VANDREDI 28

Koulè Vèt

PREMYE LEKTI

«Yo jije mò yo daprè aksyon yo. Mwen wè Jerizalèm nouvo a, k’ap desann sot nan syèl la».

LEKTI LIV APOKALIPS APOT JAN KI SEN 20, 1-4. 11-21, 2

Mwen menm, Jan, mwen wè yon mesaje k’ap desann sot nan syèl la, li gen kle bafon an ak gran chenn nan men l’. Li pran dragon an, sèpan lontan an, sa vle di Dyab la ak Satan an, li mare l’ pou mil ane; li voye l’ nan bafon an, li fèmen l’, li poze sele sou li pou l’ pa kontinye twonpe nasyon yo, joustan mil anlè yo fin rive bout yo; aprè sa, yo gen pou yo lage l’ yon ti moman.

Mwen wè twòn, epi sa k’ vin chita sou yo a, yo resevwa pouvwa fè jijman. Epi tou mwen wè ni nam moun yo yo te touye poutèt temwayaj Jezi a ak poutèt pawòl Bondye a, ni sa yo ki pa t’ adore bèt la ak pòtre l’ la, epi ki pa t’ aksepte mak li nan fwon yo oubyen nan men yo; y’ap viv, y’ap kòmande kòm wa avèk Jezikri pou mil ane.

Mwen wè yon twòn ki gran, ki blan, ak yon pèsonaj ki chita sou li; devan fas li tè a ak syèl la sove kò yo, yo pa jwenn plas yo ankò. Mwen wè mò yo, ni gran ni piti, ki kanpe devan fas twòn nan; yo louvri liv yo, yon lòt liv louvri tou, se liv lavi a; yo jije mò yo daprè sa k’ te ekri nan liv yo, daprè aksyon yo. Lanmè a renmèt mò yo ki te nan li a, lanmò a ak kote mò yo te ye a renmèt mò yo ki te nan yo a, yo jije chak moun daprè aksyon l’ yo. Ni kote mò yo te ye a, ni lanmò a, yo lage yo nan letan dife a. Sa a se dezyèm lanmò a. Sa a yo pa jwenn non l’ ekri nan liv lavi a, yo jete l’ nan letan dife a.

Mwen wè yon syèl nouvo ak yon tè nouvo. Premye syèl la ak premye tè a pati, pa gen lanmè ankò.

Mwen menm Jan, mwen wè vil ki sen an, Jerizalèm nouvo a, k’ap desann sot nan syèl la, sot kot Bondye, li abiye fin tankou yon madanm k’ap marye ki met bijou pou mari l’.

Pawòl Granmèt la.

SÒM REPONS 83, 3. 4. 5-6a e 8a (r.: Ap 21, 38)

R/ Men joupa (tant) Bondye a avèk moun yo.

Nam mwen anvi, l’ap deperi pou kay Granmèt la.

Kè m’ ak chè m’ ap danse pou Bondye vivan an.R.

Menm ti zwazo jwenn yon kay pou li, toutrèl la jwenn yon nich, kote li depoze ti pitit li yo: lotèl ou yo, Granmèt lame yo, wa m’ ak Bondye m’.R.

Ala kontantman pou moun ki abite nan kay ou a, pou tout tan y’ap fè lwanj ou. Ala kontantman pou moun ki jwenn sekou l’ nan ou; y’ap mache sot nan mèvèy al nan mèvèy.R.

LEVANJIL

«Lè n’a wè bagay sa yo rive, konnen peyi wa Bondye a tou pre».

MEN BÒN NOUVÈL JEZIKRI A DAPRÈ SEN LIK 21, 29-33

Lè sa a: Jezi di yon parabòl pou disip li yo:

«Gade pye figye a ak tout pye bwa yo: lè yo kòmanse donnen fwi, nou konnen tan cho a tou pre. Konsa tou nou menm, lè n’a wè bagay sa yo rive, konnen peyi wa Bondye a tou pre. Amèn, mwen di nou jenerasyon sa a p’ap pase, joustan tout bagay rive. Syèl la ak tè a ap pase; men pawòl mwen yo p’ap pase».

An nou fè lwanj ak konpliman pou pawòl Bondye a.

REFLEKSYON: Nou kapab apiye nou sou pawòl Bondye a, paske se yon pawòl vivan, yon pawòl ki kapab rete menm si tout bagay pase. Sen Jan, envite nou fikse zye nou pou nou kontanple lespwa yon syèl nouvo ak yon tè nouvo.

Nan pwojeksyon sa a, nan vizyon sa ki deja soulaje kalamite n’ap viv nan syèk nou an, nou gen vokasyon pou nou disène siy tan yo. Frè ak sè m’ yo, nan lavi a gen yon tan pou chak bagay, gen yon tan tristès, yon tan kè kontan; yon tan pou konstwi, yon tan pou detwi; yon tan pou pèdi, yon tan pou genyen; men tou, fòk nou pa bliye  pi bonè se gran maten, pa jan m’ di n’a gen tan; ou wè jodi a men ou pa konn demen, sa nou gen pou n’ fè, se pou n’ fè l’ san nou pa pèdi tan: se pou nou swiv siy tan yo ke Bondye fè nou kado pou ritme lavi nou.

Jezi itilize metòd parabòl trè souvan pou li bay disip li yo lansèyman: nan Levanjil Matye a Jezi prezante nou imaj yon pye figye, kote li envite nou gade pwòp sitiyasyon lavi nou. Mezanmi si nou kapab gade siy tan yo lè nou bezwen regle zafè nou, poukisa nou pa kapab gade siy tan yo tou pou zafè pa Bondye nan Legliz la?

Anpil fwa nou gade lalin nan, e selon jan nou wè li nou kapab devine si lapli ap tonbe, si sezon an ap bon…Konsa tou nou dwe gen zye nou louvri sou sa k’ap pase bò kote nou.

Jodi a nou konstate gen anpil bagay k’ap pase nan lemond, menm bouch nou pa gen pou nou pale yo. Antouka, an nou chache konprann atravè tout sa, ki mesaj Jezi vle pote pou nou.

LAPRIYÈ: Bondye Granmèt, ouvri zye entelijans nou pou nou ka konprann kisa ou vle di nou atravè siy tan n’ap viv la.

PWOPOZISYON: Chache dekouvri yon mesaj atravè yon siy, yon jès, yon pawòl. Pote yon mesaj renmen atravè yon siy, yon jès oubyen yon pawòl.