MÈKREDI 17

Koulè Blan

PREMYE MOSO LABIB

“Yo t’ap travèsè antan y’ap anonse pawòl Bondye a”

NAN TRAVAY APOT YO 8,1-8

Jou sa yo vin gen yon gran pèsekisyon kont Legliz la ki te Jerizalèm nan; tout moun se gaye nan rejyon Jide ak Samari a sof Apot yo. Gen moun ki krenn Bondye ki okipe Etyèn, yo fè gran dèy sou li. Sòl menm t’ap ravaje Legliz la; li t’ap antre nan kay yo, li t’ap mete ni gason ni fi deyò, li t’ap mennen yo nan prizon. Konsa sa yo ki te gaye yo, yo t’ap travèse ap pote bòn nouvèl pawòl Bondye a. Filip desann nan yon vil Samari, li t’ap bay moun yo ansèyman sou Jezikri. Foul moun yo te fikse lide yo sou sa Filip t’ap di, yo tout t’ap koute, yo te wè siy yo li te fè yo. Sèke anpil nan sa yo ki te gen espri papwòp yo, yo te sòti, antan y’ap rele byen fò; anpil moun ki pa t’ kapab fè mouvman, ki te enfim, yo te vin geri. Te vin gen gran kè kontan nan vil sa a.

Pawòl Granmèt la.

R/Mèsi Bondye, mèsi.

SÒM REPONS 65, l-3a. 4-5. 6-7a

R/ Bat bravo pou Bondye, tout tè a.

Oubyen: Alelouya.

Bat bravo pou Bondye, tout tè a, chante glwa non l’, fè lwanj li. Di Bondye: “A la respè travay ou yo merite”.R.

Tout tè a ap adore ou, l’ap chante pou ou, l’ap chante pou non ou”. Vini, n’a wè travay Bondye yo, li merite respè nan aksyon li fè pou pitit moun yo.R.

Li fè lanmè a vin tounen tè sèk, y’ap pase rivyè a apye; n’ap kontan nan li kote sa a. Li menm k’ap kòmande nan pouvwa l’ pou tout tan.R.

LEVANJIL

“Sa a, se volonte Papa a, pou tout moun ki wè Pitit la, li gen lavi tout tan an”.

MEN BÒN NOUVÈL JEZIKRI A DAPRÈ JAN KI SEN 6, 35 40

Lè sa a: Jezi di foul yo:

“Mwen menm mwen se pen lavi a; moun ki vin jwenn mwen p’ap grangou, moun ki kwè nan mwen p’ap janm swaf. Men mwen te di nou, nou wè m’, epi nou pa kwè. Tout sa Papa a ban mwen, l’ap vin jwenn mwen; moun ki vin jwenn mwen, mwen p’ap jete l’ deyò; paske mwen pa desann sot nan syèl la pou m’ fè volonte pa m’, men volonte sila a ki voye m’ nan. Men volonte sila a ki voye m’ nan, Papa a, sèke tout sa l’ ban mwen, pou m’ pa pèdi anyen nan yo, men pou m’ fè l’ resisite nan dènye jou a. Sa a se volonte Papa m’ nan ki voye m’ nan, pou tout moun ki wè Pitit la, epi ki kwè nan li, jwenn lavi tout tan an; mwen menm m’ap fè l’ resisite nan dènye jou a”.

An nou fè Lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Yè nou te dekouvri nan refleksyon lekti yo, kijan Etyèn te genyen yon lafwa enkwayab. Aprè lanmò li, nan Jerizalèm yon gran pèsekisyon te vin devlope kont Legliz la, yo montre ke gen moun ki te genyen yon ti kras respè pou Bondye, sa te pouse yo kwè kanmenm nan Etyèn. Anpil nan moun ki te dispèse yo te kontinye pote bòn nouvèl pawòl Bondye a. Malgre tout pèsekisyon yo te jwenn, sa pa t’ anpeche yo kontinye ap anonse Bondye vivan an; okontrè, sa te pèmèt yo kòmanse pwoklame pawòl la ak plis fòs pou yo te kapab lakòz anpil moun pran wout konvèsyon nan tout mond lan. Menm gen kote yo pa t’ resevwa yo, men yo pa t’ pèdi enèji, yo pa t’ pèdi fòs ak lespwa, yo pa t’gade dèyè, pou yo pa t’ gade lòt kote. Jezi ap rele nou, e si nou chèche li, li p’ap kache pou nou pa wè li paske se li menm k’ap chèche nou an premye; si nou kwè nan li kòm pitit Bondye, n’ap gen lavi ki p’ap janm fini an. Jezi kontinye di nou ke si nou vin jwenn li ak tout kè nou, ak tout nanm nou, l’ap nouri nou ak pen lavi a, nou p’ap grangou ni swaf. E moun ki vin jwenn li deja pote laviktwa sou tout fòs lanmò. Se bon pou nou kwè nan Jezi e kontanple li, paske li se limyè mond lan, pou nou pa rete nan fènwa inyorans ak peche. E pou nou konnen doktrin li sòti nan Bondye. Se yon doktrin ki pa ekzije nou lòt bagay ke renmen ak mizerikòd.  Pawòl Jezi, se pawòl Bondye Papa a, e li mande pou nou kwè nan li, rete nan li e fè li tounen pwòp byen nou; sa vle di sèvi li avèk fidelite, konsa n’ap tounen apot li tout bon vre, nou kapab fè patizan pou li pou tout moun rive kwè nan li e genyen lavi tout bon vre a. Kwè se konfye nan Jezi, pou nou kapab jwenn kè kontan li pwomèt la. Lafwa nou pèmèt nou resevwa Jezikri, konnen li, e atravè li menm konnen Papa a; Jezi menm di nou sa, pou nou tout ki kwè nan li rive jwenn lavi ki p’ap janm fini an.

LAPRIYÈ: Mèsi Granmèt paske ou rele mwen pou fè wout ansanm ak ou. Mèsi paske ou ba nou asirans w’ap avèk nou toutan.

PWOPOZISYON: Ann mande Bondye pou li retire vwal ki nan je nou yo, ki anpeche nou wè mèvèy li nan lavi nou; epi louvri zorèy nou pou nou kapab koute li k’ap pale ak nou nan plizyè fason, kèk fwa menm nan silans.