MADI 29

Koulè Blan

KATRIN DE SYÈN KI SEN, Vyèj e Savan sakre Legliz la

(Memwa)

PREMYE MOSO LABIB

“Yon sèl kè ak yon sèl nanm”.

NAN TRAVAY APOT YO 4, 32-37

Foul fidèl yo te gen yon sèl kè ak yon sèl nanm; pèsòn nan yo pa t’ konsidere sa l’ te genyen kòm pwòp byen pa l’, men tout bagay te ansanm pou yo. Avèk gran fòs, Apot yo t’ap sèvi rezireksyon Jezikri Granmèt nou an temwen; te gen gran gras nan yo tout. Nan pami yo pa t’ gen pèsòn ki te nan bezwen; tout moun ki te gen jaden oubyen kay, yo vann yo, yo pote pri lavant la, yo depoze l’ nan pye Apot yo; yo separe l’ bay yo chak, daprè sa chak moun te bezwen. Jozèf Apot yo te bay ti non Banabe (sa vle di Pitit konsolasyon), yon Levit, nan ras Chip, li te gen yon jaden, li vann li, li pote pri a, li mete l’ nan pye Apot yo.

Pawòl Granmèt la.

R/ Mèsi Bondye, mèsi.      

SÒM REPONS 92, lab. 1c-2. 5

R/ Granmèt la wa, li vlope ak glwa.

Granmèt la wa, li vlope ak glwa, Granmèt la vlope, li mare ren l’ ak fòs.R.

Reyèlman li rann fas tè a solid, pou l’ pa souke. Twòn ou solid depi lontan, depi tout tan ou ekziste.R.

Temwayaj ou yo merite konfyans nèt; kay ou a klere ak sentete, Granmèt, pou longè tan yo.R.

LEVANJIL

“Pèsòn pa monte nan syèl la, sof sa a ki desann sot nan syèl la, Pitit moun nan”.

MEN BÒN NOUVÈL JEZIKRI A DAPRÈ JAN KI SEN        3,5a. 7b- 15

Lè sa a: Jezi di Nikodèm:

“Amèn, amèn, mwen di ou: Nou gen pou nou fèt ankò. Espri a soufle kote l’ vle, ou tande vwa l’, men ou pa konnen kote l’ sòti ni kote l’a prale: se konsa pou tout moun ki fèt sot nan Espri a”.

Nikodèm reponn li di l’: “Kijan pou bagay sa yo fèt”? Jezi reponn, li di l’: “Ou se mèt nan Izrayèl, epi ou pa konnen bagay sa yo? Amèn, amèn mwen di ou, se sa nou konnen n’ap pale, epi se sa nou wè nou temwaye; men temwayaj nou an nou pa resevwa l’. Si m’ di nou bagay tè a, nou pa kwè, kijan, si m’ap di nou bagay syèl yo, n’a kwè? Pèsòn pa monte nan syèl la sof sa a ki desann sot nan syèl la, Pitit moun nan ki nan syèl la. Epi, menm jan Moyiz te leve sèpan an nan dezè a, se konsa pou yo leve Pitit moun nan anlè, pou tout moun ki kwè nan li pa peri, men pou yo gen lavi tout tan an”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

OUBYEN YO KAPAB LI:

PREMYE LEKTI:  1 JAN KI SIN 1, 5 - 2, 2

SÒM REPONS 102, 1-2. 3-4. 8-9. 13-14. 17-18a

LEVANJIL: Matye 11, 25-30

LEVANJIL : MATYE 11, 28-30

REFLEKSYON : Tèks pawòl Bonye nou li pou jodi a ap mande nou fè 2 jefò : Premyèman, se mete sa nou genyen ansanm pou nou viv. Nou konstate nan premye lekti a premye kretyen yo te mete sa yo genyen ansanm pou yo viv ; konsa tout moun te jwenn daprè sa yo te gen bezwen. Nou ka vit konprann viv ansanm, pataje sa nou genyen, se yon devwa pou tout kretyen.Yon moun ki nan nesesite, pa ekzanp yon moun ki grangou, sa fè li manke bon dispozisyon pou li sèvi Bondye. Men si nesesite li konble li kapab vin disponib pou li ka pi byen sèvi Bondye. Nan kòmansman Legliz la kretyen yo pa te anpil tankou yo anpil jounen jodi a, sa ki te pèmèt yo te kapab mete sa yo genyen ansanm. Jodi a nou pi plis, men sa pa vle di nou pa ka mete sa nou genyen ansanm. Nou kwè sans pawòl sa a pou jodi a rete nan nesesite pou nou pataje sa nou genyen ak sa ki pi pòv yo. Sa nou genyen, kapab se byen materyèl.Konsa tou, pouvwa nou genyen dwe sèvi pou ede Legliz la nan zèv l’ap fè pou sa yo ki vrèman san defans yo. Yon kesyon nou chak ka poze tèt nou pèsonèlman se: ki sa mwen genyen mwen dwe pataje pou lòt yo ka rive viv vrèman tankou pitit Bondye ? Dezyèm jefò a, se pou yon chanjman radikal nan lavi nou. Se kalite chanjman sa a Jezi te mande Nikodèm pou li te fè, pou li fèt yon dezyèm fwa. Ak batèm nan nou fèt yon dezyèm fwa, paske Bondye lave peche nou te eritye nan premye paran nou yo, peche sa yo ki te mete nou nan sityasyon lanmò. Men tou, nou gen yon responsabilite chak jou pou nou kenbe rad batèm nou byen pwòp. Se yon batay nou dwe angaje nou chak jou. Ak konkou lagras Bondye nou va rive atenn objektif sa a.

LAPRIYÈ : Mèsi Granmèt pou batèm mwen ki fè mwen tounen yon lòt moun. Ede mwen rete fidèl ak angajman sa a jous ou retounen. Amèn !

PWOPOZISYON : M’ap fè efò semèn sa a pou mwen pataje yon bagay ak yon moun ki vrèman nan bezwen.