JEDI 15

Koulè Vèt

PREMYE LEKTI

«Se pou nou ankouraje nou toutotan yo kapab di ‘Jodi a’».

LKETI LÈT POU EBRE YO 3, 7-14

Frè m’ yo :

Jan Espri Sen an di a: «Jodi a, si nou tande vwa l’, pa fèmen kè nou, tankou nan revòlt la, daprè jou yo te tante m’ nan dezè, kote papa nou yo te tante m’ nan, yo te tante m’ epi yo te wè travay mwen pandan karantan; poutèt sa jenerasyon sa a eksite m’, mwen di: «Tout tan yo gen kè yo k’ap pran chemen kwochi, konsa yo pa rekonèt chemen m’ yo»; jan mwen fè sèman nan kòlè m’ nan: «Yo pa gen dwa antre nan repo m’ nan».

Gade, frè m’ yo, pou pa gen yon kè ki move nan pami nou, ki pa gen lafwa, ki vire do bay Bondye vivan an ; men se pou nou ankouraje tèt nou, chak jou, toutotan yo kapab di «Jodi a», pou pèsòn nan nou pa fèmen kè l’avèk manti peche a.

Sèke nou vin patisipe nan Jezikri, si sèlman nou kenbe premye ansèyman l’ nan fèm jouskalafen.

Pawòl Granmèt la.

SÒM REPONS Ps 94, 6-7. 8-9. 10-11 (r.: 8)

R/ Si jodi a nou te kapab koute vwa Granmèt la : «Pa fèmen kè nou».

Vini, an nou adore l’, an nou bese atè, an nou ajenou devan Granmèt la ki fè nou an,

paske se li menm ki Bondye nou, nou se pèp pak li ak mouton men l’.R.

Si jodi a nou te kapab tande vwa l’: «Pa fèmen kè nou,  tankou nan Meriba, daprè jou Masa nan dezè a, 

Kote papa nou yo te tante m’ nan ; yo te chèche m’ kont, malgre yo te wè travay mwen yo».R.

LEVANJIL

«Lèp la pati sot sou li, li vin geri»

MEN BÒN NOUVÈL JEZIKRI A DAPRÈ SEN MAK 1,40 -45

Lè sa a :

Yon lepre vin kot Jezi, li priye l’, li met ajenou, li di l’: «Si ou vle, ou kapab pwòpte m’». Jezi menm pran pitye pou li, li lonje men l’, li touche l’, li di l’: «Mwen vle, se pou ou pwòpte». Kon l’ di sa, menm lè a lèp la pati kite l’, li pwòpte.

Li menase l’ menm lè a li ranvwaye l’ sèk; li di l’: «Gade, pa di pèsòn sa; men ale, fè chèf prèt yo wè ou, ofri pou gerizon w’ nan, sa Moyiz te kòmande a, kòm temwayaj pou yo».

Men li menm menm li pati, li kòmanse deklare bagay la, li gaye nouvèl la, atèl pwen li pa t’ kapab parèt aklè pou l’ antre nan yon vil. Men se deyò nan kote dezè yo li te rete, yo te sot tout kote pou yo vin jwenn li.

An nou fè lwanj ak konpliman pou pawòl Bondye a.

REFLEKSYON: Jodi a, nan premye lekti a, nou li «jodi a, si nou tande vwa Granmèt la, pa fèmen kè nou!» (Eb.3,7-8).

E nou repete sa avèk ensistans nan repons nou bay Sòm 94 la. Nan sitasyon sa, nou ka souliye de bagay: yon dezi avèk yon avètisman. Nou pa dwe janm bliye ni youn ni lòt.

Nan tan nou konsakre chak jou nan lapriyè, nou swete e nou mande pou nou koute vwa Granmèt la. Men petèt anpil fwa nou plis vle Bondye koute nou olye nou koute li. Nou pran tan pou nou di tout pawòl ki nan kè nou, men nou pa pran yon minit pou nou koute sa l’ap di nou. Konsa, li enpòtan pou nou aprann fè silans nan kè nou, antan nou evite tout distraksyon lè nou konsantre pou nou louvri kè nou pou nou akeyi afeksyon ak renmen Granmèt la nan fon kè nou.

Nou dwe pran anpil prekosyon pou kè nou pa fin tounen wòch, pou kè nou pa vin di. Pafwa difikilte lavi a ka fè nou tounen yon ki gen kè di, yon moun ki desespere e ki wè tout bagay mal devan zye li. E sa ka menm rive san nou pa rann nou kont. Nou dwe mande Granmèt la pou li fè nou pran konsyans de tout danje sa yo. Lapriyè se okazyon pou nou gade lavi nou ak tout sikonstans ki anviwonnen li. Nou dwe fè lekti evènman yo atravè limyè Levanjil la, pou nou rive dekouvri nan ki aspè nou bezwen konvèti tout bon vre, kisa dwe chanje nan lavi nou.

Si nou te kapab mande yon konvèsyon avèk menm lafwa ak menm konfyans lepre a ki te prezante devan Jezi a, lè li te mete ajenou pou li a: «Si ou vle, ou kapab pwòpte m’» (Mk. 1,40). Se Jezi sèl ki ka rann posib tout sa ki parèt enposib pou nou. Ann kite lagras Bondye aji nan lavi nou pou kè nou kapab pwòpte epi, antan nou fè nou tou piti nan men li, pou kè nou kapab vin sanble chak jou pi plis ak kè Jezi. Li menm menm li di nou avèk konfyans: « Mwen vle, se pou ou pwòpte» (Mk.1, 41).

LAPRIYÈ: Jezi Granmèt, mwen gen anpil lèp k’ap wonje kè mwen ak konsyans mwen, tankou rayisans, jalouzi, adiltè, tanpri geri mwen, pwòte kè mwen.

PWOPOZISYON:Dekouvri nan lavi mwen ki lèp ki fè mwen pa ka viv trankil.