DIMANCH 12

DEZYÈM DIMANCH PAK, ANE B

PREMYE LEKTI

«Yon sèl kè ak yon sèl nam»

LEKTI TRAVAY APOT YO 4, 32-35

Foul moun ki te kwè yo te gen yon sèl kè ak yon sèl nam; pèsòn nan yo pa t’ konsidere sa l’ te genyen kòm pwòp byen pa l’, men tout bagay te ansanm pou yo. Avèk gran fòs, Apot yo t’ap sèvi rezireksyon Jezikri Granmèt nou an temwen, te gen gran gras nan yo tout.

Nan pami yo pa t’ gen pèsòn ki te nan bezwen; tout moun ki te gen jaden oubyen kay, yo vann yo, yo pote pri lavant la, yo depoze l’ nan pye Apot yo; yo separe l’ bay yo chak, daprè sa chak moun te bezwen.

SÒM REPONS 117, 2-4. 16ab-18. 22-24 (r.: 1)

R/ Fè lwanj Granmèt la poutèt li bon, poutèt kè l’ sansib pou tout tan.

Se pou Izrayèl di sa koulye a, poutèt li bon, poutèt kè l’ sansib pou tout tan

Se pou kay Aawon an di sa koulye a, poutèt kè l’ sansib pou tout tan.

Se pou sa yo ki respekte Granmèt la di, poutèt kè l’ sansib pou tout tan.R.

Men dwat Granmèt la fè mèvèy, men dwat Granmèt la leve byen wo.

Mwen p’ap mouri, men m’ap viv, m’ap rakonte travay Granmèt la

Granmèt la korije m’ byen korije, men li pa lage m’ nan lanmò.R.

Wòch la bòs mason yo te rejte a, se li menm ki vin tounen tèt kwen an,

Se nan Granmèt la sa sòti pou l’ fèt, se yon bagay ekstrawòdinè nan je nou.

Sa a se jou Granmèt la fè a: se pou nou fete, se pou nou kontan nan li.R.

DEZYÈM LEKTI

«Tout sa k’ fèt sot nan Bondye, li ranpòte viktwa sou tè a»

LEKTI PREMYE LÈT APOT JAN KI SEN 5, 1-6

Nou menm mwen renmen anpil la:

Tout moun ki kwè Jezi se Kris la, se nan Bondye li fèt; tout moun, ki renmen sa a ki bay nesans la, li renmen sa a ki fèt nan li a tou. Se nan sa nou rekonèt nou renmen sa yo ki fèt nan Bondye yo, se lè nou renmen Bondye epi nou fè kòmandman l’ yo; kòmandman l’ yo pa lou.

Sèke tout sa ki fèt nan Bondye li ranpòte viktwa sou tè a, epi men viktwa a, ki ranpòte viktwa sou tè a, se lafwa nou. Kilès sa a ki ranpòte viktwa sou tè a, si se pa sa a ki kwè Jezi se Pitit Bondye a?

Sa a se li menm ki vini nan dlo a ak san an, se Jezikri; pa nan dlo a sèlman, men nan dlo a ak san an. Epi se Espri a ki sèvi temwen Jezikri se verite a.

LEVANJIL

«Aprè ui jou, Jezi rive».

BÒN NOUVÈL JEZIKRI A DAPRÈ JAN 20, 19-31

Lè aswè rive, jou sa a, premye jou semèn nan, tout pòt yo te fèmen, kote disip yo te rasanble poutèt yo te pè Juif yo, Jezi rive, li kanpe nan mitan, li di yo: "Lapè pou nou". Pandan l’ap di sa, li montre yo men yo ak bò kòt la. Disip yo kontan lè yo wè Granmèt la.

Li di yo ankò: "Lapè pou nou. Menm jan Papa a voye m’ nan, mwen menm tou mwen voye nou". Lè l’ fin di sa, li soufle, li di yo: "Resevwa Espri Sen an. Moun nou renmèt peche yo, peche yo ap renmèt, moun nou kenbe peche yo, y’ap ret kenbe".

Toma menm, youn nan douz yo, sa yo rele Didim nan, li pa t’ avèk yo lè Jezi te vini an. Lòt disip yo di l’: "Nou te wè Granmèt la".

Li menm li di yo: "Si m’ pa wè mak klou yo nan men l’, si m’ pa met dwèt mwen nan plas klou yo, si m’ pa met men m’ nan kòt li, mwen p’ap kwè".

Aprè ui jou, disip li yo te anndan an ankò, Toma te avèk yo. Jezi rive, pòt yo te fèmen, li kanpe nan mitan, li di: "Lapè pou nou". Aprè sa, li di Toma: "Met dwèt ou isit, gade men m’, lonje men ou mete l’ nan bò kòt mwen, sispann ret san lafwa, se pou ou gen lafwa".

Toma reponn, li di l’: «Granmèt mwen ak Bondye m’»!

Jezi di l’: "Paske ou wè m’, Toma, ou kwè; ala kontantman pou moun ki pa wè men ki kwè".

Jezi fè anpil lòt siy ankò devan disip li yo, yo pa ekri nan liv sa a. Sa yo, yo ekri yo, pou nou kwè Jezi se Kris Pitit Bondye, epi pou antan nou kwè a, nou gen lavi o non l’.

REFLEKSYON: Nan premye lekti a, nou wè ki jan premye kominòte kretyen yo t’ap byen viv ansanm. Pa t’ gen nèg rich ak nèg malere nan mitan yo. Yo tout te yon sèl fanmi. Te gen tèt ansanm, tout sa yo te genyen, yo te pataje l’ youn avèk lòt.

Pou nou menm, sa ka sanble enposib. Nou abitye di yon seri de pwovèb pou montre jan bagay yo pa sanble menm ak jan Bib la prezante lavi premye apòt yo: «Chak koukouy klere pou jè l’», «nèg pa fye nèg depi nan Ginen», «zafè kabrit pa zafè mouton». 

Tout tan nou pa chanje mantalite sa a, peyi a p’ap janm vanse. Nan moman sa a, gen anpil pèsèkisyon kote n’ap viv, fò n’ ini nou. Nan dezyèm moso Labib la, Sen Jan ap di nou konsa, si nou pa gen tèt ansanm, si kòmandman youn renmen lòt la sanble twò lou pou nou, se paske nou manke renmen Bondye tou. Si ou pa renmen frè ak sè ou, ke ou wè ak de grenn jè w’, epoutan ou plede di ou renmen Bondye, se manti.

An nou mande Bondye padon, an nou kite l’ plen kè nou ak gras li, ki se Lespri Sen an Jezi pote ba nou an, pou nou ka viv nan renmen li a. Si n’ kite Lespri Sen an desann sou nou, nou p’ap bezwen pè anyen, n’ap ka byen viv ansanm, n’ap jwenn kè poze n’ap chache a.

Tèlman nou chaje pwoblèm, li ka difisil pou n’ aksepte bòn nouvèl sa a.  Ebyen, si nou bezwen wè mak klou yo pou n’ kwè, tankou Toma, nou pa bezwen chache twò lwen, paske toupatou nan mitan nou gen moun ki klouwe sout tout kalite kwa, se yo menm ki Kris la tou vivan nan mitan nou, se ak yo menm pou nou montre si nou renmen Bondye.

LAPRIYÈ: Jezi, nou rekonèt ke tout tan nou p’ap byen viv ansanm, sa vle di nou manke kwè nan ou. Tanpri souple, pran pitye pou nou, vin pote nou sekou, fè n’ wè ou vivan nan mitan nou, plen kè nou ak Lespri Sen ou lan, pou nou youn renmen lòt.

PWOPOZISYON: Pafwa nou abitye chita ap kritike tout sa k’ pa bon. Men tripotay pa bay anyen. Kisa m’ kapab fè, mwen menm, pou mete renmen ak pataj nan sosyete a?