VANDREDI 1

Koulè Blan

JOZÈF KI SEN, Travayè

(Memwa)

PREMYE MOSO LABIB

"Plen tè a, mete l’ anba lòd nou".

NAN LIV LAJENÈZ 1, 26 - 2, 3

Bondye di: «An nou fè moun nan sou pòtre nou ak resanblans nou; se pou l’ kòmande sou pwason lanmè yo ak zwazo syèl yo ak tout bèt tè a ak tout sa k’ap glise atè, ki gen mouvman sou tè a».

Bondye kreye moun nan sou pòtre l’; sou pòtre Bondye li kreye l’; gason ak fi li kreye yo.

Bondye beni yo, li di: "Devlope, vin anpil, plen tè a, mete l’ anba lòd nou; se pou nou kòmande sou pwason lanmè a ak zwazo syèl la, ak tout bèt vivan, ki gen mouvman sou tè a".

Bondye di: "Men mwen ba nou tout zèb ki pote semans sou tè a ak tout kalite pye bwa ki gen semans ras yo nan yo, pou yo sèvi nou kòm manje, ni pou tout bèt vivan sou tè a, ni pou tout sa ki an mouvman sou tè a, ki gen lavi nan yo, pou yo kapab jwenn manje".

Sa fèt konsa. Bondye wè tout sa l’ te fè yo, yo te bon anpil.Vin gen yon aswè ak yon maten, sizyèm jou.  Konsa syèl la ak tè a reyalize, ak tout dekorasyon yo.

Setyèm jou a Bondye konplete travay li a li te fè a, li repoze setyèm jou a pou travay li te fè yo.

Pawòl Granmèt la.

OUBYEN:

"Nenpòt ki sa n’ap fè, fè l’ avèk kè, tankou pou Granmèt la, men pa pou moun".

NAN LÈT APOT PÒL KI SEN, POU KOLOSYEN YO 3, 14-15. 17. 23-24

Frè m’ yo:

Anlè tout bagay sa yo se pou nou gen renmen an, li menm ki fè sa k’ bon nèt fè youn, epi se pou lapè Jezikri a danse nan kè nou, se nan sa yo rele nou nan yon sèl kò, se pou n’ap di Bondye mèsi.

Nenpòt ki sa n’ap fè nan pawòl oubyen nan aksyon, se pou nou fè tout bagay o non Granmèt Jezikri, antan n’ap di Bondye Papa a mèsi pa lentèmedyè l’.

Nenpòt ki sa n’ap fè, se pou nou fè l’ avèk kè, tankou pou Bondye, men pa pou moun, antan nou konnen se nan men Granmèt la n’ap resevwa rekonpans eritaj la.  Sèvi Granmèt Jezikri.

Pawòl Granmèt la.

SÒM REPONS 89, 2. 3-4. 12-13. 14 e 16

R/ Asire travay men nou, Granmèt.

Anvan mòn yo fèt, oubyen tè a ak fas tè a pran nesans, depi tout tan ak pou tout tan ou se Bondye.R.

Ou fè moun nan tounen nan pousyè; ou di: "Tounen, pitit moun yo", Sèke mil ane devan je ou, se tankou jou yè a ki pase, ak tan yon santinèl fè pòs nan nuit.R.

Aprann nou konte jou nou yo, pou nou kondui kè nou nan sajès.Tounen, Granmèt, jouskilè? Padonnen sèvitè ou yo.R.

Plen nou ak kè sansib ou a depi nan maten, n’a fete, n’a jui pandan tout tan n’ap viv.Se pou travay ou a parèt sou sèvitè ou yo, ak glwa ou sou pitit yo.R.

LEVANJIL

"Èske sa a se pa pitit bòs chapant la"?

MEN BÒN NOUVÈL JEZIKRI A DAPRÈ MATYE KI SEN 13, 54-58

Lè sa a:

Jezi rive nan peyi l’, li t’ap bay ansèyman nan sinagòg yo, atèl pwen yo te sezi, yo t’ap di:  "Kote l’ jwenn sajès sa a ak pouvwa sa yo?  Èske sa a se pa pitit bòs chapant la? Èske manman l’ pa rele Mari, epi frè l’ yo Jak, Jozèf, Simon ak Jid?  Epi sè l’ yo, èske yo tout pa lakay nou?  Kote tout bagay sa yo sòti pou li"?  Yo te dekontwole parapò a li.

Jezi menm di yo: "Pa gen pwofèt ki san konsiderasyon, sof nan peyi l’ ak nan kay li". Li pa fè anpil mèvèy la, poutèt mank lafwa yo.

An nou fè lwanj ak konpliman pou pawòl Bondye a.

REFLEKSYON: Jodi a n’ap fete Jozèf travayè, an menm tan tou n’ap fete fèt agrikilti ak travay. Se jou pou nou sonje enpòtans travay nan lavi nou. Bondye te travay: nan sis jou li te fè tout bagay. Jodi a, se ak men nou li vle kontinye travay pou pran swen kreyasyon li an. Li bezwen gason ak fanm vanyan ki pou kolabore ak li. Nan ki fason w’ap kite Bondye itilize ou kòm enstriman pou li travay jodi a?

Pawòl Bondye a, nou sot tande nan Levanjil Matye a, rezime tout lavi Jezi avèk yon brèf referans sou kondisyon li kòm pitit gason bòs chapant lan.Tout bèl lwanj ak kè kontan Sen Jozèf, se te wè li papa legal epi pwofesè Kris la nan travay manyèl l’ap fè lakay li, Nazarèt. Jezi konsakre 30 ane nan lavi l’, nan travay senp kòm bòs chapant, sètènman pou l’ ban nou leson nan vwayaj nou, nan viv apa, nan chemen santifikasyon, nan lavi nòmal chak jou. Travay se enstriman pou plèn reyalizasyon pèfeksyon nou: fen li, se pwolongasyon zèv Bondye, li ede moun nan jwenn matirite l’ ak ekilib li oubyen balans li; li soutni lavi yon fanmi, travay la bati sosyete a, li kontribiye nan byen komen; lè li fèt byen li oryante nou nan renmen Bondye ansanm ak frè nou yo; se yon sous ki apa ki sòti depi nan baz menm, nan egzistans mond lan.

Nan lekòl Jozèf ak Mari, Jezi aprann fè lwanj pou Bondye nan lapriyè, nan litiji, travay ak nan kay senp yon fanmi travayè. Sa a se sans Bondye bay tout travay lòm nan pandan lavi nou sou tè. Lè travay la reyalize nan yon klima lafwa, konfyans ak lapriyè nou vin wè pi klè epi konnen diyite li. Travay la ede moun nan viv pi byen, e li se diyite moun nan. Epoutan, konsepsyon materyalis travay la, ki malerezman priyorite nan sosyete a, konsidere travay la e travayè a kòm sous pwofi. Epi yo bliye ki vrè sans travay la genyen nan lavi kretyen an.

Jodi a, an nou mande Bondye pou diyite tout travayè yo, sitou sa yo ki santi yo tounen esklav, travayè oswa anplwaye yo, sila yo k’ap travay nan konstriksyon, nan koupe kann, pou diyite yo kapab respekte. Pou dwa yo kapab respekte kòm Pitit Bondye.

An nou mande patriyach Sen Jozèf ki se pwotektè tout moun k’ap travay, pou li ede yo jwenn pen chak jou a k’ap pèmèt yo soutni fanmi yo. Se pou tout moun anndan sosyete a gen aksè ak travay diy e diyman respekte ak tout valè li. Se pou travayè kretyen an dekouvri kè kontan nan jefò li chak jou, nan pwòp chemen sanktifikasyon li, nan viv apa pou Bondye. Pou fanmi yo kapab resevwa fwi nan travay la, yon kontribisyon solid e positif pou plis konsolidasyon li.

Yon fason espesyal n’ap fikse je nou jodi a sou Mari, fanm travayè depi kay fanmi l’, konsakre pou Jezi ak Jozèf nan pran swen yo kòm manman yon fanmi. Nou vle onore Mari nan premye jou mwa me a avèk anpil bèl flè.

Tanpri Manman Mari, ede nou pou nou kapab santi apèl Bondye chak jou nan lavi nou pou n’ kapab vin sen, pandan n’ap obeyi Jezi, Pitit ou a, Gran Frè nou an.

LAPRIYÈ: Mèsi Bondye Papa, poutèt Jozèf ou ba nou kòm modèl yon papa travayè ak yon bon edikatè. Tanpri ede nou imite li, konsa n’a travay pou pran swen kreyasyon w’ lan epitou n’ap aprann konnen wòl nou nan fanmi nou ak nan kominote a.

PWOPOZISYON: Fè travay mwen kòmsadwa pou lavi ka pi bèl, pou m’ ka viv ak diyite.