LENDI 2

Koulè Vèt

PREMYE MOSO LABIB

“Moun k’ap dòmi nan Jezi yo, Bondye ap mennen yo vin jwenn li.”

NAN PREMYE LÈT APOT PÒL KI SEN POU TESALONISYEN YO 4, 13-17

Frè m’ yo, sou kesyon moun k’ap dòmi yo, nou pa vle pou nou pa konnen, dekwa pou nou pa pran lapenn tankou lòt moun yo ki pa gen espwa yo. Si reyèlman vre nou kwè Jezi mouri epi li leve vivan, konsa tou moun yo k’ap dòmi nan Jezi yo, Bondye ap mennen yo avèk li.

Men sa nou di nou nan pawòl Granmèt la, nou menm k’ap viv la, k’ap la toujou lè Granmèt la ap vini an, nou p’ap pran devan sila yo k’ap dòmi an. Paske Granmèt la li menm, sou lòd ak nan vwa Chèf Mesaje yo ak nan son twonpèt Bondye a, l’ap desann sot nan syèl la, epi moun ki mouri nan Jezikri yo, y’ap tounen vin vivan an premye. Apre sa, se nou menm k’ap viv yo, ki rete yo, y’ap pran nou nan nyaj yo al rankontre Jezikri nan lè a, konsa n’ap toujou avèk Granmèt la.

Pawòl Granmèt la.

R/Mèsi Bondye, mèsi.

SÒM REPONS 95, 1 e 3. 4-5. 11-12. 13

R/ Granmèt la vini pou l’ jije tè a.

Chante yon kantik nouvo pou Granmèt la, chante pou Granmèt la, tout tè a.

Anonse bèlte l’ nan pami nasyon yo, mèvèy li yo nan tout pèp yo.R.

Paske Granmèt la gran, li merite anpil lwanj, li terib anlè tout dye yo.

Paske tout dye nasyon yo yo pa ekziste. Men se Granmèt la ki fè syèl yo.R.

Se pou syèl yo kontan, se pou tè a danse, se pou lanmè a sònen ak tout sa l’ gen ladan l’; se pou jaden yo kontan ak tout sa k’ nan yo.R.

Lè sa a tout pye bwa nan rak yo ap danse devan fas Granmèt la, paske l’ap vini, paske l’ap vini pou l’ jije tè a. L’ap jije fas tè a nan jistis ak pòv yo nan verite l’.R.

LEVANJIL

“Li voye m’ anonse bòn nouvèl la bay pòv yo... Yo pa resevwa okenn pwofèt byen nan peyi l’”.

MEN BÒN NOUVÈL JEZIKRI A DAPRÈ LIK KI SEN         4. 16-30

Lè sa a:

Jezi rive Nazarèt, kote yo fè levasyon l’ nan, li antre nan kay reyinyon an, jan l’ konn fè a, yon jou saba, li leve pou l’ li. Yo renmèt li liv pwofèt Izayi a.

Kon l’ louvri liv la, li jwenn plas la, kote ki te ekri: “Lespri Granmèt la sou mwen; se pousa li sakre m’, li voye m’ anonse pòv yo bòn nouvèl la, geri sa k’ gen kè yo kraze yo, deklare delivrans bay prizonye yo, limyè bay avèg yo, ranvwaye sa y’ap kraze yo pou yo lib, anonse yon ane Granmèt la fè gras, yon jou li bay rekonpans”. Kon l’ woule liv la, li renmèt li nan men sèvitè a, epi li chita. Je tout moun nan kay reyinyon an te fikse sou li.

Li menm li kòmanse di yo: “Se jodi a pawòl Labib sa a reyalize nan zòrèy nou yo”.

Tout moun t’ap fè temwayaj sou li, yo te sezi pou pawòl yo ki t’ap sòti nan bouch li a, yo t’ap di: “Èske sila a se pa pitit Jozèf la?”

Li di yo “Sètènman n’ap di m’ parabòl sa a: “Doktè, geri pwòp tèt ou”: tout sa nou tande ki fèt nan Kafanawòm nan, fè l’ isit la tou nan peyi w’ la”.

Li di: “An verite mwen di nou: yo pa byen resevwa okenn pwofèt nan peyi l’. Se laverite mwen di nou la a: te gen anpil vèv nan tan Eli nan Izrayèl, lè syèl la te fèmen pandan twazan ak si mwa, lè te gen gwo grangou sou tout tè a; men yo pa t’ voye Eli bay okenn nan yo, sof nan Sarepta Sidon an kot madanm ki te vèv la. Epi tou te gen anpil moun ki te gen maladi lalèp nan Izrayèl sou tan pwofèt Elize, men pèsòn nan yo pa t’ geri, sof Naaman, Siryen an”.

Tout moun nan kay reyinyon an te plen ak kòlè, lè yo tande bagay sa yo. Yo leve, yo jete l’ deyò lavil la, yo kondui l’ jous sou yon pwent tèt mòn, kote lavil yo a te bati a, pou yo jete l’anba.

Li menm menm, li pase nan mitan yo, li pati.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jezi pran liv sakre a nan kay reyinyon an nan Nazarèt kote l’ te grandi a, e li tonbe sou pasaj ki nan liv pwofèt Izayi a, ki fè referans dirèk avè l’ kòm sila ki konsakre pou reyalize pwojè wayòm Bondye a nan mitan nou. Se yon pwojè ki bati sou enspirasyon Lespri Sen an, paske se li menm menm ki konsakre Jezi pou sa. Se yon pwojè pou fè lanmou, lagras ak lajistis blayi toupatou sou tout fas tè a. Tout aksyon Jezi pandan l’ te sou latè te toujou konfòm ak gran pwojè sa a. Men pou l’ reyalize pwojè sa a, gen anpil obstak ki te bare chemen l’, tradisyon sosyete kote l’ fèt la, kondisyon sosyal li, elatriye. San dout peyizan l’ yo te konnen kondisyon lavi l’, yon ti pòv, lè yo tande bèl pawòl ki t’ap sòti nan bouch li ak bèl bagay li t’ap fè, yo doute e yo twouve l’ twò raz pou yo ta suiv yon ti malere konsa. Se pou sa Jezi site pwovèb sa ki di: “yo pa janm byen resevwa yon pwofèt nan peyi li”. Donk nou menm kretyen k’ap suiv Jezi, nou pa bezwen mete nan tèt nou tout bagay pral wòz e fasil lè n’ap akonpli misyon nou. N’ap jwenn anpil difikilte nan sosyete nou si nou vle reyalize sa ki byen. Men, nou pa dwe janm dekouraje, paske Jezi li menm an premye te fè eksperyans eksklizyon nan sosyete pa l’ la poutèt li te parèt ak yon nouvo son klòch ki te diferan ak sa yo te konn di e fè nan sosyete l’ la. Jounen jodi a, nou menm kòm kretyen, nou dwe fè fas ak anpil gwo defi tou nan mond global e modènize sa a, kote gen yon gwo fose ant rich ak pòv, kote gen anpil egoyis, enjistis, rayisans ak vyolans. Si nou vle rete fidèl ak Jezi nou pa dwe pè anonse Bòn Nouvèl Wayòm Bondye a nan tout sikonstans avèk anpil pridans e kreyativite nan pawòl nou yo ak nan aksyon nou yo, menm si yo ta fè yo ekskli nou ou matirize nou. 

LAPRIYÈ: Bondye Papa nou, ou menm ki te voye Jezi Pitit ou pou vin sove nou anba chenn esklavaj peche nou yo, ban nou lagras ou ak fòs Lespri Sen an pou n’ ka toujou fè volonte w’ nan misyon ou ban nou kòm kretyen, menm si sa ka koute n’ lavi nou. Nou mande w’ sa pa pouvwa JeziKri gran frè nou. Amèn.

PWOPOZISYON: Semèn sa a m’ap fè youn nan aksyon Jezi te fè yo, anonse bòn nouvèl la, nan pawòl ak nan aksyon, vizite yon malad oubyen yon prizonye pou rekonfòte l’, epi m’ap angaje m’ plis pou m’ lite kont peche sosyal ki genyen nan sosyete kote m’ap viv la.