JEDI 1

Koulè Blan

ALFONS DE LIGORI KI SEN, Evèk ak Savan sakre Legliz la

(Memwa)

PREMYE MOSO LABIB

“Nyaj la kouvri joupa temwayaj la, bèlte Granmèt la plen l’”.

NAN LIV EKZÒD 40, 14-19. 32-36

Jou sa yo:

Moyiz fè tout sa Granmèt la te kòmande. Konsa sou premye mwa dezyèm ane a, premye jou mwa a, li drese joupa a. Moyiz drese l’, li enstale tab yo, baz yo ak travès yo, li drese kolòn yo, li deplwaye plafon an anlè joupa a, li kouvri l’ sou pa anlè, jan Granmèt la te kòmande l’ la.

Li mete temwayaj la nan ach la, li mete travès yo anba ach la, li mete enstriman repons Bondye a anlè. Lè l’ fin mete ach la nan joupa a, li pandye yon vwal devan l’, pou l’ reyalize kòmandman Granmèt la.

Nyaj la kouvri joupa temwayaj la, bèlte Granmèt la kouvri l’. Moyiz pa t’ kapab antre anba joupa contra a, nyaj la te kouvri tout bagay, bèlte Granmèt la t’ap klere, paske nyaj la te kouvri tout bagay. Lè nyaj la te kite joupa a, pitit Izrayèl yo te kontinye chemen yo; si nyaj la te ret pandye anlè, yo te rete nan menm kote a. Nyaj Granmèt la te poze sou joupa a pandan lajounen, nannuit menm se te yon dife, tout pèp Izrayèl la te konn wè l’ chak fwa yo te rete.

Pawòl Granmèt la.

R/Mèsi Bondye, mèsi.

SÒM REPONS 83, 3. 4. 5-6a e 8a. 11

R/ Ala renmen nou renmen joupa ou yo, Granmèt lame yo!

Nanm mwen anvi, l’ap deperi pou kay Granmèt la. Kè m’ ak chè m’ ap danse pou Bondye vivan an.R.

Menm ti zwazo jwenn yon kay pou li, toutrèl la jwenn yon nich, kote li depoze ti pitit li yo: lotèl ou yo, Granmèt lame yo, wa m’ ak Bondye m’.R.

Se chans pou moun ki abite nan kay ou a, pou tout tan y’ap fè lwanj ou. Se chans pou moun ki jwenn sekou l’ nan ou.     Y’ap mache sot nan mèvèy al nan mèvèy.R.

Sèke yon jou nan lakay ou yo pi bon pase mil, mwen chwazi ret sou papòt nan kay Bondye m’ nan. Pase pou m’ abite nan joupa moun peche yo.R.

LEVANJIL

“Yo mete sa k’ bon yo apa nan veso; kanta move yo menm, yo jete yo deyò”.

MEN BÒN NOUVÈL JEZIKRI A DAPRÈ MATYE KI SEN 13, 47-53

Lè sa a: Jezi si foul yo:

“Rèy syèl la sanble ankò ak yon senn yo voye nan lanmè, ki ranmase tout kalite pwason. Lè l’ plen, yo rale l’, yo chita bò lanmè a, yo mete sa k’ bon yo apa nan veso; kanta sa k’ move yo menm, yo jete yo deyò. Se konsa sa ap fèt nan finisman syèk tan yo: Mesaje yo ap sòti, y’ap separe move yo sot nan mitan moun ki kòrèk yo, y’ap jete yo nan boukan dife a: la ap gen kriye ak manje dan. Nou konprann tout bagay sa yo?”

Yo di l’: “Wi”.

Li di yo: “Konsa tout pwofesè ki resevwa lansèyman nan rèy syèl la, li sanble ak yon pèdfanmiy, ki pran nan trezò l’ sa k’ nouvo ak sa k’ ansyen”. Rive, lè Jezi fin di parabòl sa yo, li pati sot la.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: N’ap viv nan yon mond kontradiksyon, yon mond kote byen ak mal toujou nan konba. Se yon mond kote gen moun ki nan tristès ak moun ki nan lapenn; gen moun k’ap ri ak moun ki dlo nan je; gen moun ki grangou ak moun k’ap jete manje nan poubèl; gen moun k’ap dòmi nan nan konfò ak moun k’ap dòmi sou laplas piblik oubyen anba pon nan lari; gen moun ki gen asirans medikal ak moun ki pa gen kòb pou yo ale lopital; gen moun k’ap viv nan liks ak moun k’ap viv nan endijans; gen moun k’ap chèche Bondye ak moun ki pa vle tande pale de li;… Kidonk se yon mond paralèl, yon mond anpil kontradisyon. Jodi a, li enpòtan pou nou sitiye nou byen fas ak reyalite mond nou an, li enpòtan pou nou montre kote nou kanpe pa rapò ak tout kouran k’ap sikile nan mond nou an.

Jodi a Legliz nou an ap sonje Sen Alfons de Ligori. Se yon gwo nèg, yon gran nèg ki te viv reyalite kontradisyon mond la nan disetyèm syèk. Li te fèt nan dat 27 septanm 1696 nan peyi Itali, nan vil Napl. Nan dat premye out 1787 li te rann dènye bout souf li, kote yo rele nan lang italyen yo “Nocera de’ Pagani”. Legliz la proklame li doktè. Se pa yon medsen fèy oubyen yon moun ki te konn fè chiriji non! Lè yo pale nou de doktè nan Legliz la, yo vle pale nou de yon gwo tewolojyen; kidonk yon moun ki te yon inite ant lafwa li, panse li sou Bondye ak fason li t’ap viv. Ebyen se kalite moun sa a ke Legliz la ap envite nou kontanple nan Sen Alfons de Ligori; yon moun ki senp e ki saj. Yon moun ki te kite limyè Granmèt la klere fènwa ekzistans li, pou li te kapab tounen limyè pou lòt yo. Limyè Alfons la kontinye ap briye jounen jodi a atravè sila yo ki kontinye ap viv ideyal li a, sila yo ki pote non redanmtoris. Nan lide pou li te montre ki kalite renmen Bondye genyen pou lèzòm, Alfons te fonde yon kominote relijyez ke yo rele “Kongregasyon Redanmtè ki Sen anpil la”. Jodi a redanmtoris ap travay nan anpil zòn sou planèt la e y’ap kontinye fè sa Sen Alfons te konn fè, y’ap kontinye fè sa li te konn mande fè, dekwa pou tout moun kapab santi prezans Bondye, pou tout moun kapab non Jezikri ak delivrans Bondye a.

Ala bon sa ta bon, si nou ta pozisyone nou menm jan ak Sen Alfons nan mond kontradisyon n’ap viv jodi a. Pawòl Bondye a, se pou tout moun, e se sa Levanjil jodi a ap anseye nou. Pawòl Bondye a se tankou yon filè oubyen yon senn ki lage pou nou tout. Filè a se Levanjil la. Nou menm nou se pwason yo. Sila k’ap peche a, se Granmèt la ak asosye li yo, se li menm ki rele nou. Li vle sove nou. Men gen anpil nan nou ki rebèl. Nou bouche zòrèy nou pou nou pa tande; nou fèmen je nou pou nou pa wè. Tèt nou di! Jodi a, Granmèt ap di nou fè atansyon, paske si yo ta jwenn nou kòm move pwason nan senn nan, y’ap jete nou, paske nou p’ap gen valè. Mezanmi, an nou pwofite ti tan Bondye ba nou an pou nou prepare gwo jou Jijman an, antan n’ap pran ekzanp sou Alfons de Ligori.

LAPRIYÈ: Bondye ki gen tout pouvwa, ou menm kit e rele Alfons de Ligori pou l’ t’al gaye bòn nouvèl renmen ak delivrans ou a, tanpri ede nou swiv ansèyman ak ekzanp li yo; konsa yon jou menm jan ak li nou va chita nan plas pitit ou a t’al prepare pou nou an. Nou mande ou favè sa nan nou Sovè nou an Jezikri, Pitit ou. Amèn

PWOPOZISYON: Menm jan ak Alfons, montre ou se yon kretyen tout bon vre; si ou se moun ki kwè, montre sa nan panse ou ak nan aksyon ou yo.