MÈKREDI 17

Koulè Vèt

PREMYE MOSO LABIB

“Bondye renmen moun ki bay ak kè kontan”.

NAN DEZYÈM LÈT APOT PÒL KI SEN, POU KORENTYEN YO 9, 6-11

Frè m’ yo:

Moun ki simen tikras, li rekòlte tikras tou; men moun ki simen nan benediksyon, li rekòlte nan benediksyon. Chak moun, daprè sa l’ te deside nan kè l’, san se pa nan chagren ni nan fòse, sèke Bondye renmen moun ki bay ak kè kontan. Bondye gen pouvwa pou l’ fè nou vin gen anpil favè, pou nou gen tout sa nou bezwen tout tan, pou nou plen ap ranvèse nan tout kalite bon aksyon, daprè sa k’ ekri a: “Li separe, li bay pòv yo, jistis li dire pou tout tan gen tan”.

Sila a k’ap bay semans pou moun k’ap simen an, k’ap bay pen pou moun k’ap manje a, se li menm k’ap fè semans nou an vin anpil, k’ap fè plant jistis nou yo grandi, pou nou kapab vin rich nan tout bagay, pou nou kapab plen nan tout senplisite, sa n’ap fè vin tounen remèsiman pou Bondye a.

Pawòl Granmèt la.

SÒM REPONS 111, 1-2. 3-4. 9

R/ Se chans pou moun ki respekte Granmèt la.

Se chans pou moun ki respekte Granmèt la, ki met anvi l’ anpil nan kòmandman l’ yo. Ras li ap gen pouvwa sou tè a, jenerasyon moun ki dwat yo ap beni.R.

Bèlte ak richès nan kay li, jistis li dire pou tout tan k’ap gen tan.

Limyè a leve nan fènwa pou moun ki dwat yo, li gen kè sansib, li pran pitye, li kòrèk.R.

Li separe, li bay pòv yo; jistis li dire pou tout tan gen tan, kòn li ap leve nan bèlte.R.

LEVANJIL

“Papa ou ki wè nan kote ki kache l’ap renmèt ou sa”.

MEN BÒN NOUVÈL JEZIKRI A DAPRÈ MATYE KI SEN 6, 1-6. 16-18

Lè sa a: Jezi di disip li yo:

“Fè atansyon pou nou pa reyalize jistis nou devan lèzòm pou yo wè nou, otreman nou p’ap gen rekonpans kot Papa nou ki nan syèl la.

Lè w’ap fè lacharite, pa sonnen klewon devan ou, tankou ipokrit yo fè nan kay reyinyon yo ak nan lari yo, pou moun kapab fè lwanj yo. An verite mwen di ou, yo resevwa rekonpans yo. Ou menm menm, lè w’ap fè lacharite, pa kite men gòch ou konnen sa dwat ou ap fè, pou lacharite w’ la fèt an kachèt; Papa ou, ki wè nan kachèt, l’ap renmèt ou sa.

Lè w’ap lapriyè, pa fè tankou ipokrit yo, ki renmen kanpe pou lapriyè nan kay reyinyon ak nan kwen kalfou yo, pou moun kapab wè yo. An verite mwen di nou, yo resevwa rekonpans yo. Ou menm menm, lè w’ap lapriyè, antre nan chanm ou, fèmen pòt la, lapriyè Papa ou an kachèt; Papa ou ki wè nan kachèt, l’ap renmèt ou sa.

Lè n’ap fè jèn, pa fè tankou ipokrit yo, pou nou tris; reyèlman vre yo pran min dekonpoze, pou moun kapab wè y’ap fè jèn. An verite mwen di nou, yo resevwa rekonpans yo. Ou menm menm, lè w’ap fè jèn, met losyon sou tèt ou, lave figi ou, pou moun yo pa wè w’ap fè jèn, min pou se Papa ou ki wè, li menm ki nan kote ki kache a; Papa ou, ki wè nan kote ki kache a, l’a renmèt ou sa”.

An nou fè lwanj ak konpliman pou pawòl Bondye a.

REFLEKSYON : Lavi Jezi ak misyon li temwaye kalite li genyen kòm yon gwo pwofesè. Jous jounen jodi a, ansèyman li te bay disip li yo rete pou nou kòm eritaj, pi gwo sous sajès. Plis toujou, chak fwa nou tande Levanjil la, se pwòp vwa Jezi nou tande. Lansèyman Jezi ba nou jodi a, se sou lapriyè, lacharite ak jèn. Kidonk, twa bagay ki fondamantal nan pratik relijyon jwif yo, se charite oubyen lanmou, lapriyè ak jèn. Men pou Jezi sa ki te pi enpòtan  se fason nou pratike bagay sa yo anndedan Legliz la. Paske Bondye pran plezi l’ nan bagay sa yo lè se avèk tout  kè nou nou pratike yo.

Nan Levanjil la, Jezi ankouraje nou priye san nou pa monte yon komedi, Jezi envite nou priye nan silans, nan diskresyon, li montre nou priye a de, (mwen ak Papa Bondye). Li bay ezanp la, chak fwa li te gen pou l’ reyalize yon bagay ki enpòtan, li te toujou pati sou montay l’al kominike nan tèt-a-tèt ak Papa li. Se yon relasyon zanmitay, se yon relasyon filyal ant Papa ak pitit, pa gen plas pou aparans, bwi, dezòd. Sa pa vle di priye an kominote pa bon, men fè atasyon pou n’ pa tonbe nan tantasyon aparans pou fè moun wè. Bondye vle nou adore li nan lespri ak nan verite.

Nan «Papa nou…», Jezi mete pawòl nan bouch nou, Li montre n’ kisa pou nou di lè n’ap priye, men jodi a li montre nou ki atitid ou dispozisyon nou dwe genyen lè n’ap pale ak Bondye.

Nan dezyèm Lèt li ekri Legliz Korent la, apot Pòl ki sen an relasyone pataj ak lapriyè e li di nou : «Bondye gen pouvwa pou l’ fè nou vin gen anpil favè, pou nou plen ap ranvèse nan tout kalite bon aksyon, daprè sa ki akri a : li separe, li bay pòv yo, jistis li dire pou tout tan gen tan ».

Lapriyè a nesesè nan lavi tout moun, men li pa sifizan li menm sèlman, li dwe akonpanye ak bon aksyon. Non sèlman nou dwe priye men tou se pou n’ travay pou jistis Bondye a tabli sou tout fas tè a. Lapriyè a dwe kite manifeste renmen ak lacharite nan lavi nou. Plis nou priye, plis aksyon nou yo ap pozitif, puiske, Bondye simen bon semans nan kè nou.

LAPRIYE : Bondye Granmèt mwen, tanpri aprann mwen kominike ak ou ak yon kè ki sensè, san fent. Nan dyalòg sa a, aprann mwen koute vwa ou. Aprann mwen obeyi w’. Pa pouvwa Jezikri.

PWOPOZISYON : M’ap pran yon moman silans pou m’ kominike ak Papa a. M’ap eseye koute sa l’ap di mwen.