DIMANCH 26

Koulè Vèt

TRINITE KI SEN ANPIL LA

(Gran Fèt)

PREMYE MOSO LABIB

“Anvan tè a te fèt, Sajès la te deja anfante”.

NAN LIV PWOVÈB YO 8, 22-31

Men Pawòl Sajès Bondye a:

Granmèt la genyen m’ pou li nan kòmansman chemen l’ yo, anvan nenpòt bagay te fèt depi nan kòmansman.

Depi tout tan mwen konsakre, depi lontan, anvan tè a te fèt.

Pa t’ ko gen bafon anba yo, mwen menm mwen te deja nan vant; sous dlo yo pa t’ ko eklate, mòn yo pa t’ ko gen konsistans ak gwo mas yo a, anvan ti mòn yo mwen te anfante; Granmèt la pa t’ ko menm fè tè a, ni larivyè yo, ni kat kwen fas tè a.

Lè l’ t’ap prepare syèl yo, mwen te la; lè l’ t’ap antoure bafon anba yo pou fikse limit yo; lè l’ t’ap drese syèl yo solid anlè a, lè l’ t’ap regle sous dlo yo; lè l’ t’ap trase wonn limit pou lanmè a, lè l’ t’ap poze fondasyon tè a byen solid, mwen te avèk li, mwen t’ap poze tout bagay ansanm avèk li, mwen te jwenn kontantman m’ chak jou, antan m’ap jwe devan l’ tout tan, antan m’ap jwe sou fas tè yo, plezi m’ se te rete avèk pitit moun yo. ”

Pawòl Granmèt la.

R/Mèsi Bondye, mèsi.

SÒM REPONS 8,4-5. 6-7. 8-9

R/ Granmèt, Granmèt nou, ala gran non ou gran sou tout tè a.

Lè m’ wè syèl ou yo, travay dwèt ou yo, lalin ak zetwal yo fikse,

sa moun nan ye, pou ou sonje l’ ? oubyen pitit moun nan, pou ou vizite l’ ? R.

Ou fè l’ vin pi ba yon ti kras anba Mesaje yo, ak bèlte ak konsiderasyon ou kouwonnen l’; ou enstale l’ anlè travay men w’ yo. tout bagay, ou mete yo anba pye l’.R.

Ni mouton, ni bèf, yo tout, menm bèt nan rak bwa yo, zwazo syèl yo ak pwason lanmè yo, tout sa k’ap mache nan santye lanmè yo.R.

DEZYÈM MOSO LABIB

“Gras a renmen an ki vide nan nou pa lantremiz Lespri Sen an, nou rive kot Bondye pa pouvwa Jezikri”.

NAN LÈT APOT PÒL KI SEN POU WOMEN YO 5, 1-5

Frè m’ yo:

Kòm nou vin kòrèk gras a lafwa a, se pou nou gen lapè kap fè nou pwoche kot Bondye pa lantremiz Granmèt nou Jezikri; se pa lantremiz li tou, gras a lafwa a, nou kapab pwoche nan favè sa a, kote nou kanpe fèm e ki pèmèt nou leve tèt nou ak kè kontan, antan nap espere bèlte pitit Bondye yo. Se pa sa sèlman, men nou leve tèt nou tou nan tray yo, antan nou konnen tray la donnen pasyans, pasyans la menm donnen landirans, landirans la menm donnen espwa; espwa a menm pa fè nou wont, paske renmen Bondye a vide nan kè nou pa pouvwa Lespri Sen an yo ba nou an.

Pawòl Granmèt la.

R/Mèsi Bondye, mèsi.

LEVANJIL

“Tout sa Papa a genyen, se pou mwen yo ye ; Lespri a ap pran nan sa m’ genyen an, l’ap anonse nou”.

MEN BÒN NOUVÈL JEZIKRI A DAPRÈ JAN KI SEN 16, 12-15

Lè sa a: Jezi di disip li yo:

“Mwen gen anpil bagay ankò pou m’ di nou ; men nou pa kapab pote yo koulye a; men lè Lespri laverite sa a ap vini, l’ap aprann nou tout laverite a; sèke se pa ak pwòp fòs li l’ap pale, men tout sa l’ tande, l’ap deklare l’, epi sa k’ap vini yo, l’ap anonse nou yo. Li menm l’ap fè bèlte m’ parèt, paske se nan men m’ l’ap resevwa sa l’ap anonse nou. Tout sa Papa a genyen se pou mwen ; se pousa mwen di: “Se nan men m’ l’ap resevwa sa l’ap anonse nou”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jodi a n’ap selebre fèt Sent Trinite. Se youn nan pi gwo mistè ki pi difisil pou nou konprann nan doktrin Kris la ak ti kapasite pou rezone Bondye ba nou an. Kòman sa fè posib pou Bondye youn e twa an menm tan? (Se kòm si ou ta di: 1+1+1=1). Respons kesyon sa a se pa yon solisyon lojik, men se yon repons lafwa.  Repons la se: Renmen an. Tankou kretyen, nou kwè ak tout fòs nou ke renmen Bondye a te manifeste yon fason ki fè ke se menm renmen sa a, nan karaktè enfini li, ki eksprime relasyon Pitit la kote Papa a ak Pitit la atravè Lespri Sen, youn tèlman renmen lòt, yo tounen yon sèl nan menm renmen sa a.

Bondye te montre lèzòm kalite renmen sa a depi nan kòmansman tan yo, paske nou deja wè nan kreyasyon an chak pèsonaj sa yo te aji ansanm e yo chak te genyen yon wòl, yon fonksyon espesifik nan  plan oubyen nan pwojè liberasyon an: Bondye Papa a kreye nou; lè tan yo te rive bout Pitit la tounen moun e li delivre nou; aprè Granmèt la te monte nan syèl (Asansyon), yo voye Lespri Sen an pou nou, pou sanktifye nou epi pouse nou aji kòm moun ki te kreye epi ki libere. Men sa a, se pa yon aksyon nou kapab separe, puiske se menm renmen ki te kreye nou an ki deplwaye, yon renmen ki pa kite nou tankou moun ki abandone men ki vini pou leve nou, epi fè nou viv nan diyite pitit Bondye. Redanmsyon Kris la, nou kapab konprann li sèlman nan dimansyon plan renmen Bondye ki kreye nou an e nou kapab rele li “kreyasyon tou nèf la”. Nan menm sans sa a tou, nou kapab konprann evènman Lapannkòt la an fonksyon liberasyon Jezikri pote pou tout moun nan. E nou kapab rele travay Lespri sen an “rekreyasyon (renouvèlman) kreyasyon an”.

Sa a se glwa Bondye Trinite a, don li fè nou nan renmen Pitit la, nan yon lanmou ki kreye nou e ki fè nou di: “Granmèt, Granmèt nou, ala gran non ou gran sou tout tè a!”. 

LAPRIYÈ: Bondye ki Twa ak Youn, lave zye nou pou nou kapab wè mèvèy travay ou nan kreyasyon an, e ba nou yon kè ki gran pou nou youn kapab renmen lòt tankou Ou menm ak Pitit la youn renmen lòt nan Lespri Sena n.

PWOPOZISYON: Li epi medite lapriyè sa a: Viv Papa a, ak Pitit la ak Lespri Sen an, tankou nan kòmansman, ni jodi a ni toulejou e pou tout tan gen tan. Amèn.