JEDI 4

Koulè vèt

PREMYE MOSO LABIB

«Mwen menm m’ap antre nan chemen tout tè a ; pran kouraj, Salomon, se pou ou gason ».

NAN PREMYE LIV WA YO

2, 1-4. 10-12

Jou pou David te mouri a t’ap pwoche, li pase lòd bay Salomon, pitit li a, li di: « Mwen menm m’ap antre nan chemen tout tè a; pran kouraj, se pou ou gason, obsève lòd Granmèt Bondye ou yo, pou ou mache nan wout li yo, pou ou kenbe desizyon l’ yo ak kòmandman l’ yo, ak jijman l’ yo, ak temwayaj li yo, jan sa ekri nan lalwa Moyiz la; pou ou konprann tout sa pou ou fè epi kijan pou ou konpòte ou; pou Granmèt la asire pawòl li yo, sa l’ te pale osijè m’ nan, lè l’ te di: «Si pitit ou yo kenbe wout mwen yo, si yo mache devan m’ nan verite ak tout kè yo ak tout nam yo, ou p’ap manke gason sou fotèy Izrayèl la. »

Konsa David kouche avèk papa li yo, yo antere l’ nan vil David la. Jou yo David te kòmande kòm wa sou Izrayèl la, se karantan : nan Ebwon li te kòmande sètan, nan Jerizalèm trantwazan.Salomon menm chita sou twòn David papa l’ la, peyi-wa li vin asire anpil.

Pawòl Granmèt la.

SÒM REPONS 1 Kron 29, 10. 11 ab. 11d-12a. 12bcd

R/ Ou menm, Granmèt, w’ap kòmande sou tout bagay.

Konpliman pou ou, Granmèt Bondye Izrayèl, papa nou, sot nan syèk tan al nan syèk tan.R.

Se pou ou Granmèt, grandè ak pouvwa, ak glwa, ak viktwa, ak lwanj se pou ou ; tout bagay ki nan syèl la ak sou tè a, se pou ou yo ye.R.

Pou ou, Granmèt, peyi-wa-a, ou anlè tout chèf. Richès se pou ou, glwa se pou ou.R.

W’ap kòmande sou tout bagay, nan men ou se otorite ak pouvwa, nan men ou se grandè ak kòmandman tout bagay.R.

LEVANJIL

« Li kòmanse voye yo ».

MEN BÒN NOUVÈL JEZIKRI A DAPRÈ MAK KI SEN 6, 7-13

Lè sa a :

Jezi rele douz yo, li kòmanse voye yo de pa de ; li ba yo pouvwa sou lespri papròp yo.

Li pase yo lòd pou yo pa pran anyen pou wout la, sof yon baton sèlman : ni sak, ni pen, ni lajan ; men pou yo gen sandal nan pye yo ; pou yo pa gen de chemiz.

Li t’ap di yo : « Nenpòt ki kay kote nou antre, ret la joustan nou pati. Tout moun ki pa resevwa nou, ki pa koute nou, antan n’ap sòti, souke pousyè pye nou kòm temwayaj pou yo.

Yo pati, y’al preche pou moun yo fè penitans, yo chase anpil demon, yo pase luil sou anpil malad, yo geri.

An nou fè lwanj ak konpliman pou pawòl Bondye a.

REFLEKSYON:

Pouvwa se youn nan bagay ki fè pati reyalite nou kòm moun; se youn nan bagay lèzòm plis pasyone pou li. Men yo pa toujou byen itilize li, paske pafwa yo fè li tounen yon enstriman ki detwi olye yo konstwi avèk li, yon entriman lagè olye yon enstriman lapè, yon mwayen divizyon olye tèt ansanm. Nou kapab konprann sa si nou gade reyalite mond nou an jounen jodi a.

Anpil peyi belijeran toujou pare pou fè lagè, pou kraze brize; yo kanpe tankou kòk gagè, y’ap envante gwo zam chimik pou menase lòt nasyon, yo vle kreye latwoublay ak laperèz toupatou. Nan sistèm demokratik yo, se pèp yo ki chwazi dirijan yo, moun yo vle pou reprezante yo, oryante yo epi pran dezisyon nan non yo. Malerezman anpil fwa dirijan sa yo konn vle tounen diktatè pou oprime pèp la. Anpil fwa yo tèlman santi yo chèf yo pa vle remèt pouvwa; yo vle kenbe li jis yo mouri. Paske yo renmen privilèj, relasyon, vwayaje, lajan, epi yo bay bagay sa yo plis enpòtans pase pèp yo reprezante a. Li ta bon si nou ta kapab pran ekzanp sou wa David ak Salomon, epi pou nou sonje pouvwa se nan Bondye li sòti, lè yon moun chèf, se yon vokasyon li genyen pou li travay pou byen yon kominote, pou tout moun kapab viv byen, pou dwa ak diyite tout moun respekte.

Moun ki chèf tout bon an, se Bondye, paske li chèf sou tout bagay. Se sa sòm meditasyon (1 Kron 29) pou jodi a ap fè nou sonje:  «Pou ou, Granmèt, peyi-wa-a, ou anlè tout chèf. Richès se pou ou, glwa se pou ou». Pouvwa ki sòti nan Bondye, se pa yon pouvwa pou toupizi moun, se pa yon pouvwa pou pi gwo kraze pi piti, se pa yon pouvwa pou «devan devan nèt», se pa yon pouvwa «grenadye alaso, sa ki mouri zafè a yo» ; okontrè pouvwa Bondye a, se yon pouvwa ki libere moun k’ap pase tray, moun ki anba pouvwa move lespri. Se kalite pouvwa sa Jezi kominike bay Apot yo, antan li voye yo nan misyon (Mak 6,7-13). Se kalite misyon sa a Bondye ba nou depi nan batèm nou.

Men pou nou reyalize misyon sa a nou bezwen debarase nou ak anpil bagay, tankou renmen pouvwa, renmen lajan, kilti aparans, lanbisyon, lògèy, elatriye.

LAPRIYÈ : Granmèt, tanpri bay dirijan nou yo sajès pou yo pa kite lanbisyon pouvwa fè yo kraze brize, men okontrè pou yo travay pou konstwi yon sosyete ki pi bon pou tout pitit ou yo kapab viv. Pa pouvwa Jezikri. Amèn.

PWOPOZISYON:Kòm dirijan, m’ap sispann fè lòt moun abi, m’ap sispann fè pwofitè sou sila yo ki pi fèb.