LENDI 28

Koulè Blan

PREMYE MOSO LABIB

“Pandan yo t’ap lapriyè, yo tout vin plen ak “Espri Sen an epi yo kòmanse pale pawòl Bondye avèk asirans”.

NAN TRAVAY APOT YO 4, 23 -31

Jou sa yo:

Lè yo fin lage Pyè ak Jan, yo vin jwenn disip yo; yo anonse yo tout sa gran prèt yo ak ansyen yo te di yo. Lè yo tande sa, yo tout leve vwa yo kot Bondye, yo di: “Granmèt, se ou menm ki te fè syèl la ak tè a, lanmè a ak tout sa k’ nan yo; ou menm ki te di David, sèvitè w’ la, nan bouch papa nou yo pa lantremiz Espri Sen an: “Poukisa nasyon yo ap boulvèse, pèp yo ap fè konplo pou granmesi? Wa yo sou tè a yo kanpe, chèf yo rasanble fè yon sèl, kont Granmèt la ak kont Kris li a”. Reyèlman nan vil sa a Ewòd ak Pons Pilat ak nasyon yo ak pèp Izrayèl la, yo rasanble kont Pitit ou Jezi ki sen an, li menm ou te sakre a, pou yo fè sa men ou ak plan ou te regle davans pou fèt la. Koulye a Granmèt, voye je sou menas yo, bay sèvitè w’ yo favè pou yo pale pawòl ou a avèk tout asirans, antan ou lonje men ou fè gerizon ak siy ak pwodij o non Pitit ou Jezi ki sen an”. Pandan yo t’ap lapriyè, kote yo te rasanble a pran tranble, yo tout vin plen ak Espri Sen an, yo t’ap pale pawòl Bondye a avèk asirans.

Pawòl Granmèt la.

R/ Mèsi Bondye, mèsi.       

SÒM REPONS 2, 1-3. 4-6. 7-9

R/ Ala kontantman pou tout moun ki met konfyans nan ou, Granmèt.

Oubyen: Alelouya.

Poukisa nasyon yo ap boulvèse, pèp yo ap fè plan pou bagay ki pa gen konsistans? Wa yo sou tè a kanpe, chèf yo rasanble fè yon sèl kont Granmèt la ak kont Kris li a: “An nou kase chenn yo, an nou jete jouk yo a sot sou nou”! R.

Sa a ki abite nan syèl la ap ri yo, Granmèt la ap pase yo nan jwèt. Lè sa a atò li pale ak yo nan kòlè l’, nan move san l’, li boulvèse yo: “Se mwen menm ki enstale wa m’ nan sou Siyon, mòn mwen ki sen an”! R.

M’ap anonse desizyon l’ nan: Granmèt la di m’: “Se pitit mwen ou ye, se mwen menm jodi a ki anfante w’. Mande m’, m’ap ba ou nasyon yo kòm eritaj ou, pwopriyete ou se limit tè a. W’ap kòmande yo ak yon bagèt an fè, tankou veso ki fèt ak tè, w’ap kraze yo”.R.

LEVANJIL

“Si yon moun pa refèt nan dlo a ak Espri a, li pa kapab wè peyi wa Bondye a”.

MEN BÒN NOUVÈL JEZIKRI A DAPRÈ JAN KI SEN 3, 1-8

Te gen yon mesye nan pami Farizyen yo, yo te rele Nikodèm, yon chèf Juif yo. Li vin kot Jezi nannuit, li di l: “Rabi, nou konnen ou vin sot kot Bondye kòm mèt; pèsòn reyèlman pa kapab fè siy sa yo w’ap fè a, si Bondye pa avèk li”. Jezi reponn, li di l’: “Amèn, amèn mwen di ou, si yon moun pa refèt ankò, li pa kapab wè peyi wa Bondye a”. Nikodèm di l’: “Kijan yon moun kapab fè fèt, lè l’ fin vye? Èske li kapab antre ankò nan vant manman l’ pou refèt”. Jezi reponn: “Amèn, amèn mwen di ou, si yon moun pa refèt sot nan dlo ak Espri Sen an, li pa kapab antre nan peyi wa Bondye a. Sa k’ fèt sot nan chè a, se chè li ye, sa k’ fèt sot nan Espri a, se espri li ye. Pa sezi poutèt mwen di ou: Nou gen pou nou fèt ankò”. E spri a soufle kote l’ vle, ou tande vwa l’, men ou pa konnen kote l’ sòti oubyen kote l’a prale; se konsa tout moun ki fèt sot nan Espri a”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Pak la se fèt Jezi ki leve sòti anba povwa lanmò, se sa nou rele rezireksyon an. Nan fèt Pak sa a nou jwenn lavi nan Jezikri ki mouri e ki resisite byen vivan sot nan pami mò yo. Li kraze lanmò pa nou, li ba nou fòs, li ba nou espwa. Premye lekti a pale nou sou sitiyasyon Pyè ak Jan, kòman nan yon moman difisil, yo te nan prizon poutèt preche yo t’ap preche Levanjil la nan non Jezi. Lè mesye yo lage, yo retounen jwenn lòt disip yo, lè yo rakonte yo sa ki te pase, sa yo te wè ak sa yo te tande, yo kòmanse priye, yo te si tèlman priye ak lafwa kay kote yo te ye a pran tranble. Sa vle di, mesye apot Jezi yo te resevwa fòs Lespri Jezi a, yo te gen kouraj sipòte tout pèsekisyon pou non Jezi. Se sou menm liy sa a Levanjil jodi a ye. Levanjil jodi a, pale nou de yon moun yo rele Nikodèm. Nikodèm se yon mesye ki te fè pati ansyen yo nan peyi Galile, se pou sa li te tann lannuit pou l’ ale kot Jezi paske ansyen yo te kont Jezi. Li te vle pale ak Jezi paske li te santi Jezi ap pale verite; li menm rele l’ mèt, li te rekonèt nan li moun Bondye voye nan lachè a. Yon bagay ki enpòtan nan ansèyman Jezi bay Nikodèm, se menm li menm nan li ba nou jounen jodi a: “Amèn, amèn mwen di ou, si yon moun pa refèt sot nan dlo ak Espri Sen an, li pa kapab antre nan peyi wa Bondye a. Sa k’ fèt sot nan chè a, se chè li ye, sa k’ fèt sot nan Espri a, se espri li ye”. Pawòl sa a Jezi ba nou an pèmèt nou antre nan lespri rezireksyon an. Se sa nou abitye chante nan seremoni batèm nou yo : Mwen batize nan lanmò ak nan leve Jezikri, mwen batize nan lafwa pou mwen fòme Legliz Kris la, mwen batize nan Legliz pou m’ sèvi Jezi temwen, mwen batize nan renmen pou m’ sove tè a. Se nan rezireksyon Jezi a nou tounen fèt nan Lespri Bondye a, nan renmen Papa ak Pitit la.

LAPRIYÈ : Granmèt, mwen di w’ mèsi anpil pou mouri ou mouri e ou leve byen vivan sòti pami mò yo dekwa pou n’ ka jwenn lavi ki p’ap janm fini an. Fè nou aprann konnen kijan ou vle nou aji pou n’ rive jwenn wayòm syèl la. Amèn

PWOPOZISYON : Nan yon moman silans nan fon kè ou, priye Granmèt la pou li ka ba ou kouraj preche pawòl li a menm jan avèk apot yo.