MADI 22

Koulè Blan

MADI ANNDAN SEMÈN PAK LA

PREMYE MOSO LABIB

«Fè penitans, se pou chak moun nan nou batize o non Jezi».

NAN LIV TRAVAY APOT YO 2, 36-41

Jou Pannkòt la, Pyè t’ap di Juif yo:

«Sètènman se pou tout kay Izrayèl la konn sa, Bondye fè l’ Granmèt ak Kris, Jezi sa a nou te kloure sou kwa a”. Lè yo tande pawòl sa yo, yo chagren nan kè yo, yo di Pyè ak lòt Apot yo: “Ki sa pou nou fè, mesye frè nou yo»?

Pyè menm di yo: “Se pou nou fè penitans, se pou chak moun nan nou batize o non Jezi, pou padon peche nou yo, n’a resevwa kado Espri Sen an. Sèke se pou nou pwomès la ye, ansanm ak pitit nou yo, ak tout moun ki lwen yo, tout sa Granmèt Bondye nou an rele yo”. Ak anpil dòt pawòl ankò li t’ap sèvi temwen, li t’ap ankouraje yo, li t’ap di: “Sove lavi nou sot nan jenerasyon sa a ki move a”. Moun yo ki te resevwa pawòl li a, yo batize, jou sa a te gen apeprè twa mil moun ki vin tounen disip.

Pawòl Granmèt la.

R/ Mèsi Bondye, mèsi.                                              

SÒM REPONS 32, 4-5. 18-19. 20; 22

R/ Kè sansib Granmèt la plen tè a.

Oubyen : Alelouya.

Sèke pawòl Granmèt la dwat tout aksyon l’ yo nan fidelite, li renmen jistis ak jijman, kè sansib Granmèt la plen tè a.R.

Men je Granmèt la sou moun ki respekte l’ yo, sou moun ki espere sou kè sansib li, pou l’ delivre nanm yo sot nan lanmò, pou l’ ba yo manje nan grangou.R.

Nanm nou ap konte sou Granmèt la, paske se sekou nou ak pwoteksyon nou li ye.

Se pou kè sansib ou vin sou nou, Granmèt, tankou nou te espere nan ou.R.

LEVANJIL

«Mwen wè Granmèt la, se bagay sa yo li di m’».

MEN BÒN NOUVÈL JEZIKRI A DAPRÈ JAN KI SEN        20, 11-18

Lè sa a:

Mari te kanpe bò kavo a, sou pa deyò, li t’ap kriye. Pandan l’ap kriye, li panche, li gade andan kavo a. Li wè de zanj an blan ki chita, youn bò tèt la ak lòt la bò pye yo, kote yo te poze kò Jezi a. Yo di l’: “Madanm, poukisa w’ap kriye”? Li di yo: “Se paske yo pran Granmèt mwen an, mwen pa konnen kote yo mete l”. Pandan l’ap di sa, li vire gade dèyè, li wè Jezi kanpe; men li pa t’ konnen se te Jezi. Jezi di l’: “Madanm, poukisa w’ap kriye?  Kilès w’ap chèche?” Li menm antan l’ konprann se jeran jaden an, li di li: “Mèt, si se ou k’ te wete l’, di m’ kote ou te depoze l’; epi mwen menm m’a pran l”.  Jezi di l’: “Mari”! Li vire, li di l’: “Raboni (sa vle di Mèt)”! Jezi di l’: “Pa touche m’; mwen pa ko monte kot Papa m’. Men al kot frè m’ yo, di yo: “M’ap monte kot Papa m’ ak Papa nou an, Bondye m’ nan ak Bondye nou an”. Mari Madlèn rive, li anonse disip yo: «Mwen wè Granmèt la, se bagay sa yo li di m’».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jezi leve byen vivan pami mò yo, alelouya! Nou pa kapab gen tristès nan lavi nou, Jezi pote kè kontan ak lespwa pou nou tout kretyen k’ap lite, k’ap viv moman difisil. Viktwa se pou nou, paske Jezi pote laviktwa sou lanmò ak sou pouvwa peche.Li monte nan syèl la kote papa a pou li prepare plas nou pou dènye jou yo.Nan levanjil jodi a nou rankontre Mari Madlèn k’ap chèche Jezi pami mò yo.«Poukisa w’ap kriye?», se keksyon Jezi te poze Mari Madlèn. Se menm keksyon sa a Jezi ap poze nou jodi a. Nou bliye li leve byen vivan. Jezi se lespwa nou, se garanti viktwa lavi sou lanmò, kè kontan sou tristès, lanmou sou rayisans. Annou di alelouya! Viv Jezi ki leve byen vivan!

LAPRIYÈ: N’ap fè konpliman pou ou Granmèt pou leve ou leve Jezi pami mò yo.

PWOPOZISYON: Visite moun ki nan prizon.