MÈKREDI 27

Koulè Blan

PREMYE LEKTI

"Yo deside pou yo monte kot Apot yo ak ansyen yo Jerizalèm osijè kesyon sa a".

LEKTI TRAVAY APOT YO

15, 1-6

Jou sa yo:

Gen kèk moun ki desann sot nan Lajide, yo t’ap anseye frè yo: "Si nou pa resevwa lasikonsizyon daprè abitid Moyiz la, nou pa kapab sove". Vin gen diskisyon ki pa piti ant Pòl ak Banabe kont yo, yo deside pou Pòl ak Banabe monte avèk kèkzen nan lòt yo kot Apot yo ak prèt yo Jerizalèm poutèt kesyon sa a. Yo menm, Legliz la kondui yo, yo travèse Fenisi, ak Samari, y’ap rakonte kijan payen yo chanje wout vin nan lafwa; yo fè tout frè yo vin gen gran kè kontan. Lè yo rive Jerizalèm, Legliz la ak Apot yo ak ansyen yo resevwa yo, yo anonse tout sa Bondye te fè avèk yo. Men gen kèkzen nan ti gwoup farizyen yo ki te gen lafwa yo ki leve, yo di se pou payen yo resevwa sikonsizyon, epi se pou yo pase yo lòd pou yo obsève lalwa Moyiz la. Apot yo ak ansyen yo rasanble pou yo ekzamine kesyon sa a.

Pawòl Granmèt la.

SÒM REPONS 121, 1-2.3-4a. 4b-5 (r.: 1)

R/ Nan lakay Granmèt la n’a prale ak kè kontan.

Mwen kontan poutèt yo di m’: "nan lakay Granmèt la n’a prale"

Pye nou deja kanpe nan pòt ou yo, Jéruzalèm.R.

Sèke se la ras yo ap monte, ras Granmèt la, temwayaj Izrayèl, pou fè lwanj non Granmèt la. Sèke se la fotèy yo enstale pou jijman an, fotèy kay David la.R

LEVANJIL

"Moun ki rete nan mwen, epi mwen menm nan li, moun sa a pote anpil fwi".

MEN BÒN NOUVÈL JEZIKRI A DAPRÈ SEN JAN 15, 1-18

Lè sa a: Jezi di disip li yo:

"Mwen se veritab pye rezen an, Papa m’ se kiltivatè a. Tout branch nan mwen ki pa donnen fwi, l’ap wete l’; tout branch ki donnen fwi, l’ap netwaye l’ pou l’ donnen plis fwi. Nou menm nou deja pwòp gras a pawòl la mwen te pale nou an. Rete nan mwen, epi mwen menm nan nou. Menm jan branch la pa kapab donnen fwi pou kont li a, si l’ pa ret nan pye rezen an, konsa tou nou menm non plis, si nou pa rete nan mwen. Mwen se pye rezen an, nou se branch yo; moun ki ret nan mwen, epi mwen menm nan li, moun sa a donnen anpil fwi, paske san mwen menm nou pa kapab fè anyen. Si yon moun pa ret nan mwen, y’ap jete l’ deyò, tankou branch la, l’ap seche, y’ap ranmase l’ y’ap jete l’ nan dife, l’ap boule. Si nou ret nan mwen, epi pawòl mwen yo rete nan nou, tout sa nou vle, nou mèt mande l’, l’ap rive pou nou. Se nan sa Papa m’ jwenn bèlte l’, pou nou donnen anpil fwi, pou nou vin disip mwen".

An nou fè lwanj ak konpliman pou pawòl Bondye a.

REFLEKSYON

«RETE NAN MWEN, EPI MWEN MENM NAN NOU».

Jodi a, yon lòt fwa ankò, n’ap kontanple Jezi ki antoure ak disip li yo, nan yon anbyans entimite, bon jan zanmitay. Li ba yo sa nou te kapab rele dènye enstwiksyon, avan li te separe ak yo, enstwiksyon sa yo genyen yon gwo valè puiske yo reprezante yon testaman.

Nou imajine sa pase nan senak la. Se la Jezi te lave pye disip li yo, yon lòt fwa ankò li anonse ke l’ap pati kite yo, li transmèt yo lanmou fratènèl, e li konsole yo lè li ba yo Lekaristi a ak pwomès Sentespri a (Jn 14). Lè nou li chapit kenz levanjil la, nou jwenn ankourajman pou nou youn byen soude ak lòt nan lanmou.

Granmèt la avèti disip li yo sou danje ak difikilte y’ap gen pou fè fas: « Si yo pèsekite m', y'a pèsekite nou tou» (Jn 15, 20), men li konseye yo pou yo pa kite moral yo kraze akòz mond la ki pa renmen yo: Li renouvle yo pwomès li te fè ke l’ap voye Defansè a,  li ba yo garanti l’ap ede yo nan tout sa yo mande, e finalman Li priye Papa pou yo, pou nou tout, nan gwo lapriyè li fè antan ke prèt.

Pou nou menm, danje a pa sòti deyò: menas la se nan nou li sòti, lè nou youn rayi lòt nan Legliz la (Kò Mistik Kris la) e lè nou pa kapab mete tèt nou ansanm, ak lè nou (ki se kò a) dozado ak Jezi (ki se tèt la). Rekòmandasyon Jezi a klè: « Mwen se pye rezen an, nou se branch yo; moun ki ret nan mwen, epi mwen menm nan li, moun sa a donnen anpil fwi, paske san mwen menm nou pa kapab fè anyen»(Jn 15,5).

Premye jenerasyon kretyen yo te kite ekzanp viv nan tèt ansanm nan pou nou. Men yon temwayaj Sen Inyas d’Antyòch te kite pou nou: «An nou tout kouri ansanm nan yon sèl tanp, se yon sèl lotèl, yon sèl Kris ki sòti nan Papa a».

LAPRIYÈ: Bondye Papa, tanpri aprann nou kraze divizyon nan fason n’ap travay ansanm pou nou bati yon kominote ki chita sou renmen ak fratènite.

PWOPOZISYON: Rete soude ak Bondye Papa nan lapriyè pou nou ka gen lavi nan li. Fè solidarite youn ak lòt antan youn ap ede lòt.