MADI 14

Koulè  Vèt ou Blan

PREMYE MOSO LABIB

« Granmèt la sonje Án, li anfante Samyèl ».

NAN PREMYE LIV SAMYÈL 1, 9-20

Jou sa yo :

Án leve, apre l’ fin manje, li fin bwè nan Silo, prèt Eli te chita sou ti chèz la devan pòtay tanp Granmèt la. Kòm Án te gen lapenn nan nanm li, li priye kot Granmèt la, antan l’ap kriye anpil, li fè ve, li di:

« Granmèt lame yo, si ou te kapab voye je ou wè lapenn sèvant ou a, pou ou sonje m’, pou ou pa bliye sèvant ou a, pou ou bay sèvant ou a yon ti gason, mwen ta renmèt li bay Granmèt la pou tout jou lavi l’, razwa pa t’ap monte sou tèt li ».

Rive, pandan l’ap priye anpil devan Granmèt la, Eli t’ap obsève bouch li. Án t’ap pale nan kè l’, men se po bouch li sèlman ki t’ap bat, yo pa t’ tande vwa l’ menm prèske. Konsa Eli te konprann li te sou, li di l’ : « Jouskilè w’ap ret sou? Diven sa a ki fè ou sou a, fè l’ pase pandan yon ti moman ».

Án reponn : « Pa ditou, mèt mwen ; sèke se yon madanm ki pa gen chans menm mwen ye : diven ni tout bagay ki kapab fè moun vin sou, mwen pa bwè sa, men se nanm mwen m’ap vide devan Granmèt la. Pa konsidere sèvant ou a tankou youn nan pitit fi Belyal yo, se paske doulè m’ nan anpil, epi ni lapenn mwen an tou ki fè m’ap pale jouskoulye a ».

Lè sa a Eli di l’ : « Ale ak lapè, se pou Bondye Izrayèl la ba ou demann ou mande l’ la ».

Li di : « Si sèvant ou a te kapab jwenn gras nan je ou ». Madanm nan al fè wout li, li manje, figi l’ pa chanje ankò.

Yo leve granmaten, yo adore devan Granmèt la, yo tounen yo rive lakay yo Ramata. Èlkana vin gen relasyon avèk Án madanm li, Granmèt la sonje l’. Rive aprè kantite jou yo, Án vin ansent, li anfante yon ti gason, li rele non l’ Samyèl, poutèt se Granmèt la li te mande l’.

Pawòl Granmèt la.

R/ Mèsi Bondye, mèsi.         

SÒM REPONS : 1 Sam 2, 1. 4-5. 6-7.

R/ Kè m’ap danse nan Granmèt la, sovè m’ nan.

Kè m’ap danse nan Granmèt la, kòn mwen leve nan Bondye m’ nan : bouch mwen louvri byen laj sou ènmi m’ yo, paske mwen kontan nan sove ou sove m’ nan.R

Zam vanyan yo te konn tire flèch la, li depase, se fèb yo ki mare ren yo ak fòs. Sa k’ te plen anvan yo, y’ap lwe tèt yo pou pen, sa k’ te grangou yo vin gen vant plen, joustan sa k’ pa t’ kapab fè pitit la vin anfante anpil pitit, epi sa k’ te gen anpil pitit la, li vin febli.R.

Granmèt la fè moun mouri, li fè moun viv, li kondui anba tè yo, li fè remonte; Granmèt la fè moun vin pòv, li fè moun vin rich, li rabese, li leve anlè.R.

Li leve malere a sot nan pousyè a, li leve pòv la sot nan fatra a, pou l’ fè l’ chita avèk chèf yo, pou l’ ba l’ twòn glwa a.R.

LEVANJIL

« Li t’ap ba yo ansèyman tankou moun ki gen otorite »

MEN BÒN NOUVÈL JEZIKRI A DAPRÈ MAK KI SEN 1, 21-28

Nan vil Kafanawòm nan, jou saba Jezi antre nan sinagòg la, li t’ap ba yo ansèyman. Yo te sezi osijè ansèyman l’ nan ; sèke li t’ap ba yo ansèyman tankou moun ki gen pouvwa, se pa tankou pwofesè yo.

Nan sinagòg yo a, te gen yon mesye ki te gen espri papwòp, li rele byen fò, li di : « Ki sa k’ gen ant nou menm ak ou menm, Jezi moun Nazarèt la? Èske ou vini pou ou pèdi nou ? Mwen konnen kilès ou ye : Sen Bondye a ».

Jezi menase l’, li di: “Pè bouch ou, sòti nan mesye a”. “Espri papwòp la souke l’, li rele byen fò, li pati sot nan li.

Tout moun te sezi, atèl pwen yo t’ap chèche ansanm antre yo, yo t’ap di: “Ki kalite bagay sa a? Ki kalite ansèyman nouvo sa a? Sèke ak pouvwa li kòmande menm sou espri papwòp yo, yo obeyi li”. Repitasyon l’ gaye menm lè a nan tout rejyon Galile a.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Zanmi Bondye yo, youn nan bagay ki kapab atire atansyon nou nan finisman Levanjil la, se lefèt ke nou wè gen yon atitid ki diferan ak sa nou abitye tande nan lantouray nou. Nan anpil kote yon moun pa vrèman popilè paske li fè bagay ki byen sinon se paske li fè yon erè. Lè yon moun fè yon bagay ki byen, donk li toujou konsidere tankou yon bagay nòmal. Kidonk pou nou, li pa gen twòp enpòtans pase sa, anpil fwa nou pa janm pran abitid felisite moun nan, di li: “zanmi m’ sa w’ fè a li bon wi, li edifye m’ wi; kontinye kenbe konsa.” Sa ap ede m’ fè plis efò pou m’ avanse nan lavi m’. Non! Nou pa jwenn sa fasil. Men okontrè lè frè a oubyen sè a fè yon erè, lè sa a li se yon atis, e sa pa bezwen yon gwo megafòn non, nan yon fraksyon segond tout moun sou katye a gen tan okouran de sa ki pase a. Se atitid sa nou adopte anpil fwa. Ebyen Levanjil jodi a montre nou byen klè ki tip nouvèl nou dwe pataje ak lòt yo. Se nouvèl ki bay lavi, nouvèl ki edifye; men se pa nouvèl k’ap detwi epi ki anpeche moun nan pwogrese nan sosyete a.

Nan Levanjil la nou kapab pran pou ekzanp atitid Jezi a, li retire move lespri a nan nonm nan pou li kapab libere li, pou li kapab ba li yon lavi tou nèf. Sa nèg move lespri a t’ap di a, se bon pawòl, men li t’ap di li ak yon lespri egoyis, li pa t’ genyen tout bon nanm li sou li, li t’ap di li ak yon lespri pou detwi. Ebyen lè Jezi chase move lespri a sou li, li ba li yon lavi tou nèf li pèmèt li reprann konfyans. Se konfyans sa nou bezwen ede lòt yo reprann pou yo kapab kontinye gaye lavi a toupatou sou tè a. Jezi te aji avèk otorite sou move lespri a, nou menm tou nou bezwen aji ak otorite. Nou deja konnen règ la deja, si nou genyen yon lafwa ki menm gwosè ak yon ti grenn moutad ebyen tout sa n’a di nan non Granmèt la, y’a reyalize vre. Donk nou bezwen kore nou chak jou pi plis sou Bondye pou li kapab ogmante lafwa nou, pou chak sa nou rive di kapab genyen efè sou tout fòs mal yo.

LAPRIYÈ: Bondye Granmèt, ou menm ki te chase move lespri a nan mesye a, tanpri n’ap mande w’ pou w’ chase tout fòs mal ki devye nou sou bon wout la, pou fwi travay nou kapab parèt aklè epi pote chanjman nan zòn kote n’ap viv yo. Amèn.

PWOPOZISYON: M’ap fè efò pou m’ ankouraje pwochen m’ yo nan tout sa yo fè ki byen pou m’ ede yo grandi plis toujou.