”.

NAN TRAVAY APOT YO 11, 19-26

Jou sa yo:
Sa yo ki te gaye akoz tray la, ki te rive sou Etyèn nan, yo travèse jous Fenesi, Chip ak Antyòch, san yo pa deklare pawòl la bay pèsòn, sof Juif yo sèlman. Kèkzen nan yo te moun Chip ak Sirèn, konsa lè yo rive Antyòch, yo te pale ak Grèk yo tou, yo te anonse yo Granmèt Jezi. Men Granmèt la te avèk yo, anpil kantite moun ki kwè vin tounen kot Granmèt la. Pawòl la rive nan zòrèy Legliz la ki Jerizalèm nan, osijè bagay sa yo, yo voye Banabe jous Antyòch. Lè l’ rive, li wè gras Bondye a, li kontan; li ankouraje tout moun pou yo rete nan bon dispozisyon kè yo nan Granmèt la; paske se te yon mesye ki bon, ki te plen ak Lespri Sen ak lafwa. Anpil foul vin jwenn Granmèt la. Banabe pati al Tas, pou l’ chèche Sòl; lè l’ jwenn li, li mennen l’ Antyòch. Yo rete pandan tout ane a la nan Legliz la, yo t’ap bay anpil foul ansèyman, atèl pwen pou premye fwa yo rele disip Antyòch yo kretyen”.
Pawòl Granmèt la.
R/Mèsi Bondye, mèsi.
SÒM REPONS 86, 1-3. 4-5. 6-7
R/ Fè lwanj Granmèt la, tout nasyon yo.
Oubyen: Alelouya.
Fondasyon l’ yo sou mòn yo ki sen yo; Granmèt la renmen pòt Siyon yo pase tout tant Jakòb yo. Y’ap di bèl bagay sou ou, vil Bondye a.R.
M’ap sonje Raab ak Babilòn pami sa yo ki konnen m’ yo; men Filisti ak Ti avèk Etyopi, sa yo fèt isit la. Osijè Siyon, y’ap di: “Sa a ak sa a fèt ladan l’, Sila a ki anwo nèt la rann li fèm”.R.
Granmèt la ekri nan liv pèp yo: “Sa yo fèt isit la”. Y’ap chante tankou moun k’ap kondui gwoup dans: “Tout sous mwen yo nan ou”.R.
LEVANJIL
“Mwen menm ak Papa a nou fè yon sèl”.
MEN BÒN NOUVÈL JEZIKRI A DAPRÈ JAN KI SEN 10, 22-30
Se te fèt konsekrasyon Tanp la Jerizalèm, se te tan frèt. Jezi t’ap mache nan Tanp la, nan pòtay Salomon an. Juif yo antoure l’, yo t’ap di l’: “jouskilè w’ap kenbe souf nou kout? Si ou se Kris la, di nou sa klè”. Jezi reponn yo: “Mwen pale ak nou, nou pa kwè. Travay yo mwen fè o non Papa m’ nan, se yo menm ki sèvi m’ temwen. Men nou pa kwè, paske nou pa fè pati bann mouton m’ yo. Mouton m’ yo tande vwa m’, mwen konnen yo, yo suiv mwen, mwen ba yo lavi tout tan an, yo p’ap peri tout tan, pèsòn p’ap wete yo sot nan men m’. Papa m’ daprè sa l’ ban mwen, li pi gran pase tout moun, pèsòn pa kapab wete anyen sot nan men Papa m. Mwen menm ak Papa nou fè yon sèl.
An nou fè Lwanj ak konpliman pou pawòl Bondye a.
R/ Lwanj pou ou, Granmèt.

REFLEKSYON: Frè m’, sè m’, konpatriyòt mwen, tout zanmi Bondye, se ak anpil respè mwen salye w’. Mwen se Frantz Cémélus, pitit pèp ayisyen an k’ap fè yon eksperyans nan Gwatemala. Se yon lòt gran plezi ankò pou m’ di nou kenbe fèm paske Jezi ki te mouri a, li leve byen vivan sòti nan mitan mò yo. Se menm envitasyon sa Granmèt la fè nou nan moman sa a, pou nou sòti nan twou fènwa nou ye yo, nan komèt enjistis ak komèt krim ak zak malonèt kont lòt frè n’ ak sè n’ yo. Se pou nou kale je nou, konnen lanmò pa janm gen dènye mo a nan lavi yon kretyen.

Tankou Sen Jòj te viv nan mitan nou, li te mouri e li te bay ekzanp kòm bon sèvitè Jezi.  Kòm bon disip, li mouri nan temwaye renmen Bondye a, li mouri pou Levanjil la, e li te gen lespwa l’ap leve nan gran jou jijman an devan gwo tribinal selès la kote ki pa gen enjistis ak malvèsasyon.
Ebyen, zanmi Bondye, fòk mwen di ou ekzanp sa ke disip yo kite pou nou an, se yon fason pou nou pa poze tèt nou kesyon de ki manigans pou n’ anonse bòn nouvèl Jezikri a, kit ou pale fransè, kit ou pale espanyòl oubyen anglè, se mesaj la ki enpòtan se pa ni koulè, ni ras, oubyen plas ou okipe nan sosyete a. Granmèt la vle pou tout moun nèt san distenksyon rive sove, ou te mèt gwo zouzoun oubyen malerèz tèt kwòt, nou tout dwe bay nouvèl la, nou tout dwe sèvi Levanjil temwen nan pawòl nou ak nan fason n’ap viv.
Nan premye mòso Labib la, nou tande e nou konprann travay apot yo; yo envite nou tout ale fè misyon, bay tout lòt yo enstriksyon sou lavi Jezi, nan tout kwen nan peyi a, nan kèlkeswa nasyon sou latè. Pa pè, pa krent. Nou tout se disip Jezi ki leve byen vivan.
Se priyè sa menm nou repete nan sòm 86 la: tout nasyon dwe fè lwanj pou Granmèt la. Li tan pou n’ mete tèt ansanm ak lòt yo ki di yo se se pwotestan kont Legliz Katolik, men k’ap preche bòn nouvèl la. Nou tout se kretyen, nou tout kwè nan yon sèl Bondye ki wa e ki gen tout pouvwa.
Nan levanjil la nou tande kijan Jezi parèt pou yon denyè fwa nan sinagòg la jodi a, nou ta ka di tanp la oubyen Legliz la, kote lidè jwif yo se sèl kòk chante. Tout chèf jwif yo te vle konnen si Jezi se vrè Mesi a, si se vrè Sovè a tout bon vre. Se te gran prewokipasyon yo sa, se poutèt sa, tout sa Jezi di, li te rann yo fouyapòt e yo te sispèk. Yo te bezwen siyal pou yo kwè ak prèv, paske pou yo tout sa Jezi te anonse e te fè pa t’ sifi pou jistifye prezans Bondye Papa a nan li. Se sa menm otorite jwif yo te pretann.
Parabòl Bon Pastè a, se sèl disip yo ki te konprann li, paske Jezi se Bon Pastè a li ye tout bon vre. Menm jan nou renmen di nan ti pwovèb kreyòl nou: “chen ki konen w’ se li ki souke ke l’ ba ou”. Alò frè m’ ak sè m’ yo, se pawòl sa yo ki te vrèman boulvèse sante gran save jwif sa yo.
Jezi se vrè konsakre Bondye Papa a li ye, paske li te viv nan tèt kole ak Papa a; se pou sa Papa a, ak Pitit la fè yon sèl. Pou m’ mete yon fen nan ti kozman sa zanmi Bondye yo, fòk mwen di n’ ke linyon sa se yon ekzanp ke Papa a ak Pitit la kite pou tout kretyen vivan sou latè; nou youn pa dwe trayi lòt. Se pou n’ viv nan lanmou epi kè kontan tout tan.

Se pou sa m’ap envite n’ chante ansam ak mwen: “Fòk nou tout ansanm fè youn, se lòd Jezi te pase; nou pa kab trayi san nou, san nou se san Jezikri. Li menm ki rasanble nou. Fòk nou tout ansanm fè youn”.

LAPRIYÈ: Granmèt, fè nou solidè youn ak lòt pou nou kapab tounen yon twoupo ki fè ou plezi. Pa kite nou abandone pak la pou nou tounen mouton ki egare. Pwoteje nou anba menas lènmi an, ki toujou ap wode pou li kapab manje nou. Amèn.

PWOPOZISYON: Kòman mwen kapab rive viv nan kominyon ak Bondye tout bon vre si mwen pa viv nan kominyon ak sila a ki bò kote mwen, k’ap tann mwen pou mwen konprann li, pou mwen ede li?