MÈKREDI 16

Koulè vyolèt

PREMYE MOSO LABIB

"Li voye mesaje l’ la, li delivre sèvitè l’ yo".

NAN LIV PWOFÈT DANYÈL

3, 14-20. 91.92. 95

Jou sa yo:

Wa Nabikodonozò di: "Èske se vre, Sidrak, Mizak avèk Abdenago, nou pa sèvi dye m’ yo, nou pa adore pòtre mwen fè avèk lò a? Koulye a, si nou pare, nenpòt kilè n’ap tande sonnen twonpèt, flit, gita, mandolin, bandjo, akòdeyon avèk tout kalite mizik, se pou nou ajenou, pou nou adore pòtre a mwen te fè a. Si nou pa adore l’, menm lè a m’ap lage nou nan boukan dife a k’ap chofe byen fò a, epi kilès Bondye k’ap delivre nou sot nan men m"?

Sidrak, Mizak avèk Abdenago reponn, yo di wa Nabikodonozò: "nou pa bezwen reponn ou sou kesyon sa a; men Bondye nou an, li menm n’ap sèvi a, li kapab delivre nou sot nan boukan dife cho a ak nan men ou, mon wa, l’ap delivre nou. Si l’ pa vle, ou met konn sa, mon wa, nou p’ap sèvi dye w’ yo, epi pòtre ou fè ak lò a, nou p’ap adore l’.

Lè sa a, Nabikodonozò vin plen ak raj, aparans figi l’ vin chanje alega Sidrak, Mizak avèk Abdenago; li pase lòd pou yo chofe boukan an sèt fwa plis pase jan yo konn abitye chofe l’; li pase lòd pou mesye ki gen fòs nan lame l’ la, yo mare pye Sidrak, mizak avèk Abdenago, pou yo jete yo nan boukan dife k’ap boule a.

Aprè sa, wa Nabikodonozò vin sezi, li leve byen vit, li di minis li yo: "Èske nou pa t’ lage twa mesye yo nan mitan dife a avèk pye yo mare"? Yo reponn wa a, yo di:"Se vre, mon wa". Li pran lapawòl, li di: "men mwen wè kat mesye ki lib, k’ap pwomenen nan mitan dife a, yo pa gen okenn dega nan yo, aparans katriyèm nan sanble ak yon pitit Bondye".

Nabikodonozò leve li di: "Konpliman pou Bondye yo a, Bondye Sidrak, Mizak avèk Abdenago, li menm ki voye mesaje l’ la, li delivre sèvitè l’ yo, ki te kwè nan li, yo dezobeyi pawòl wa a, yo renmèt kò yo, pou yo pa sèvi, pou yo pa adore dòt dye, sof Bondye yo a".

Pawòl Granmèt la.

SÒM Dan 3, 52. 53. 54. 55. 56

Konpliman pou ou, Granmèt, Bondye zansèt nou yo, konpliman pou non bèlte w’ la ki sen an.

R/ Li merite lwanj, li anlè nèt pou tout tan.

Konpliman pou ou nan kay sakre bèlte w’ la ki sen an.

R/Ou merite lwanj anlè nèt ak bèlte anlè nèt pou tout tan.

Konpliman pou ou sou fotèy rèy ou a.

R/ Ou merite lwanj, anlè nèt, ou anlè nèt pou tout tan.

Konpliman pou ou, ou menm ki sonde bafon yo, ou menm ki chita anlè cheriben yo.

R/ Ou merite lwanj, sou anlè nèt pou tout tan.

Konpliman pou ou nan platfòm syèl la,

R/ Ou merite lwanj, ak bèlte pou tout tan.

LEVANJIL

"Si Pitit la delivre nou, n’ap lib tout bon vre".

MEN BÒN NOUVÈL JEZIKRI A DAPRÈ JAN KI SEN 8, 31-42

Lè sa a:

Jezi t’ap di Jwif yo ki te kwè nan li yo: "Si nou rete nan pawòl mwen an, n’ap disip mwen tout bon vre, n’ap konnen verite a, verite a ap delivre nou".

Yo reponn li: "Se ras Abraam nou ye, nou pa janm esklav pèsòn; kòman ou fè di: “N’a vin lib”?

Jezi reponn yo: "An verite, an verite mwen di nou, tout moun ki fè peche, li esklav peche a. Men, esklav la pa ret nan kay la tout tan; se pitit la ki rete tout tan. Konsa si nou menm, Pitit la delivre             nou, n’ap lib tout bon vre. Mwen konnen se pitit Abraam nou ye; men n’ap chèche touye m’, paske pawòl mwen pa pran nan nou. Mwen menm se sa m’ wè kay Papa m’, se sa mwen pale, men nou menm se sa nou wè kay papa nou, se li menm n’ap fè".

Yo pran lapawòl: yo di l’: “papa nou se Abraam”.

Jezi di yo: “Si nou te pitit Abraam, nou ta fè travay Abraam. Koulye a menm, n’ap chèche touye m’, mwen menm yon moun k’ap pale nou laverite mwen fin tande kot Bondye a; bagay sa a, Abraam pa t’ fè l’. Nou menm n’ap fè travay papa nou".

Yo di l’: “nou menm se pa nan move relasyon nou fèt: se yon sèl papa nou genyen, se Bondye”. Jezi di yo: “Si Bondye te papa nou, nou ta renmen m’ sètènman; mwen menm se nan Bondye mwen sòti pou m’ vini. Mwen pa vini ak pwòp fòs mwen, men se li menm, ki voye m”.

An nou fè lwanj ak konpliman pou pawòl Bondye a.

REFLEKSYON

Jodi a, Granmèt la pale di avèk Juif yo. Se pa ak nenpòt Juif, men avèk sila yo ki te gen lafwa: «Jezi t’ap di Jwif yo ki te kwè nan li yo» ( Jan 8,31). San nou pa doute de sa, dyalòg Jezi a reflete difikilte Legliz la te genyen nan kòmansman akoz kèk Juif.

Kòm yo se desandan Abraam yo te ye selon lyen san an, disip Jezi sa yo (ki te sòti nan pami Juif yo) te konsidere tèt yo pi enpòtan ke moun ki pa t’ gen lafwa, se menm jan tou yo te konsidere tèt yo pi enpòtan ke kèlke swa lòt disip ki  pa t’ juif e ki te pataje menm lafwa ak yo. Yo te di: «Se ras Abraam nou ye» (Jan 8,33), «papa nou se Abraam» (v.39); «se yon sèl papa nou genyen, se Bondye» (v.41). Malgre se disip Jezi nou ye, nou gen enpresyon ke li pa t’ reprezante anyen pou juif sa yo, li pa ta ajoute anyen sou sa li gen deja. Men se la tout moun fè gwo erè a.

Vrè pitit yo, se pa moun ki oblije sòti nan lyen san an, men se moun ki eritye pwomès la,  oubyen sila yo ki kwè. Si yon moun pa kwè nan Jezi, li enposib pou li rive nan pwomès Abraam nan. Konsa, pami disip yo, « pa gen Juif ou Grèk; pa gen esklav ou moun lib; pa gen fanm ou gason», paske tout se frè nan batèm nan (Gal 3,27-28).

An nou pa kite lògèy espirityèl fè nou twonpe tèt nou. An nou pa fè tankou juif sa yo ki t’ap etabli kritè siperyè ou enferyè. Pa kesyon pou nou ap pale de frè ki separe yo (pwotestan). Men an nou panse ak nou menm. Konbyen fwa yon pòsyon katolik konsidere li pi bon pase lòt katolik, paske li nan yon mouvman lòt la pa ladan; oubyen paske li respekte yon prensip lòt la pa respekte; oubyen paske li ale lamès souvan epi lòt la pa ale yon fwa nan lane a? Oubyen paske li rich epi lòt la pòv; oubyen paske li fè gwo etid epi lòt la pa fè etid; oubyen paske li gen responsablite ki pi enpòtan epi lòt la pa genyen; oubyen paske li sòti nan fanmi ki gen gwo non epi lòt la se yon senp sitwayen. Se ansyen Pap la, Benwa XVI ki di nou: «Mwen vle kè chak moun kontan ke li se kretyen…Bondye ap mennen bak Legliz li a, li toujou ap soutni li sito unan moman difisil yo»

LAPRIYÈ: Bondye O, se ou ki atire n' vin jwenn ou nan lanmou ak mizerikòd san limit ou gen pou nou a, tanpri fè menm lanmou sa a abite kè n' tout tan pou nou vin tounen temwen kè kontan w’ lan nèt ale. Amèn

PWOPOZISYON : Menm si mwen pa gen menm koulè avè l’, menm si nou pa gen men posiblite pou nou viv, menm si nou pa gen men nivo konesans, m’ap rekonèt sila ki k’ap viv bò kote mwen an, se frè mwen, se frè mwen nan Jezikri.