LENDI 4

Koulè Blan

CHAL BOWOME KI SEN, EVÈK

(Memwa)

PREMYE MOSO LABIB

NAN PREMYE LÈT APOT PÒL POU WOMEN YO 12, 3-13:

Poutèt favè Bondye fè m' lan, men sa m'ap mande nou tout: Piga nou mete nan tèt nou nou plis pase sa nou ye. Okontrè, pa mete gwo lide nan tèt nou. Se pou chak moun konsidere tèt li daprè sa Bondye ba li ki pa l' nan lafwa. Gade byen: nou gen anpil manm nan yon sèl kò, men chak manm gen sèvis pa l' apa. Se konsa tou, nou anpil, men nou fè yon sèl kò ansanm ak Kris la. Nou tout nou fè yon sèl kò tou youn ak lòt, tankou plizyè manm nan yon sèl kò. Bondye pa bay tout moun menm don. Men, nou fèt pou nou sèvi ak kado a daprè favè Bondye fè nou an. Si yon moun resevwa don pou l' anonse mesaj ki sòti nan Bondye, se pou l' fè sa daprè lafwa li genyen an. Si yon lòt resevwa don pou l' fè yon travay, se pou l' fè travay la. Moun ki resevwa don pou l' montre lòt anpil bagay, se sa pou l' fè. Moun ki resevwa don pou l' bay ankourajman, se pou li bay ankourajman. Moun k'ap bay nan sa li genyen an, se pou l' fè sa san gad dèyè. Moun k'ap dirije a, se pou l' fè sa byen. Moun k'ap montre jan li gen kè sansib la, se pou li fè sa ak kè kontan. Se pou nou youn renmen lòt ak tout kè nou. Rayi sa ki mal, men kenbe fèm nan fè sa ki byen. Se pou nou youn renmen lòt tankou frè ak sè k'ap viv ansanm ak Kris la. Nan tout sa n'ap fè, se pou nou gen respè youn pou lòt, pa konsidere tèt nou anvan. Travay di, pa fè parese. Mete aktivite nan sèvis n'ap rann Mèt la. Pandan n'ap tann lan, fè kè n' kontan. Se pou nou gen anpil pasyans nan mitan soufrans nou yo. Pa janm sispann lapriyè. Bay moun k'ap viv pou Bondye yo konkou lè nou wè yo nan bezwen. Resevwa moun ki vin lakay nou byen.

Pawòl Granmèt la.

R/Mèsi Bondye, mèsi.          

SÒM REPONS: 88, 2-3. 4-5. 27 e 29

R/ Kè sansib Granmèt la se tout tan m’ap chante l’.

Kè sansib Granmèt la, se tout tan m’ap chante l’, pou jenerasyon ak jenerasyon m’ap anonse verite ou nan bouch mwen. Sèke mwen te di: “Pou tout tan kè sansib la bati, nan syèl la ou asire verite w’ la. R.

Mwen regle kontra avèk sila a mwen chwazi a, mwen fè sèman bay David, sèvitè m’ nan:  pou tout tan m’ap asire desandans ou a, m’ap drese fotèy ou pou jenerasyon ak jenerasyon.R.

Li menm l’ap rele m’: “Se Papa m’ ou ye, Bondye m’ ak kachèt delivrans mwen”. Pou tout tan m’ap kenbe kè sansib mwen pou li, kontra m’ nan ap fidèl pou li.R.

LEVANJIL

“Bon gadyen an bay lavi l’ pou mouton l’ yo”.

MEN BÒN NOUVÈL JEZIKRI A DAPRÈ JAN KI SEN 10, 11-16

Lè sa Jezi di:

Se mwen menm ki bon gadò mouton yo. Bon gadò a ap bay lavi l' pou mouton l' yo.  Yon nonm k'ap fè yon dyòb, se pa yon gadò li ye. Mouton yo pa pou li. Lè l' wè bèt nan bwa ap vini, li kouri kite mouton yo, li met deyò. Lèkonsa, bèt nan bwa a pran mouton yo pote ale, li gaye yo. Nonm lan met deyò paske se yon dyòb l'ap fè. Ki mele l' ak mouton yo?  Mwen menm, mwen se gadò mouton yo. Papa a konnen m', mwen konn Papa a. Konsa tou, mwen konnen mouton m' yo. Yo menm tou yo konnen mwen. Mwen gen anpil lòt mouton ki pa nan pak sa a. Mwen gen pou m' mennen yo tou. Y'a tande vwa mwen. Lè sa a, va gen yon sèl bann mouton ak yon sèl gadò.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jodi a n’ap fete Sen Chal Bowome ki sen. Misye se te yon evèk, sa vle di, yon monseyè, ki te vrèman fè travay li byen. Li t’ap swiv Jezi nan sans se Jezi ki bon gadò mouton yo. Sa vle di, li te la pou pèp la lè yo te bezwen l’.  Li te fè pou yo. Men sitou, gadò a te konnen chak grenn moun nan dyosèz li a trè byen, paske li te viv nan mitan yo, li t’ap mache ansanm avèk yo. Sa pa fè lontan, Pap Franswa te bay yon ekzanp ki fè n’ konprann mesaj la pi byen. Li di konsa, yon bon jan gadò mouton, fòk kò li gen lodè mouton yo. Sa vle di, yon monseyè, yon pè, yon mè, menm yon minis kominyon oubyen yon katechis, pa gen dwa mete anpil distans ant li menm ak pèp la, paske li la pou sèvi pèp la. Si l’ toujou fre pandan pèp la ap pase mizè, sa vle di li p’ap fè travay li byen.  Se yon dyòb l’ap fè ; men pèp la konnen l’ pa ka konte sou li vre. Se pa sa Jezi mande. Menm jan Jezi te Bondye, men l’ tounen yon moun tou piti, yon malere, pou li te ka sove nou, fòk nou menm k’ap swiv Jezi nou rete tou piti. Jezi te pi gwo pase nou, men l’ te pataje tout sa l’ te genyen, li te kite foul la vin touche li pou yo geri, li te kite etranje yo pale avè l’.  Li te lave pye disip li yo. Nou menm ki gen yon angajman nan legliz la, nou pa gen dwa sèvi ak ministè nou an pou n’ vante tèt nou, ni pou n’ fè moun sèvi nou olye nou menm nou sèvi yo. Si nou menm k’ap swiv Jezi kòmanse ap viv leson sa a nan fanmi nou, nan pawas nou yo, nan vwazinay nou yo ak lekòl nou yo, anpil bagay gen pou yo chanje nan sosyete a.

PRIYE: Granmèt, n’ap mande ou kontinye voye bon jan gadò mouton pou legliz ou a!  Nou bezwen monseyè, pè, mè, katechis, ak minis ki kwè nan misyon yo a tout bon. Amèn.

PWOPOZISYON : Mwen menm antan ke kretyen angaje, èske m’ pa twò lwen moun mwen gen pou m’ sèvi yo ?