DIMANCH 14

Koulè Vèt

KENZYÈM SEMÈN ÒDINÈ ANE-C

PREMYE MOSO LABIB

“Pawòl la bò kote ou pou ou reyalize li”.

NAN LIV DETEWONÒM 30, 10-14

Moyiz pale ak pèp la, li di:

“Se pou ou koute vwa Granmèt Bondye ou, pou ou obsève lòd li yo ak desizyon l’ yo, ki ekri nan lalwa sa a, pou ou tounen kot Granmèt Bondye w’ la ak tout kè ou, ak tout nanm ou. Kòmandman sa a mwen kòmande w’ jodi a, li pa ni twò wo ni twò lwen pou ou, li pa chita nan syèl la, pou ou ta di: “Kilès nan nou ki ta kapab monte nan syèl la, pou l’ pote l’ ba nou, pou nou koute l’, pou nou reyalize li?” Li pa jous lòt bò lanmè, pou ou blije di: “Kilès nan nou ki ta kapab travèse lanmè a pou l’ pote l’ ba nou, pou nou kapab koute l’, pou nou fè sa l’ kòmande a?” Men se bò kote w’ pawòl la ye, tou pre ou, nan bouch ou ak nan kè ou, pou ou fè sa l’ di a”.

Pawòl Granmèt la.

R/Mèsi Bondye, mèsi.

SÒM REPONS 68, 14 e 17. 30-31. 36ab e 37

R/ Pòv yo, chèche Bondye, kè nou ap viv.

Mwen menm lapriyè m’ ap monte kote ou, Granmèt; nan tan favè a, Bondye. Nan pakèt kè sansib ou a koute m’, nan verite delivrans ou a. Koute m’, Granmèt, paske kè sansib ou a bon; daprè pakèt bon kè ou, voye je sou mwen.R.

Mwen menm mwen pòv, m’ap plenn; delivrans ou a, Bondye, resevwa m’. M’ap fè lwanj non Bondye avèk kantik, m’ap fè konpliman pou li nan lwanj.R.

Paske Bondye ap sove Siyon, l’ap bati vil Jida yo. Ras sèvitè l’ yo ap eritye l’, moun ki renmen non l’ yo, y’ap abite ladan l’.R.

DEZYÈM MOSO LABIB

“Tout bagay se pa lantremiz li, se nan li yo kreye”.

NAN LÈT APOT PÒL KI SEN, POU KOLOSYEN YO 1, 15-20

Jezikri se pòtre Bondye yo pa kapab wè a, premye pitit nan tout kreyati; paske se nan li tout bagay fèt nan syèl yo ak sou tè a, ni sa yo kapab wè, ni sa yo pa kapab wè, ni twòn, ni pouvwa, ni chèf, ni otorite: yo tout se pa lantremiz li epi se nan li yo kreye, li menm li anvan yo tout, tout bagay kanpe fèm nan li.

Li se tèt kò legliz la; li se kòmansman, premye pitit nan pami mò yo, pou l’ kapab kenbe premye plas nan tout bagay: sèke se nan li Bondye te deside pou fè tout bagay nèt abite, pou l’ rekonsilye tout moun nan li pa lantremiz li menm, antan l’ bay lapè pa pouvwa san lakwa l’ la, ni pou sa k’ sou tè a, ni pou sa k’ nan syèl la.

Pawòl Granmèt la.

R/Mèsi Bondye, mèsi.

ALELOUYA                                                                 Jn 6, 64b. 69b

R/ Alelouya. Pawòl ou yo, Granmèt, se lespri ak lavi; ou gen pawòl lavi tout tan an.R. Alelouya.

LEVANJIL

“Ki moun ki pwochen m’?”

MEN BÒN NOUVÈL JEZIKRI A DAPRÈ LIK    KI SEN 10, 25-37

Lè sa a:

Gen yon espesyalis lalwa a ki leve pou l’ eseye Jezi, li di: “Mèt, ki sa pou m’ fè pou m’ gen lavi tout tan an?”

Jezi di l’: “Nan lalwa a ki sa k’ ekri? Kijan ou li?”

Li reponn, li di: “Se pou ou renmen Granmèt Bondye ou ak tout kè ou, ak tout nanm ou, ak tout fòs ou, ak tout lespri ou, epi pwochen ou tankou ou menm”.

Jezi di l’: “Ou reponn byen: fè sa, epi w’a viv”. Li menm menm, ki vle bay tèt li rezon, li di Jezi: “Kilès ki pwochen m’?” Jezi pran lapawòl ankò, li di: “Yon mesye t’ap desann sot Jerizalèm al Jeriko, li tonbe nan men asasen, yo vòlè l’, yo bat li, yo pati kite l’ prèske mouri. Yon prèt vin ap desann sou menm wout sa a, li wè l’, li pase. Menm jan an tou yon levit, li rive tou pre kote a, li wè l’, li travèse.  Men gen yon Samariten ki t’ap vwayaje, ki rive tou pre l’, li wè l’, kè l’ fè l’ mal jous nan zantray li. Li pwoche, li mare kote li te blese yo, li vide luil ak diven; li mete l’ sou milèt li, li kondui l’ nan yon lotèl, li swen l’. Nan landmen, li lonje de pyès lajan bay mèt lotèl la, li di: “Okipe l’; tout sa w’a depanse an plis, se mwen menm k’ap renmèt ou sa, lè m’ tounen”. Kilès nan twa sa yo ou panse ki pwochen moun sa a ki te tonbe nan men asasen yo?” Li menm li di: “Sila a ki te fè kè l’ sansib pou li a”. Jezi di l’: “Ale, ou menm tou fè menm jan”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Vwala te gen yon doktè lalwa ki vini pou l’ pran Jezi nan pèlen. Li mande Jezi: Mèt, sa pou m’ fè pou m’ jwenn lavi ki p’ap janm fini an? Jezi tounen mande l’: Ou menm ki doktè lalwa, kisa ou li nan Labib? Li reponn: se pou w’ renmen Bondye ak tout kè ou, epi se pou ou renmen pwochen ou menm jan ou renmen pwòp tèt pa ou. Jezi di: ou byen reponn. Fè sa, epi w’a viv.  Nèg la pa t’ kontan dèske li pa t’ reyisi pran Jezi nan pyèj. Li di: kilès ki pwochen m’? Lè sa, Jezi rakonte yon parabòl, li di: te gen yon moun ki t’ap desann sot Jerizalèm pou l’ ale Jeriko. Sou wout la, li bare ak kèk vòlè, yo tonbe sou li, yo ba t’ li, yo piye l’ epi yo kite l’ depafini sou bò chemen an.  Yon sakrifikatè vinn pase la. Li wè nèg la, men li prese pou l’ ale fè sakrifis nan Tanp la. Li se yon gwo nèg, li pa t’ kab okipe malere a, li pase lòt bò chemen an. Aprè sa, te gen yon moun ras Levi k’ap fè sèvis nan Tanp la ki vin pase. Li fè menm jan tou.  Lè fini, gen yon etranje, yon Samariten, ki vin pase. Samariten sa a wè yon Jwif, yon lènmi li, nan ka sa, kè l’ fè l’ mal. Atout li lènmi mesye a, li pa t’ pè mete tèt li ba pou l’ sèvi nèg la. Li swen li, li mete l’ sou bèt li epi li mennen l’ nan yon lotèl. Lè fini, li peye mèt lotèl la pou l’ okipe malere a.  Lè Jezi fin rakonte parabòl sa a, li mande doktè lalwa a: “Kilès nan twa mesye sa yo ki montre li se pwochen nèg ki bare ak vòlè yo? Lòt la reponn: sa k’ te gen pitye pou li a. Jezi di l’: se sa menm. Ou menm, ale fè menm jan tou. Mezanmi, sa Jezi di doktè lalwa sa a, li di l’ pou nou tout. Li vle pou nou aji menm jan ak samariten an, ki pa t’ gen move lògèy, ki pa t’ kenben rankin. Li pa t’ konprann li gwo nèg twòp pou l’ okipe malere a; li tounen yon sèvitè pou lènmi li. Samariten sa a, se yon nèg ki dou. Jezi vle pou nou menm tou nou gen yon kè ki dou. Li te di: Ala chans pou moun ki dou, paske tè a (ki donk, peyi wa ki nan syèl la) se pou yo.  Men, sa sa vle di “dou”? Yon moun ki dou se pa nan pale fò, pa nan pran pòz, pa nan kòlè. Li pa gen move lògèy. Li pa konprann li pi siperyè pase frè li yo. Li pa dèyè premye plas. Li kab kite yon lòt moun pran devan. Pase pou l’ fè moun yo sèvi li, li tounen sèvitè frè li yo. Premye ekzanp yon moun ki dou, se Jezi menm. A tout li menm ak Bondye, li pa pè rabese tèt li pou l’ vin sèvite nou tout. Jezi di: “Vin pran leson nan men m’, paske mwen dou, mwen gen kè m’ tou pòv, n’a jwenn repo pou lavi nou.  Nan lamès maten an, ann mande Jezi montre nou kijan pou nou konbat move lògèy ki nan kè nou, aprann nou ki jan pou nou vin dou.

LAPRIYÈ: Bondye Granmèt, ou di nan pwen anyen ou mande n’ ki depase fòs nou. Nou kwè ou, paske Pawòl ou se laverite. Men, lè ou mande n’ pou nou renmen menm jan ak Jezi, lavi a montre n’ se yon bagay ki fasil. Ede n’ konprann, tanpri, kouman ou renmen n’, malgre nou tou pa bon: sa va pèmèt nou sipòte pwochen n’ pi byen. Ede n’ kwè Jezikri vin geri n’ anba egoyis nou, anba enjistis nou yo: sa va ban n’ kouraj lite pou n’ fè tout pitit ou yo tounen yon sèl fanmi.

PWOPOZISYON: Jezi vle pou nou gen yon kè ki dou. Mesaj sa a, se pou nou viv li. Men ki jan nou kab fè sa: Semèn sa a, tanzantan an nou lapriyè mande Jezi aprann nou vin dou, menm jan ak li.