LENDI 5

Koulè Blan

PREMYE LEKTI

«Yo pa t’ kapab reziste sajès la ak Lespri a ki t’ap pale a».

LEKTI TRAVAY APOT YO

6. 8-15

Jou sa yo, Etyèn te plen gras ak fòs, li t’ap fè anpil pwodij ak siy nan pèp la. Gen kèk ki leve, yo te fè pati nan sinagòg sa yo rele Esklav libere yo, Sireneyen yo ak Aleksandren yo, ak sa ki te nan Silisi ak Lazi yo, yo t’ap diskite avèk Etyèn. Yo pa t’ kapab reziste sajès la ak Lespri a ki t’ap pale a. Lè sa a yo voye kèk moun an kachèt pou di yo te tande l’ap di pawòl blasfèm kont Moyiz ak kont Bondye. Konsa yo soulve pèp la ak ansyen yo ak skrib yo, yo fonse ansanm, yo sezi l’, yo kondui l’ nan tribinal la. Yo mete fo-temwen ki di: «Mesye sa a pa sispann pale pawòl kont kote sa a ki sen an ak kont lalwa a. Reyèlman nou tande l’ap di: «Jezi moun Nazarèt sa a ap detwi kote sa a, l’ap chanje abitid Moyiz te transmèt nou yo». Yo tout t’ap gade l’ fiks, yo tout ki te chita nan tribinal la, yo te wè fas li tankou fas yon zanj.

Pawòl Granmèt la.

R/ Mèsi Bondye, mèsi.

SÒM REPONS 118, 23-24. 26-27. 29-30

R/Ala kontantman pou moun k’ap mache nan lalwa Granmèt la.

Oubyen: Alelouya.

Menm si chèf yo chita, y’ap pale kont mwen, sèvitè ou la ap reflechi sou desizyon ou yo.Sèke temwayaj ou yo se plezi m’, desizyon ou yo se konsèy mwen.R.

Mwen deklare chemen m’ yo, ou koute m’; aprann mwen desizyon ou yo. Fè m’ konprann chemen kòmandman ou yo, m’a reflechi sou mèvèy ou yo.R.

Vire chemen manti a lwen m’, ban m’ lalwa ou la avèk bon kè ou.

Mwen chwazi chemen verite a, mwen mete jijman ou yo devan m’.R.

LEVANJIL

«Pa travay pou manje k’ap peri a, men pou sa a k’ap dire pou lavi tout tan an».

MEN BÒN NOUVÈL JEZIKRI A DAPRÈ JAN KI SEN 6, 22 29

Nan landmen foul la, ki te kanpe lòt bò lanmè a, li wè lòt batiman an pa t’ la, se yon sèl ki te la, epi Jezi pa t’ monte sou batiman an avèk disip li yo, men disip li yo te pati pou kont yo, Gen lòt batiman ki te vin rive sot Tiberyad, bò kote yo te manje pen an, lè yo te fin rann Granmèt la gras. Lè foul la wè Jezi pa t’ la ni disip li yo, yo monte nan kannòt yo, yo rive Kafanawòm, y’ap chèche Jezi. Lè yo jwenn li lòt bò lanmè a, yo di l’: «Rabi, ki lè ou rive isit la»? Jezi reponn yo, li di: «Amèn, amèn mwen di nou, si n’ap chèche m’, se pa paske nou te wè mirak, men paske nou te manje nan pen yo epi vant nou te plen. Se pa pou nou travay pou manje k’ap disparèt la, men se pou nou travay pou manje k’ap dire pou lavi tout tan an, sa Pitit moun nan ap ba nou an; li menm Bondye Papa a make ak so l’ la». Yo di l’: «Ki sa pou nou fè pou nou travay travay Bondye yo»? Jezi reponn, li di yo: «Men travay Bondye a, se pou nou kwè nan sa a li voye a».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Aprè Jezi te fin fè gwo mirak miltiplikasyon pen an pou li te bay pakèt foul moun yo manje, anpil moun pa t’ vle lache li yon may paske yo te wè se yon nèg ke yo pa t’ dwe lache yon may! Imajine ki enpòtans sa te genyen pou yo te swiv Jezi, yon nèg ki kapab annik fè yon lapriyè epi tout moun manje vant plen. Jezi te detache patizan li yo ak foul yo, li voye disip yo ale nan yon batiman pou kont yo epi li wete kò li. Gen moun ki t’ap chèche li nan zòn kote li te fè mirak la, lè yo rankontre ak li yo sezi epi yo mande li kijan li fè gen tan rive isit la. Men Jezi ki te konprann sikoloji moun yo, li te di yo se pa paske yo te wè mirak ki fè yo  t’ap chèche li; men se paske yo te manje pen vant deboutonnen! Aprè sa Jezi fè yo yon rekòmandasyon, kote li envite yo travay pou manje k’ap dire pou tout tan an, e manje sa a se Jezi menm ki bay li. Jezi envite yo travay antan yo kwè nan li menm ki se sila Papa konsakre a.

Sen Jan ap prepare nou pou nou resevwa mistè Lekaristi a, ki se yon chemen lafwa. «Men travay Bondye a, se pou nou kwè nan sa a li voye a». Se lafwa ki fè nou makonnen ak mistè Jezi ki pote lavi a. Bondye vizite nou, li dyaloge ak nou, li touche nou, kounye a li vle nou antre nan yon lavi tou nèf, ki se yon lavi nan lanmou. Pou nou viv lavi Kris la, plonje nan lanmò ak rezireksyon li, pou nou viv renmen li an, nou bezwen Lespri Sen an. Lafwa nou jwenn akonplisman li nan Jezikri. Bondye se Renmen ki angaje nou pou tout lavi. Fè tout sa Jezi mande nou, mache sou tras li, swiv li jous nan rezireksyon an, sa mennen nou nan Lapannkòt la. Se Lespri Lapannkot la ki te anime Etyèn ki fè li t’ap fè anpil pwodij ak siy nan pèp la, se menm Lespri sa a ki pou kontinye anime nou jodi a, antan n’ap chèche Pen Vivan ki sot nan syèl la, Jezikri.

LAPRIYÈ: Bondye, ou menm ki montre limyè verite ou la, pou moun ki pèdi wout yo kapab tounen sou chemen an, fè tout moun ki fè deklarasyon lafwa kretyen an rejte sa k’ lènmi non sa a, pou yo kole kò yo sou sa ki kòrèk. Pa pouvwa Jezikri.

PWOPOZISYON: Kisa ki dwe motive mwen swiv Jezi jodi a?