DIMANCH 29

Koulè Wouj

DIMANCH RAMO

PREMYE MOSO LABIB

“Mwen pa kache fas mwen bay moun yo k’ap maltrete m’ yo, men mwen konnen mwen p’ap wont”.

NAN LIV PWOFÈT IZAYI 50, 4-7

Granmèt la ban m’ yon lang ki gen konesans, pou m’ kapab soutni moun ki bouke pale a. Depi granmaten, li reveye, granmaten li reveye zòrèy mwen, pou m’ koute tankou se yon mèt k’ap pale. Granmèt Bondye louvri zòrèy mwen.

Mwen menm mwen pa fè rebèl ; mwen pa rekile dèyè. Mwen renmèt kò m’ bay moun yo k’ap frape m’ nan, mwen renmèt figi m’ bay moun yo k’ap mete vwal sou mwen an ; mwen pa kache fas mwen bay moun yo k’ap maltrete m’ nan, k’ap krache sou mwen an.

Granmèt Bondye a ap pote m’ sekou, se pousa mwen pa wont. Se pousa mwen fè fas mwen tankou wòch ki pi di a, mwen konnen mwen p’ap wont.

Pawòl Granmèt la.

SÒM 21 8-9. 17-18a. 19-20. 23-24

R/ Bondye, Bondye mwen, pouki sa ou lage m’?

Tout moun ki wè m’ yo pase m’ nan jwèt; yo tire lang, yo souke tèt:

“Li te espere nan Granmèt la, se pou l’ delivre l’; se pou l’ sove l’, paske li renmen l”.R.

Sèke anpil chyen sènen m’, yon bann moun mechan fè laviwonn mwen. Yo pèse men m’ ak pye m’, yo konte tout zo mwen yo.R.

Yo separe rad mwen yo antre yo, yo tire manto m’ nan osò. Ou menm, Granmèt, pa ret lwen, fòs mwen, fè vit vin ede mwen.R.

M’ap rakonte non ou bay frè mwen yo, nan mitan Legliz la m’ap fè lwanj ou. Nou menm ki respekte Granmèt la, se pou nou fè lwanj li,

tout ras Jakòb, deklare glwa li, se pou tout ras Izrayèl respekte l’.R.

DEZYÈM MOSO LABIB

“Li rabese tèt li: se pousa Bondye leve l’ anlè”.

NAN LÈT APOT PÒL KI SEN, POU FILIPYEN YO         2, 6-l1

Jezikri, malgre se sa Bondye ye a li ye, li pa konsidere ret egal ak Bondye a tankou yon bagay pou l’ kenbe pou li sèl, men li fè pwòp tèt li vin pa anyen, antan li pran nati esklav, li vin sanble ak lèzòm, yo rekonèt li tankou moun. Li rabese tèt li, antan li obeyi jous nan lanmò, epi lanmò lakwa.

Se pousa Bondye leve l’ anlè, li ba l’ yon non ki anlè tout non, pou o non Jezi sa a, tout jenou bese nan syèl, sou tè, ak anba tè, epi tout lang deklare Jezikri se Granmèt, nan glwa Bondye Papa a.

Pawòl Granmèt la.

SOUFRANS GRANMÈT NOU JEZIKRI DAPRÈ MAK KI SEN 14,1-15,47

"Yo t’ap chèche kijan pou yo kenbe Jezi an trèt pou yo touye li".

Se te Pak la avèk Azim yo aprè de jou; chèf prèt yo ak pwofesè yo t’ap chèche kijan pou yo sezi Jezi an trèt pou yo touye l’. Men yo t’ap di: "Pa nan jou fèt la, pou pa gen dezòd nan pèp la".

"Li anbome kò m’ davans pou lantèman an".

Pandan l’ te Betani, kay Simon, leper a, li te atab, yon madanm rive avèk yon boutèy losyon kalite siperyè ki vann byen chè, li kase boutèy la, li vide sou tèt li. Kèk moun te revòlte, yo t’ap pale antre yo, yo t’ap di: "Pouki gaspiyaj sa a fèt pou losyon an? Yo ta kapab vann losyon sa a plis pase twasan pyès lajan pou yo bay pòv yo". Yo t’ap pale l’ mal.

Jezi menm di: "Kite l’ trankil. Pouki sa n’ap trakase l’ la? Se yon bon aksyon li fè pou mwen. N’ap toujou gen pòv avèk nou, epi, lè n’a vle, n’a kapab fè yo dibyen; men mwen menm se pa tout tan n’ap genyen m’. Se sa l’ kapab li fè: li anbome kò m’ davans pou lantèman an. An verite mwen di nou, tout kote y’ap preche bòn nouvèl sa a sou tout tè a, y’ap rakonte tout sa l’ fè a pou fè sonje l’.

"Yo pwomèt Jida Iskaryòt pou yo ba l’ lajan".

Jida Iskaryòt, youn nan douz yo, al jwenn chèf prèt yo, pou l’ renmèt li ba yo. Lè yo tande sa, yo kontan epi yo pwomèt li y’ap ba l’ lajan. Li t’ap chèche kijan li t’ap bay li nan yon bon okazyon.

"Kote sal a manje m’ nan, kote pou m’ manje Pak la avèk disip mwen yo"?

Premye jou Azim yo, lè yo t’ap sakrifye Pak la, disip yo di l’: "Kote ou vle pou n’ al pare pou ou pou ou manje Pak la"?

Li voye de nan disip li yo, li di yo: "Ale nan vil la, yon mesye ap rankontre nou, l’ap pote yon krich dlo, suiv li, epi kote l’ antre a, di mèt kay la; Mèt la di: «Kote sal a manje m’ nan, kote pou m’ manje Pak la ansanm ak disip mwen yo»? L’a montre nou yon gran sal nan chanmòt la ki tou pare; se la n’a pare pou nou”

Disip yo ale, yo rive nan vil la, yo jwenn jan l’ te di a, yo pare Pak la.

"Youn nan nou ap trayi m’, sa k’ap manje avèk mwen an".

Lè aswè rive, li rive ansanm avèk douz yo. Pandan yo kouche, y’ap manje, Jezi di: "Amèn, mouin di nou, youn nan nou ap trayi m’, youn k’ap manje ansanm avèk mwen".

Yo kòmanse vin tris, yo chak pran di l’: "Èske se mwen"?

Li di yo? "Youn nan douz yo, k’ap tranpe pen ansanm avèk mwen nan plat la. Pitit moun nan ap pati, jan sa ekri sou li a men ala malè pou moun sa a ki renmèt Pitit moun nan! Li ta pi bon pou li, si moun sa a pa t’ janm fèt".

"Sa a se Kò mwen, sa a se San mwen, san nouvo alyans la".

Pandan y’ap manje, Jezi pran pen, li beni l’, li kase l’, li ba yo, li di: "Pran, sa a se kò mwen". Li pran kalis la, li di mèsi, li ba yo, yo tout yo bwè nan li. Li di yo: Sa a se San mwen, san nouvo alyans la, ki vide pou tout pakèt moun yo. Amèn, mwen di nou, mwen p’ap bwè nan fwi pye rezen sa a ankò jous nan jou sa a kote m’ap bwè l’ tou nouvo nan peyi-wa Bondye a".

"Anvan kòk la chante de fwa, w’ap gen tan nye m’ twa fwa".

Lè yo fin chante kantik pou di Bondye mèsi a, yo sòti, y’al sou mòn pye Oliv yo.

Jezi di: "Nou tout n’ap skandalize poutèt mwen nan nuit sa a menm, paske men sa ki ekri: «M’ap frape gadyen an, mouton yo ap gaye. Men, lè m’ap fin resisite, m’ap pran devan nou nan Galile».

Pyè menm di l’: "Menm si tout moun skandalize poutèt ou, se pa mwen menm".

Jezi di l’: "Amèn, mwen di ou, jodi a menm, nan nuit sa a menm, anvan kòk la chante de fwa, w’ap gen tan nye m’ twa fwa.

Li menm menm li t’ap deklare pi rèd: "Menm si m’ dwe mouri ansanm avèk ou, mwen p’ap nye ou". Yo tout t’ap di menm jan.

"Li kòmanse sezi, kè l’ sere".

Yo rive nan yon jaden yo rele Jetsemani, Li di disip li yo: "Rete isit la pandan m’ap lapriyè". Li pran Pyè ak Jak ansanm avèk Jan avèk li, li kòmanse sezi, kè l’ sere. Li di yo:   Nam mwen tris jous pou m’ mouri: rete isit la, veye".

Li avanse yon ti kras, li lage kò l’ atè a, l’ap mande si sa kapab fèt, pou lè sa a pase lwen l’, li di: "Aba, Papa, tout bagay posib pou ou, fè kalis sa a pase lwen m’; sèlman se pa jan m’ vle, se jan ou vle".

Li rive, li jwenn yo ap dòmi. Li di Pyè: "Simon, w’ap dòmi? Ou pa kapab veye inèd-tan? Veye, lapriyè, pou nou pa antre nan tantasyon. Lespri a rapid, se vre, men chè a fèb".

L’ale ankò, li lapriyè, li di menm pawòl la. Li tounen ankò, li jwenn yo ap dòmi; je yo te lou, yo pa t’ konnen ki sa pou yo te reponn li.

"Kenbe l’, mennen l’ anba kòd".

Pandan y’ap pale toujou, Jida Iskaryòt la rive, youn nan douz yo, te gen anpil foul avèk li avèk epe ak baton, se prèt yo ak pwofesè yo ak ansyen yo ki te voye yo. Sa a ki te trayi l’ la te ba yo siy sa a, li te di: "Sa a m’ap bo a, se li menm, kenbe l’, mennen l’ antan nou siveye l’ byen".

Lè yo rive, menm lè a li pwoche kote l’, li di: "Sali, Rabi"; li bo l’. Yo met men sou li, yo kenbe l’. Youn nan sa k’ te kote l’ yo rale epe l’, li frape sèvitè gran prèt la, li koupe ti bout zòrèy li.

Jezi pran lapawòl, li di yo: "Se tankou pou yon vòlè, nou sòti ak epe ak baton pou nou kenbe m’. Chak jou mwen te lakay nou nan Tanp la, mwen t’ap bay ansèyman epi nou pa t’ kenbe m’; men se pou sa k’ ekri yo te kapab akonpli. Lè sa a disip li yo kite l’, yo tout sove kò yo.

Te gen yon ti gason ki t’ap suiv li, li te abiye ak yon dra sou kò l’ touni; yo kenbe l’. Li menm, li kite dra a, li sove kò l’ touni.

"Èske ou se Kris la, Pitit Bondye ki beni an"?

Yo kondui Jezi bay chèf prèt la, yo rasanble tout prèt yo ak skrib yo ak ansyen yo. Pyè menm t’ap suiv de lwen, jous anndan an, nan lakou gran prèt la, li chita avèk sèvitè yo bò dife a l’ap chofe kò l’.

Gran prèt yo menm ansanm ak tout manb yo ki te rasanble yo, yo t’ap chèche yon temwayaj kont Jezi, pou yo kondane l’ amò, men yo pa t’ jwenn. Anpil fo-temwen t’ap fè depozisyon kont li, men temwayaj yo pa t’ akòde. Gen kèk fo-temwen ki leve, yo depoze kont li, yo di: "Nou te tande l’ di: «M’ap detwi Tanp sa a ki fèt ak men moun nan, epi nan twa jou m’ap bati yon lòt ki pa fèt ak men moun». Men temwayaj yo a pa t’ konkòde.

Gran prèt la leve nan mitan, li poze Jezi kesyon, li di: "Ou pa reponn anyen nan akizasyon yo depoze kont ou yo"? Li menm li pe bouch li, li pa reponn anyen. Gran prèt la poze l’ kesyon ankò, li di l’: «Èske ou se Kris la, Pitit Bondye ki beni an»?

Jezi menm di l’: "Se mwen menm; epi n’ap wè Pitit moun nan ki chita adwat pouvwa Bondye a k’ap vini ansanm ak nyaj yo nan syèl la".

Gran prèt la chire rad li, li di: "Sa nou bezwen temwen ankò? Nou tande blasfèm nan; sa nou di nan sa"? Yo tout yo kondane l’, yo di li merite lanmò.

Kèkzen kòmanse krache sou li, yo vwale fas li, yo ba l’ souflèt, yo di l’: "Pwofetize". Epi sèvitè yo t’ap frape l’ avèk kou.

"Mwen pa rekonèt moun sa a w’ap pale a".

Pandan Pyè te anba a nan lakou a, gen yon moun nan sèvitè gran prèt yo ki rive, li wè Pyè k’ap chofe kò l’, li gade l’ depi anwo jous anba, li di: "Ou menm tou, ou te avèk Jezi moun Nazarèt la".

Pyè menm nye, li di: "Mwen pa konnen ni mwen pa konprann sa ou vle di a". L’ale deyò devan lakou a, epi kòk la chante.

Aprè sa, sèvant la wè l’ ankò, li kòmanse di moun yo ki te kanpe toutotou yo, li te nan pami yo. Li menm menm li nye ankò.

Aprè yon ti moman ankò moun yo ki te kanpe bò kot Pyè a, yo di l’: "Se vre, ou se youn nan yo, laprèv, ou se Galileyen tou.

Li menm li kòmanse rele madichon sou li, li fè sèman: "Mwen pa rekonèt moun sa a n’ap pale a". Menm lè a kòk la chante ankò. Pyè menm sonje pawòl Jezi te di l’ la: "Anvan kòk la chante de fwa, w’ap nye m’ twa fwa". Li pran kriye.

"Èske nou vle mwen lage wa Juif yo"?

Granmaten, gran prèt yo avèk ansyen yo ak skrib yo ak tout Sanedren an yo rasanble, yo mare Jezi, yo kondui l’, yo renmèt li bay Pilat. Pilat poze Jezi kesyon: "Èske ou se wa Juif yo"?

Li menm li pran lapawòl, li di l’: "Ou di l’". Gran prèt yo akize l’ sou anpil pwen.

Pilat menm rekòmanse poze l’ kesyon, ki di: "Ou pa reponn anyen? Gade sou konbyen pwen y’ap akize ou". Jezi menm pa reponn anyen menm ankò, atèl pwen Pilat te sezi.

Pou jou fèt la, li te konn abitye lage youn nan prizonye yo ba yo, sa yo te konn mande a. Te gen youn yo te rele Barabas, yo te arete l’ ansanm avèk moun ki revòlte yo, pandan revòlt la li te fè yon krim. Lè foul la monte, li kòmanse mande, jan l’ te konn fè pou yo a. Pilat menm reponn yo, li di: "Èske nou vle pou m’ lage wa Juif yo ba nou"? Li te konnen reyèlman se poutèt jalouzi gran prèt yo te bay li. Gran prèt yo menm eksite foul la, pou l’ fè lage Barabas pito ba yo.

Pilat pran lapawòl ankò, li di yo: "Ki sa nou vle pou m’ fè avèk wa Juif yo"?

Yo menm yo rele byen fò: "Kloure l’ sou kwa".

Pilat menm di yo: "Ki sa l’ fè ki mal"?

Yo menm yo rele pi fò toujou: "KIoure l’ sou kwa".

Pilat deside bay pèp la satisfaksyon, li lage Barabas ba yo, li renmèt Jezi pou yo bat li epi pou yo kloure l’ sou kwa.

"Yo poze kouwòn très pikan sou li".

Sòlda yo menm kondui l’ nan lakou prefè a, yo asanble tout foul sòlda yo. Yo abiye l’ ak yon rad wouj, yo poze yon kouwòn très pikan sou li. Yo kòmanse salye l’: "Sali, wa Juif yo". Yo frape tèt li ak yon wozo, yo krache sou li, yo ajenou devan l’ pou adore l’.

Lè yo fin pase l’ nan jwèt, yo dezabiye l’ ak rad wouj la, yo abiye l’ ak pwòp rad pa l’; yo kondui l’ pou yo kloure l’ sou kwa.

"Yo kondui l’ yon kote yo rele Golgota".

Yo poze men sou yon moun ki t’ap pase, pou l’ pote kwa l’ la, yo te rele l’ Simon, moun Sirèn, li te vin sot nan jaden, se papa Aleksann ak Rufus. Yo kondui Jezi jous nan plas Golgota a, sa vle di plas anlè tèt la.

"Yo mete l’ ansanm ak pechè yo".

Yo ba l’ bwè lami mele ak diven, li pa pran l’. Moun ki te kloure l’ sou kwa a, yo separe rad li yo, yo jwe zo sou yo, pou yo wè sa chak moun ap jwenn. Se te twazyèm è a, yo kloure l’ sou kwa. Rezon kondanasyon l’ nan te ekri: "Wa Juif yo". Yo te kloure de asasen ansanm avèk li sou kwa, youn adwat epi yon lòt agoch li. Epi sa k’ ekri a te akonpli, sa k’ di a: "yo mete pòsyon pa l’ ansanm ak moun peche yo".

"Li sove dòt, li pa kapab sove pwòp tèt li".

Moun ki t’ap pase yo, yo t’ap blasfeme l’, yo t’ap di: "Ebyen, ou menm k’ap kraze Tanp la pou ou rebati l’ nan twa jou a, se pou ou sove pwòp tèt ou, desann sot sou kwa a".

Konsa tou gran prèt yo t’ap pase l’ nan jwèt antre yo, ansanm ak skrib yo, yo t’ap di: "Li sove dòt, li pa kapab sove pwòp tèt pa l’. Kris, wa Izrayèl la, se pou l’ desann koulye a sot sou kwa a, pou nou wè, pou nou kwè". Moun yo ki te kloure sou kwa a ansanm avèk li a yo menm tou yo t’ap joure l’.

"Jezi pouse yon gran rèl, li rann souf li".

Lè sizyèm è a rive, fènwa rive sou tout tè a jous nevyèm è a. Nan nevyèm è a, Jezi pouse yon gran rèl, li di: "Eloyi, Eloyi, lama sabaktani"?  sa vle di: "Bondye mwen, Bondye mwen, pouki sa ou lage m’ nan"?

Kèk nan sa k’ te kanpe la a, yo tande, yo di: "Gade, l’ap rele Eli". Youn nan yo kouri, li plen yon eponj ak vinèg, li mete l’ nan pwent yon wozo, li ba l’ bwè, li di: "kite, n’ap wè si Eli ap vin pou l’ desann li".

Jezi menm, lage yon gran rèl, li rann souf li.

(Isit la, yo fè jenifleksyon, yo rete yon ti moman an silans).

Vwal Tanp la chire an de, depi anwo jous anba. Lè santiryon an wè sa, li menm ki te kanpe an fas la, kijan l’ rele byen fò, epi li rann souf li a, li di: "Vrèman mesye sa a se Pitit Bondye li te ye". Te gen medam ki t’ap gade de lwen, nan pami yo te gen Mari Madlèn, ak Mari manman ti Jak ak Jozèf, ak Salome, lè yo te nan Galile, yo te konn ap suiv li, yo te konn okipe l’, te gen anpil dòt medam tou ki te monte ansanm avèk li Jerizalèm.

"Jozèf woule wòch la sou bouch kavo a".

Kòm aswè te deja rive, se te pou preparasyon an, lavèy saba a, Jozèf moun Arimati a rive, se te yon moun ki gen konsiderasyon, li te fè pati konsèy la; li menm tou li t’ap tann peyi Wa Bondye a, li antre kot Pilat avèk asirans, li mande kò Jezi. Pilat menm sezi pou Jezi ta mouri deja, li fè rele santiryon an, li mande l’ si Jezi te mouri deja. Lè santiryon an fè l’ konnen sa, li renmèt Jozèf kò a. Jozèf menm achte yon dra, li desann li, li vlope l’ nan dra a, li poze l’ nan kavo a, ki te fouye nan wòch la, li woule yon wòch sou bouch kavo a. Mari Madlèn menm ak Mari manman Jozèf t’ap gade kote yo te depoze l’.

An nou fè lwanj ak konpliman pou pawòl Bondye a.

REFLEKSYON : Frè ak sè m’ yo, nou kòmanse yon gran mach lafwa depi mèkredi sann nan, kote n’antre nan gwo tan preparasyon sa a, gwo tan konvèsyon sa a nou rele Karèm nan. Dimanch Ramo a ak Lapasyon an, vin ede n’ dekouvri kòman chemen liberasyon an se chemen lakwa a; dimanch Ramo ak istwa soufrans Granmèt la vin fè n’ dekouvri kòman pa gen Dimanch Pak la si n’ pa pase nan vandredi sen an, p’ap gen dimanch kè kontan an si pa gen vandredi soufrans lan.

Nan lavi nou chak, nou gen bezwen kòm kretyen pou nou swiv menm chemen sa a Jezi Sovè nou an te pran an. Chemen soufrans sa a, se chemen laverite a, se chemen lajistis la, se chemen kè poze a, se chemen renmen an. Pa gen okenn jès renmen ki pa mache ak sakrifis la. Nou kapab pran an ekzanp sakrifis paran yo pou pitit yo. Tout bouske y’ap bouske lavi a, nan tout kalite travay, se pou yo kapab kenbe lavi kay yo byen dyanm, lavi pitit yo byen dyanm.

Tout soufrans Jezi te aksepte pran, tout imilyasyon yo, se pou li te kapab rive bay limanite bon jan ekzanp solid pou montre kòman youn dwe devwe pou lòt, kòman youn dwe mete yo nan sèvis lòt pou tout moun kapab viv kòm sa dwa.

Pou travay sa a kapab rive fèt bò kote pa nou kretyen, fòk nou aksepte sa Bondye vle pou nou, fòk nou pa pè soufrans la, fòk nou pa pè pran chemen sèvis la, espesyalman sa k’ nan nesesite yo, chemen mache ak moun ki pi pòv yo, defann sa y’ap toupizi nan kominote n’ap viv la, non sèlman ak pawòl nou men tou ak bon jan temwanyaj n’ap bay nan fason n’ap viv.

Pwofèt Izayi te di nou, Granmèt la mete konesans nan li menm pou l’ sèvi sila ki meprize yo, sa k’ san vwa yo. Pou n’ rive fè travay lamisyon an se pou n’ chèche mete n’ an disponiblite pou Bondye, kite pawòl li yo ap ekzanp li yo gen enpak nan lavi nou, di nou kichòy nan sosyete n’ap viv jounen jodi a. Mete zorèy nou disponib pou n’ koute Bondye; se pou nou dispoze kè nou pou n’ chache fè sèlman sa ki fè l’ plezi, pou n’ mete n’ nan sèvis liberasyon pèp la tankou Jezi ki pa t’ vin fè wè, men ki te ofri tèt li nèt ale jous li bay lavi li sou kwa a, pou l’ te kite temwanyaj renmen Papa a pou limanite.

Nan tout demach lafwa n’ap fè chak jou nan lavi n’ nan travay nou, nan pataj nou yo, nan lapriyè nou yo, nou dwe lage n’ tankou yon timoun nan bra Granmèt la, li menm ki gen solisyon ak tout pwoblèm nou yo, li menm ki se fòs nou, li menm ki se lwanj nou, laviktwa nou an.

Dezyèm moso Labib la montre n’ ki kalite imilite Pitit Bondye a te genyen, li menm ki Bondye, li fè l’ tou piti; li menm ki jij li konsidere tèt li tankou prizonye nan men pechè yo, men se nan rabèsman sa a li jwenn favè ak konsiderasyon nan men Papa l’, li menm ki konnen papa l’ p’ap abandone l’, li menm ki konnen limyè a ap gen dènye mo a sou fènwa a. Se kalite konviksyon sa a nou dwe genyen pou n’ kapab pa fè bak nan misyon an, pou n’ toujou rete fèm nan laverite, nan renmen, nan jistis, nan tout bon zèv, menm lè n’ rankontre pèsekisyon devan lèzòm, paske laviktwa final la se pou nou. Deja nou dwe di tankou sen Pòl: “Mwen konnen nan ki moun mwen met lafwa mwen”!

Mèvèy leve byen vivan Jezi a nou pral selebre dimanch Pak la, li makonnen ak mèvèy soufrans li an. Jezi, nan Levanjil la, pase dènye moman an ak patizan l’ yo, li soupe ak yo, li ofri yo pen ak diven pataj la tankou pwòp kò l’ ak san l’. San li se lank ki siyen nan kaye Nouvo Kontra a nòs tout nèf Bondye vin selebre ak pèp li a, pou li kapab genyen lavi nan li. Deja li montre nan lanmò li, se pou pwòp delivrans lèzòm li bay lavi li. Yon jès ki chita sou mèvèy renmen ak mizerikòd Bondye pou limanite ki pa t’ menm merite l’. Men renmen Bondye a pi gran pase peche nou yo; mechanste lèzòm pa ka bloke jenewozite ki genyen nan kè Bondye, li menm ki se mèvèy san fen, ki se renmen san limit, bonte san parèy. Yo gen pou yo vire je gade sila a yo te touye a, sila a se Jezikri, Pitit Bondye vivan an, li menm ki se sèl modèl pou nou swiv si nou vle rive benefisye delivrans li pote a. Se pou Ramo a ede n’ viv deja gwo mèvèy laviktwa lavi a sou lanmò a nou pral viv yon fason espesyal nan Dimanch leve byen vivan an. Se pou tout lavi n’ kòm kretyen makonnen ak gran evènman sa a, espesyalman nan lane 2015 sa a, pou n’ kapab chache konprann lafwa nou, viv li, pwoklame li, anonse li epi temwanye l’ nan kominote n’ap viv, nan kote n’ap travay yo.

LAPRIYÈ : Granmèt, mèsi paske ou montre nou chemen lakwa a se chemen viktwa a lè nou mache ansanm avèk ou. Tanpri konsole tout fanmi ki an dèy akòz gwo aksidan ki pase nan kanaval Ayiti nan mwa fevriye 2015 la. Sila yo ki mouri yo, tanpri fè yo wè limyè fas ou. Pa pouvwa Jezikri.

PWOPOZISYON : An n’ chèche sanble pi plis ak Jezi ki mouri epi ki leve byen vivan an nan fason n’ap viv lafwa nou, nan fason n’ap kominike lafwa nou, nan fason n’ap pwoklame lafwa nou.