MÈKREDI 14

Koulè Vèt

PREMYE LEKTI

«Li te gen pou l’ sanble ak frè yo nan tout bagay, pou l’ te kapab pran pitye pou yo»

LEKTI LÈT POU EBRE YO 2, 14-18

Paske pitit yo te kominike nan chè a ak san an, Jezi li menm tou te vle patisipe nan yo, pou, gras a lanmò a, li te kapab detwi sa a ki te gen pouvwa lanmò a, sa vle di dyab la; pou l’ te kapab delivre sila yo ki t’ap pase tray pandan tout lavi a poutèt esklavaj kè sote lanmò a.

Se pa zanj yo li vin pote sekou, men se ras Abraam nan li vin pote sekou. Se pousa li te gen pou l’ sanble ak frè yo nan tout bagay, pou l’ te kapab pran pitye pou yo, pou l’ te kapab vin tounen yon prèt an chèf ki fidèl kot Bondye, pou l’ te kapab padonnen fot pèp la.

Kòm li menm li soufri, li kite yo tante l’, li gen pouvwa pou l’ soutni sa yo y’ap tante a.

Pawòl Granmèt la.

SÒM REPONS 104, 1-2. 3-4. 6-7. 8-9 (r. : 8a)

R/ Granmèt la sonje alyans la pou tout tan.

Fè lwanj Granmèt la, rele non l’, anonse travay li nan pami nasyon yo. Chante pou li, jwe mizik pou li, kalkile sou tout mèvèy li yo.R.

Fè lwanj non l’ ki sen an, se pou kè moun yo k’ap chèche Granmèt la kontan. Chèche Granmèt la ak pouvwa l’, chèche fas li tout tan.

Ras Abraam, sèvitè l’, pitit Jakòb, sa a li chwazi a. Se li menm Granmèt Bondye nou ; sou tout tè a jijman l’ yo.R.

Li sonje alyans li a tout tan, pawòl li te kòmande bay mil jenerasyon yo, sa l’ te pase avèk Abraam nan, sèman li te fè bay Izaak la.R.

LEVANJIL

«Li geri anpil moun ki t’ap soufri ak divès maladi».

MEN BÒN NOUVÈL JEZIKRI A DAPRÈ SEN MAK 1, 29- 39

Lè sa a :

Pandan Jezi ap sòti nan sinagòg la, li rive nan kay Simon ak Andre avèk Jak ak Jan. Bèlmè Simon an te kouche avèk lafyèv, menm lè a yo pale l’osijè l’. Li pwoche, li soulve l’, li kenbe men l’; menm lè a lafyèv la pati, epi li t’ap sèvi yo.

Lè aswè rive, pandan solèy la t’ap kouche, yo mennen tout moun ki malad ba li, ni moun ki gen demon ; tout vil la te rasanble devan pòt la. Li geri anpil moun ki t’ap soufri avèk divès maladi, li chase anpil demon ; li pa t’ kite yo pale, paske yo te konnen l’.

Granmaten, li leve, li sòti, 1’al nan yon kote ki dezè, epi li t’ap priye la. Simon menm rapousuiv li, ni moun ki te avèk li yo; lè yo jwenn li, yo di l’: «Se tout moun k’ap chèche ou». Li di yo : «An al nan bouk yo ki tou pre yo ak nan vil yo, pou nou preche la ; se pou sa menm mwen vini. Li t’ap preche nan sinagòg yo, ak nan tout Galile a, li t’ap chase demon yo.

An nou fè lwanj ak konpliman pou pawòl Bondye a.

REFLEKSYON : Yè, se avèk anpil etònman direktè lalwa yo t’ap gade kijan Jezi t’ap libere yon nèg anba pouvwa move lespri. Jezi t’ap kòmande move lespri yo e yo te koute li.

Jodi a ankò nou wè Jezi ki kontinye ap pote gerizon, jodi a, se jou delivrans bèlmè Simon an ki te gen yon gwo lafyèv sou li. Jezi geri li.

Bon, nan kilti pa nou, nou pa konsidere lafyèv la kòm yon gwo maladi, paske lè yon moun gen yon ti lafyèv nou panse se pa twò grav, si li pran ti te, ti aspirin ebyen li kapab leve touswit. Men sa depan tou de kisa ki koz lafyèv la. De tout fason nou pa konnen ki kalite lafyèv bèlmè Simon te genyen, sepandan Jezi geri li. Ebyen nou menm tou, tout ti jès nou kapab fè ak yon moun ki nan bezwen, sa gen anpil konsiderasyon nan je Bondye.

Madanm nan te kouche, li pat leve, Jezi te we li te merite sa. Li bal men li fè l’ leve.

Jezi te geri anpil lot malad ankò, moun ki te gen move lespri, men li pa t’ kite yo pale paske yo te gentan konn kilès moun li ye. Nou toujou di kote bon lespri a ye, move lespri a pa kanpe. Kote ki gen limyè pa ka gen fènwa.

Ebyen Jezi vini pou li disparèt tout fènwa ki te anvayi moun nan, fènwa ki te fè li kwoupi pou li pa t’ ka mache, fènwa ki te fè li esklav pwòp pasyon ak lanvi li.

Depi limyè a parèt li chase fènwa a.Depi solèy la parèt ebyen li gen tan jou.

Nou menm ki se disip misyonè Jezikri, kisa nou vo pou lòt yo ? Ki sa nou sèvi pou lòt yo ? Plis fènwa ? Yon reyon limyè ? Ki sa nou pote ? Renmen oubyen rayisans ? Benediksyon oubyen madichon ? Kè kontan oubyen tristès ? Amitiye oubyen ipokrizi ? …Ann nou reflechi byen sou sa.

Gen yon bagay nou pa kapab inyore : Jezi te fèt, li te viv tankou nou ; li te soufri ak enfliyans sosyete a, li te viv anba lalwa tankou nou menm. Men sa pa t’anpeche li te fè travay Papa, sa pa t’anpeche li te viv tankou limyè pou sa ki te nan fènwa yo. Se sa ki te pèmèt li pote laviktwa sou tout fòs fènwa ak lanmò. Si nou imite Jezi nan lavi nou, ebyen nou menm tou, nou va chavire tout fòs lanmò, pou nou antre nan piyay lavi ki p’ap janm fini an.

LAPRIYÈ : Bondye Granmèt, souple, ba nou fòs ak kouraj pou n’ ka rive dekouvri misyon nou sou tè a, pou nou ka fè disparèt tout fènwa ki nan antouraj nou, gras a reyònman limyè Kris la.

PWOPOZISYON : Priye ak yon moun ki gen move lespri pou, envoke Lespri Sen an pou li kapab chase li. Oubyen priye pou yon moun ou konnen ki pa kontwole emosyon li, pou li ka gen plis sajès.