MÈKREDI 10 AVRIL 2013

Koulè Blan

PREMYE MOSO LABIB

“Men mesye yo nou te mete nan prizon an, yo nan Tanp la, y’ap bay pèp la ansèyman”.

NAN TRAVAY APOT YO 5, 17-26

Jou sa yo:

Gran prèt la leve, ansanm ak tout moun ki te avèk li yo, (se gwoup Sadiseyen yo), yo te plen ak raj; yo met men sou Apot yo, yo mete yo nan prizon piblik la. Zanj Granmèt la louvri pòt prizon an nannuit, li fè yo sòti, li di: “Ale, kanpe, pale nan Tanp la ak pèp la tout pawòl lavi sa a”. Lè yo tande sa, yo antre byen bonè nan tanp la, yo t’ap bay ansèyman. Gran prèt la rive, ni sa yo ki te avèk li yo, yo fè yon reyinyon, ni tout ansyen pitit Izrayèl yo; yo voye nan prizon an pou yo kondui yo vini. Lè sèvitè yo rive, yo louvri pòt la, yo pa jwenn yo, yo tounen, yo pote nouvèl, yo di: “Nou jwenn pòt prizon an byen fèmen avèk tout kalite prekosyon, gad yo te kanpe devan pòt yo; men lè nou louvri, nou pa jwenn pèsòn andan l”. Lè yo tande pawòl sa yo, majistra Tanp la, ak gran prèt yo, yo t’ap mande antre yo ki sa sa vle di. Gen yon moun ki rive li anonse yo: “Men mesye yo nou te mete nan prizon an, yo kanpe nan Tanp la, y’ap bay pèp la ansèyman”. Lè sa a atò majistra a avèk sèvitè yo pati, yo mennen yo san maltrete yo; sèke yo te pè pèp la, pou yo pa t’ kalonnen yo ak kout wòch.

Pawòl Granmèt la

R/Mèsi Bondye, mèsi.

SÒM REPONS 33, 2-3. 4-5. 6-7. 8-9

R/ Yon pòv rele, Granmèt la koute l’.

Oubyen: Alelouya.

M’ap fè konpliman pou Granmèt la tout tan, tout tan lwanj li nan bouch mwen.

Nan Granmèt la nanm mwen ap jwenn glwa l’, se pou pòv yo tande, pou yo kontan.R.

Fè lwanj Granmèt la avèk mwen, se pou nou leve non l’ anlè ansanm, mwen chèche Granmèt la, li reponn mwen, anba tout sa k’ fè m’ pè, li delivre m’.R.

Gade nan direksyon l’, n’ap klere, fas nou p’ap wont. Pòv sa a rele, Granmèt la koute l’, anba tout tray li, li sove l’.R.

Zanj Granmèt la ap veye alantou moun ki krenn li yo, l’ap delivre yo. Goute, n’a wè jan Granmèt la bon; ala kontantman pou moun ki espere nan li.R.

LEVANJIL

“Bondye voye Pitit la, pou tè a sove pa lantremiz li”.

MEN BÒN NOUVÈL JEZIKRI A DAPRÈ JAN KI SEN 3, 16-21

Lè sa a, Jezi di Nikodèm:

“Bondye tèlman renmen tè a, li bay Pitit li a, sèl Pitit li a, pou tout moun ki kwè nan li pa peri, men pou l’ gen lavi tout tan an. Sèke Bondye pa t’ voye Pitit li a sou tè a pou l’ jije tè a, men pou tè a te kapab sove pa lantremiz li. Moun ki kwè nan li, yo p’ap jije l’; moun ki pa kwè a menm, li deja jije, paske li pa kwè o non sèl Pitit Bondye a. Men jijman an, limyè a vin sou tè a, men lèzòm te pi renmen fènwa yo pase limyè a; sèke travay yo te move. Reyèlman tout moun k’ap aji mal, li rayi limyè a, li pa vin nan limyè a, pou yo pa repwoche travay li yo. Men moun ki fè verite a, li vin nan limyè, pou yo kapab wè travay li klè, se nan Bondye yo fèt”.

An nou fè Lwanj ak konpliman pou pawòl Bondye a

R/ Lwanj pou ou, Granmèt.

REFLEKSYON: Pawòl Bondye nou genyen pou jodi a montre aklè gwo pouvwa Granmèt la. Yon gwo pouvwa ki manifeste pou lèzòm lanmou li genyen pou yo. Puisans sa a manifeste nan levanjil la, kote li di li voye Jezi pou vin sove nou epi nan premye lèkti a li mete apot yo deyò nan prizon san li pa ouvri pòt prizon yo. Nan levanjil la, li klè kon dlo kòk rezon ki te fè Jezi vini sou tè a. Li te vini pou li sove nou. Li vle sove nou san ke li pa jije nou. Men sa mande sèlman pou nou kwè nan li.  Lafwa sa a mande pou nou viv nan laverite. Depi yon moun nan laverite tout sa l’ap fè li pa gen pwoblèm pou lòt moun konnen li. Men moun ki nan fènwa pa renmen moun konn zafè li, yo toujou genyen yon bagay y’ap sere. Nou ka sonje yon chante « Gwoup Mizik Mizik » te fè nan lane 1999 ki te genyen kòm tit « Ban m’ fènwa mwen ». Yo te eksplike pou di se nan fènwa nou ka fè magouy. Moun ki vle sove se moun ki batay chak jou pou li viv nan limyè ak laverite.

Nan premye lèkti a nou wè Bondye ki mete apot yo deyò nan prizon san okenn pòt pa louvri. Chèf prèt ak otorite ki te mete apot yo nan prizon, paske levanjil yo t’ap anonse a t’ap deranje yo, yo te sezi anpil. Wi yo tout te sezi paske yo panse yo te gen lapè lè yo te mete mesye yo nan prizon. Sa k’ te pi vèksan pou yo, sèke mesye yo te nan tanp la jan lanj la te di yo: “Ale kanpe pale nan tanp la ak pèp la tout pawòl lavi sa a”. Mezanmi ak Bondye pa gen pòt ki pa ka louvri. Nou wè tout sekirite ki pa gen fay se nan Bondye li ye.

LAPRIYÈ : Fè m’ gras Granmèt pou m’ toujou chache viv nan laverite, paske ou se Laverite e mwen vle chak jou sanble ak ou. Amèn

PWOPOZISYON : Pandan jounen sa a, m’ap fè efò pou m’ viv nan laverite ak pwòp tèt mwen pou m’ ka santi mwen se vrèman pitit Bondye.