VANDREDI 6-12-2019

Koulè Vyolèt

PREMYE LEKTI

“Jou sa a, je avèg yo ap wè”

NAN LIV PWOFÈT IZAYI 29, 17-24

Men pawòl Granmèt Bondye :

«Nan kèk tan, nan yon ti moman, èske mwen p’ap fè Liban an tounen yon jaden, jaden an menm, l’ap vin tankou yon gran rak bwa? Jou sa a, moun soud yo ap tande pawòl liv la, je avèg yo ap sòti nan fènwa ak nan vwal la pou yo wè. Moun ki tou dou yo, y’ap jwenn plis kè kontan nan Granmèt la, pòv yo ap danse nan sen Izrayèl la; paske moun ki t’ap fè pwofitè a, li tonbe; moun ki t’ap pase Bondye nan rizib la, li fini; e y’ap peri tout moun sa yo ki t’ap pase tan yo ap fè sa k’ mal la, moun ki te konn ap fè lòt yo fè peche nan pawòl, ki te konn ap met jijman an anba pye yo nan tribinal la, ki te konn ap fè moun kòrèk la tonbe akòz manti yo.

Se pousa, men pawòl Granmèt la pou kay Jakòb la, li menm ki delivre Abraam: «Jakòb p’ap wont ankò, figi l’ p’ap wont ankò; men lè l’ap wè pitit li yo, travay men m’ fè, y’ap fè wè jan non m’ sen, y’ap fè wè jan sen Jakòb la li sen tout bon vre, y’ap preche Bondye Izrayèl la; moun ki fèb nan lespri, y’ap gen konpreyansyon, rebèl yo ap aprann lalwa a.»

Pawòl Granmèt la.

SÒM REPONS 26, 1.4.13-14

R/ Granmèt la se limyè m’ak delivrans mwen

Granmèt la se limyè m’ak delivrans mwen, ki moun pou m’ pè ?

Granmèt la se pwoteksyon lavi m’, devan ki moun pou m’ tranble ? R.

Yon sèl bagay mwen mande Granmèt la, se sa m’ap chèche :

Abite lakay Granmèt la tout tan lavi m’,

pou m’ wè dousè Granmèt la, pou m’ vizite kay sakre l’ la.R.

Mwen kwè m’ap wè byen Granmèt la nan tè vivan yo.

Tann Granmèt la, pran kouraj, asire kè ou, apiye sou Granmèt la.R.

LEVANJIL

“Antan yo kwè nan Jezi, de avèg yo geri”

MEN BÒN NOUVÈL JEZIKRI A DAPRÈ MATYE KI SEN 9, 27-31

Lè sa a :

Pandan Jezi ap travèse, de avèg ap suiv li antan y’ap rele byen fò, y’ap di: «Pitye pou nou, pitit David ». Lè l’ rive nan kay la, avèg yo pwoche kote l’. Jezi di yo : «Èske nou kwè mwen kapab fè sa pou nou?»

Yo di l’ : «Wi, Granmèt.» Lè sa a atò li touche je yo, li di : «Daprè lafwa nou, se pou sa fèt pou nou ». Je yo louvri vre. Jezi fè yo menas, li di : «Fè atansyon pou pèsòn pa konnen». Yo menm lè yo sòti, yo gaye nouvèl la nan tout peyi sa a.

An nou fè lwanj ak konpliman pou pawòl Bondye a.

REFLEKSYON :Nou nan tan LAVAN ki se yon tan fò, sa vle di yon tan trè enpòtan nan lavi Legliz la; se tan rekonsilyasyon, tan pou nou kase tèt tounen vin jwenn Bondye ki gen tout pouvwa, tan pou nou prepare nou pou n’ tann Sovè a k’ap vini an, tan pou lapriyè pi plis e fè penitans pou peche n’ yo, tan pou pataje sa Bondye ba nou avèk sila yo ki plis nan nesesite ; kidonk se yon tan pou nou refèt, tan renouvèlman, pou nou kapab fèt yon lòt fwa ankò nan Jezikri.

Si nou kwè tout bon vre nan sila a k’ap vin avèk tout pouvwa li a, ebyen tout sa ki nan fènwa ap vin wè klè. Kòm nou sot li sa nan Levanjil la, 2 avèg t’ap swiv Jezi, yo t’ap rele byen fò : «Jezi, pitit David la, gen pitye pou nou ! Jezi menm nan kè sansib li, li te wè kijan yo te gen lafwa, lè l’ rive nan kay kote l’ t’a prale a, nan tout senplisite, 2 avèg yo pwoche kote l’, Jezi te akeyi yo, li pa t’ meprize yo; li mande yo si yo kwè li kapab geri yo.Yo reponn, yo di : «Wi Granmèt !», paske se yon bagay yo chèche anlè, yo jwenn li atè. Ala yon gwo mirak !

Dimansyon lafwa a trè enpòtan nan mirak sa a. Jezi touche yo e li di : «daprè lafwa nou, se pou nou wè»; menm lè a je yo vin wè klè. Jezi te entèdi yo pou yo pa t’ di pèsonn sa, men yo te santi li pa t’ posib pou yo rete bèbè devan kokenn chenn mirak sa : yo t’ap pwoklame sa Jezi fè pou yo. Se te fason pa yo pou yo te anonse Bòn nouvèl la, paske yo te gen chans wè Mesi a avèk 2 je yo; avan mirak la, yo te tande Mesi a ap pale, men yo pa t’ kapab wè li. Wi Granmèt la sèvi ak pouvwa li nan sila yo ki pi pòv yo, sa ki pi meprize, sa ki pako wè limyè a, sila yo ki poko tande Bòn Nouvèl la. Tankou nou sot tande l’ nan premyè lekti a, Granmèt la ba nou yon avètisman, anvan lontan n’ap wè yon seri de siy nou pa t’ konn abitwe wè ; lè sa a se va kè kontan pou sila yo ki pòv jodi a, moun ki soud yo pral tande pawòl la, je avèg yo va louvri, tout sa ki t’ap viv nan fènwa va wè limyè.

Frè ak sè m’ yo, nou menm k’ap pase mizè ak tray jodi a, nou menm y’ap pèsekite, nou tout ki inosan k’ap peye pou koupab, piga nou dekouraje paske Bondye nou an ap vini, l’ap vini pou delivre nou, pou ba nou lavi. Ann pwofite Tan Lavan sa pou nou kase tèt tounen vin jwenn Bondye, e n’a wè bèl mèvèy.

LAPRIYÈ:Granmèt, tanpri louvri je m’ pou m’ kab wè limyè a ; konsa m’ap dekouvri mèvèy ou yo atravè Pitit ou a k’ap vin retire tout moun nan fènwa ak lonbraj lanmò a. Pa sèlman je kò a pou ou louvri, men tanpri ouvri je lespri a tou, pou m’ kapab konprann e fè sa ou vle.

PWOPOZISYON: Koute Jezi, Pitit David la, k’ap di w’: «wi mwen vle geri w’, men fòk ou kwè».