VANDREDI 15

Koulè Blan

PREMYE MOSO LABIB

“Ou se yon veso mwen chwazi pou l’ pote non m’ devan nasyon yo”.

NAN TRAVAY APOT YO 9, 1-20

Jou sa yo:

Sòl t’ap respire menas ak kou toujou kont disip Granmèt yo, li prezante devan chèf prèt yo, li mande l’ lèt pou Damas nan sinagòg yo, pou, si l’ jwenn kèk moun k’ap suiv wout sa a, gason kon fi, li kondui yo prizonye Jerizalèm.

Pandan li t’ap vwayaje, li te prèske rive Damas. Yon moman, yon limyè sot nan syèl la li antoure l’; li tonbe atè a, li tande yon vwa k’ap di l’: “Sòl, Sòl, poukisa w’ap pèsekite m’ nan”?

Li di: “Kilès ou ye, Granmèt”?

Li menm li di: “Mwen se Jezi, sa a w’ap pèsekite a; sa rèd pou ou, pou w’ap voye pye kont fwenn nan”.

Li tranble, li sezi, li di: “Granmèt, ki sa w’ vle pou m’ fè”?

Granmèt la di l’: “Leve, antre nan vil la, la a y’a di w’ ki sa ou gen pou w’ fè”.

Mesye yo ki t’ap vwayaje ansanm avèk li yo, yo te kanpe, yo te sezi lè yo tande vwa a, men yo pa wè pèsòn. Sòl menm leve sot atè a; li louvri je l’, men li pa wè anyen. Yo kondui l’ nan men, yo fè l’ antre Damas. Li ret la twa jou san l’ pa wè, san l’ pa manje, san l’ pa bwè.

Te gen yon disip nan Damas yo te rele Ananyas; Granmèt la di l’ nan vizyon: “Ananyas”!

Li di: “Men mwen, Granmèt”.

Granmèt la di l’: “Leve, al nan ri yo rele Dwat la, chèche nan kay Jid la yon moun Tas yo rele Sòl. Men l’ap lapriyè”. (Li wè yon moun yo rele Ananyas k’ap antre epi k’ap poze men sou li, pou l’ kapab wè ankò).

Ananyas reponn: “Granmèt, mwen te tande anpil moun rakonte sa mesye sa a fè, konbyen mal li fè sen w’ yo nan Jerizalèm; epi isit la li gen pouvwa nan men chèf prèt yo pou l’ mare tout moun k’ap rele non ou”.

Granmèt la di l’: “Ale, paske se yon veso mwen chwazi, pou l’ pote non m’ devan nasyon yo, ak wa yo, ak pitit Izrayèl yo. Mwen menm m’ap montre l’ tout sa l’ gen pou l’ sibi pou non m’”.

Ananyas ale, li antre nan kay la, li poze men sou li, li di: “Sòl frè m’, Granmèt Jezi voye m’, li menm ki te parèt devan ou sou wout la kote ou t’ap vini an, pou ou kapab wè, pou ou plen ak Espri Se an”. Menm lè a se tankou kal ki sot tonbe nan je l’, li vin wè ankò, li leve, li resevwa batèm. Lè l’ pran manje, li vin gen fòs.

Li rete kèk jou avèk disip yo ki te Damas yo. Menm lè a nan sinagòg yo li t’ap preche Jezi se Pitit Bondye.

Pawòl Granmèt la

SÒM REPONS 116, 1. 2

R/ Ale sou tout tè a, preche bòn nouvèl la.

Fè lwanj Granmèt la, tout nasyon yo, fè lwanj li ansanm, tout pèp yo.R.

Paske kè sansib li asire sou nou, verite Granmèt la dire pou tout tan.R.

LEVANJIL

“Chè m’ se yon manje tout bon vre, san m’ se yon bwason tout bon vre”.

MEN BÒN NOUVÈL JEZIKRI A DAPRÈ JAN KI SEN 6, 53-60

Lè sa a:

Juif yo t’ap diskite antre yo, yo t’ap di: “Kijan sa a kapab ba nou chè l’ pou nou manje”?

Jezi di yo:

“Amèn, amèn mwen di nou, si nou pa manje chè Pitit moun nan, si nou pa bwè san l’, nou p’ap gen lavi nan nou. Moun ki manje chè m’, ki bwè san m’, li gen lavi ki p’ap janm fini an: mwen menm m’ap resisite l’ nan dènye jou a.

Kò m’ se yon manje tout bon vre, san m’ se yon bwason tout bon vre. Moun ki manje chè m’, ki bwè san m’, li ret nan mwen, mwen menm nan li.

Menm jan Papa a ki vivan an voye m’ nan, epi mwen viv akoz Papa a; konsa tou moun ki manje m’, l’ap viv akoz mwen tou. Sa a se pen an ki desann sot nan syèl la. Se pa tankou zansèt nou yo ki te manje mán nan, epi ki te mouri yo. Moun ki manje pen sa a l’ap viv pou tout tan”.

Li di sa nan sinagòg la antan l’ap bay ansèyman nan Kafanawòm.

An nou fè Lwanj ak konpliman pou pawòl Bondye a.

REFLEKSYON

Jodi a Pòl ap envite nou poze Jezi kesyon sa a, epi koute repons l’ap ba nou: “Kilès ou ye Granmèt mwen?” “Mwen se Jezi w’ap pèsekite a”. Sòl pa t’ gen okenn lòt lide nan tèt li, sèlman sòti pou al menase patizan Jezi yo, epi touye yo. Li pa t’ epaye pèsonn, li te atake fi kou gason.

Pawòl sa a fè nou konprann kijan li nesesè pou nou swiv Jezi, paske se li ki chemen an. Sòl t’al kote prèt an chèf la pou l’ mande l’ yon lèt pou l’al nan Sinagòg Vil Damas yo, pou l’ mete anba kòd tout moun ki yo se kretyen, epi mennen yo nan prizon. Kidonk, Pòl te jwenn yon pèmisyon legal pou pèsekite kretyen yo.

Se konsa, li te tou pre Damas lè yon limyè sòti nan syèl la san zatann, ki frape li, lè li tande vwa Granmèt la, epi li tonbe atè; se te Jezi li menm ki te fè premye pa pou l’ te rele Sòl, pou l’ kab tounen Apot li, li pase twa jou san li pa wè ni l’ pa manje ni bwè ; sa fè nou sonje Jezikri ki te mouri epi ki te leve byen vivan  aprè twa jou nan fènwa tonbo a. Sa fè nou sonje tou konvèsyon Sòl, se yon chanjman, sa vle di sòti nan lamò al nan lavi. Sòl te vin avèg, se yon senbòl ki montre nou, kouman nou dwe chanje vizyon pa n’ tou, pou nou wè daprè vizyon Jezi ki te chwazi nèg sa a tankou yon zouti, pou l’ pote non l’ devan tout nasyon yo; sa fè nou wè plan Bondye Granmèt la se pa plan pa nou, Jezi te vle montre Sòl pwogram misyon an. Aprè rankont li ak Jezi, Sòl vin rele Pòl. Jezi fè l’ tounen Apot epi temwanyaj apostolik li a pra l’ lakòz li anpil soufrans. Nou wè lè yon moun rankontre Jezi, li pa kapab rete menm moun nan ankò, se tout lavi l’ ki vin transfòme pou l’ kab jwenn fòs pou l’ swiv Jezikri nan tout sakrifis.

Levanjilis Sen Jan an di nou se Jezi ki ofri pwòp tèt li, tout lavi l’ ak tout sa l’ ye pou nou. Frè ak sè m’ yo, se pou nou aprann ofri tèt nou pou lòt yo, nan fason n’ap sèvi yo; puiske Jezi ban nou ekzanp lan. Ann mande Bondye ba nou lagras li pou n’ kab kenbe jis nan bout, antan n’ap pran ekzanp sou Sen Pòl, Apot nasyon yo.

LAPRIYÈ: Jezi Granmèt, ede m’ fè yon konvèsyon radikal nan lavi m’ tankou Sòl, pou lavi m’ ka transfòme. Amèn

PWOPOZISYON: M’ap chèche dekouvri nan lavi m’ tout sa ki fè m’ pa kapab rankontre ak Jezi.