LENDI 30

Koulè Vèt

PREMYE LEKTI

«Yo kraze tèt pòv la sou pousyè tè a».

LEKTI LIV PWOFÈT AMÒS 2, 6-10. 13-16

Men pawòl Granmèt la:

«Poutèt twa krim Izrayèl ak poutèt kat, mwen p’ap padonnen l’: Poutèt li vann moun kòrèk la pou lajan, ak pòv la pou yon pè sapat; yo menm k’ap kraze tèt pòv yo nan pousyè tè a, k’ap devye chemen pòv yo; pitit la ak papa l’ ale kot jèn fi a, pou yo derespekte non m’ ki sen an; sou rad yo pran kòm garanti, yo kouche bò tout lotèl, y’ap bwè diven moun yo fin kondane yo, nan lakay Bondye yo a.

Mwen menm mwen te detwi Amoreyen an devan fas yo, li menm wotè l’ te tankou wotè pye sèd yo, li te gen fòs tankou pye bwa-d-chèn; mwen te kraze fui l’ anwo avèk rasin li anba. Se mwen menm ki te fè nou monte sot nan peyi Lejip la, mwen te kondui nou nan dezè a karantan, pou nou te posede peyi Amoreyen an.

Men m’a pral fè gwo bwi anba nou, tankou yon kabwèt ki plen pay ap fè gwo bwi; moun ki rapid la li p’ap kapab sove, sa k’ fò a p’ap jwenn fòs li, sa k’ vanyan an p’ap sove lavi l’, sa k’ konn tire flèch la p’ap kanpe, sa k’ lejè a p’ap sove ak pye l’, kavalye a p’ap sove lavi l’, sa k’ gen plis kouraj la se ni-kò l’ap sove jou sa a», deklarasyon Granmèt la.

Pawòl Granmèt la.

R/ Mèsi Bondye, mèsi.     

SÒM REPONS 49, 16bc-17. 18-19. 20-21. 22-23

R/ Konprann bagay sa yo, nou menm ki bliye Bondye a.

Poukisa w’ap resite kòmandman m’ yo, w’ap mete testaman m’ nan nan bouch ou? Ou menm poutan ou rayi disiplin, ou rejte pawòl mwen yo dèyè do ou.R.

Si ou wè yon vòlè, ou kouri ansanm avèk li; se avèk adiltè a pòsyon ou ye. Bouch ou, ou te lage l’ bay mechanste, lang ou t’ap plede koze riz.R.

Lè ou chita se kont frè ou w’ap pale, se kont pitit manman ou w’ap di bagay pou avili l’. Se bagay sa yo ou te fè, epi mwen te pe bouch mwen. Ou te konprann mwen te sanble avèk ou: m’ap fè ou eksplikasyon, m’ap drese yo kont fas ou.R.

Konprann bagay sa yo, nou menm ki bliye Bondye a; pou m’ pa sezi, si pa gen pèsònn ki delivre. Moun ki ofri sakrifis lwanj, l’ap fè lwanj mwen, moun ki san tach nan chemen an, m’ap montre l’ delivrans Bondye a.

LEVANJIL

«Suiv mwen»

MEN BÒN NOUVÈL JEZIKRI A MATYE KI SEN 8, 18-22

Lè sa a:

Jezi wè anpil foul alantou l’, li pase lòd pou travèse lòt bò lanmè a. Yon pwofesè pwoche, li di l’: «Mèt, m’ap suiv ou kote ou a prale.»

Jezi di l’: «Rena yo gen twou yo, zwazo syèl yo gen nich yo; Pitit moun nan menm pa gen kote pou l’ poze tèt li».

Youn nan disip li yo di l’: «Granmèt, kite m’ al antere papa m’ anvan». Jezi menm di l’: «Suiv mwen, kite mò yo antere mò pa yo».

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Pou refleksyon nou, nou kapab rete sou tèks levanjil la ki klè sou kondisyon pou nou ka swiv Jezi epi kòman moun k’ap suiv Mèt la gen pou yo viv.

Yon moun ki vle swiv Jezi se yon moun ki vrèman disponib pou li bouje, pou li ale tout kote. Èske nou pare pou nou ale tout kote akoz Jezikri? Si nou ka reponn wi ak kesyon sa a, sa vle di nou pare pou nou swiv Jezi. Si repons nou se non, epi nou di nou se kretyen, sa mande pou nou chache wè ki sa ki anpeche nou pou nou ka ale tout kote pou Jezi.

Disponibilite nou nan swiv Jezi mande pou nou kite paran nou, prewokipasyon nou, menm rive kite lantèman moun nou genyen ki mouri. Èske ou pare pou kite lantèman fanmi ou pou swiv Jezi ?

Lè Jezi di fòk yon moun kite tout bagay pou ka rive swiv li, li vle montre nou se yon bagay ki difisil, ki ekzijan anpil. Sa ki eksplike difikilte ak ekzijans sa a, se paske nou tout renmen konfò nou, alòske swiv Jezi pa garanti nou sa a; nou tout renmen fanmi nou, papa, manman, frè ak sè nou, men Jezi mande pou nou kite yo, epi menm pa ta patisipe nan fineray yo pou nou ka swiv li. Swiv Jezi difisil men li pote kè kontan.

LAPRIYÈ : Granmèt mwen vle swiv ou pou tout lavi mwen. Ede mwen chak jou pou m’ rete fidèl a ou menm. Amèn !

PWOPOZISYON : M’ap ekzamine lavi mwen pou m’ wè kisa ki anpeche mwen swiv Jezi.