MADI 13

Koulè Blan

JAN KRIZOSTÒM KI SEN,  Evèk e savan sakre Legliz la

(Memwa)

PREMYE LEKTI

«Nou se kò Jezikri, nou youn se manb lòt»

LEKTI PREMYE LÈT APOT PÒL KI SEN, POU KORENTYEN YO 12, 12-14.27-31a

Frè m’ yo:

Menm jan kò a se yon sèl la li ye, epi li gen anpil manb; tout manb kò a, malgre yo anpil, se yon sèl kò a; konsa tou pou Jezikri. Reyèlman vre se nan yon sèl Lespri nou tout nou batize nan yon sèl kò, swa Juif, swa payen, swa esklav, swa moun lib, epi nou tout se nan yon sèl lespri a nou pase swaf nou. Reyèlman vre kò a tou pa yon sèl manb, men li anpil.

Nou menm nou se kò Jezikri, nou youn se manb lòt.Bondye mete kèkzen nan legliz la, tou dabò apot yo, aprè sa se pwofèt yo, epi se mèt yo; aprè sa se pouvwa pou fè mirak, epi favè pou geri, sa k’ gen devwa pou okipe frè yo, pou dirije yo, sa k’ pale divès kalite lang, sa k’ bay sans pawòl yo. Èske tout moun se pwofèt? Èske tout moun se mèt? Èske tout moun gen pouvwa? Èske tout moun gen favè pou geri? Èske tout moun pale tout lang? Èske tout moun bay sans pawòl? Se pou nou chèche kado ki pi bon yo.

Pawòl Granmèt la.

SÒM REPONS 99, 2. 3. 4. 5 (r.: 3c)

R/ Nou se pèp li ak mouton pak li.

Fè lwanj Granmèt la, tout tè a, sèvi Granmèt la nan kè kontan; antre devan fas li ak fèt.R.

Se pou nou konnen Granmèt la li menm se Bondye; se li menm ki fè nou, se pou li nou ye, pèp li ak mouton pak li.R.

Antre nan pòt li yo avèk lwanj, nan lakou l’ yo avèk kantik, fè lwanj li, fè konpliman pou non l’.R.

Paske Granmèt la bon; kè sansib li pou tout tan, pou jenerasyon ak jenerasyon verite l’ la.R.

LEVANJIL

«Jenòm, mwen di ou, leve»

MEN BÒN NOUVÈL JEZIKRI A DAPRÈ LIK KI SEN 7, 11-17

Lè sa a:

Jezi t’a pral nan yon vil yo rele Nayim; disip li yo ak yon gran foul t’a pral avèk li tou. Pandan y’ap pwoche bò pòt lavil la, te gen yon mò yo t’ap pote, sèl pitit gason manman l’; madanm sa a te vèv, te gen anpil foul lavil la avèk li.

Lè Granmèt la wè sa, li pran pitye pou li, li di l’: «Pa kriye». Li pwoche, li touche sèkèy la. Moun yo ki t’ap pote yo, yo kanpe. Li di: «Jenòm, mwen di ou, leve». Mò a chita, li kòmanse pale; Jezi renmèt li bay manman l’.

Sezisman pran tout moun, yo fè lwanj Bondye, y’ap di: «Yon gran pwofèt leve nan pami nou, Bondye vizite pèp li a». Pawòl sa a gaye nan tout Lajide sou li, ak nan tout rejyon alantou a.

An nou fè lwanj ak konpliman pou pawòl Bondye a.

REFLEKSYON: Jodi a gen de (2) gwoup ki rankontre. Yon gwoup ki akonpaye lanmò, ak yon lòt ki akonpaye lavi. Yon ti pòv malerèz te gen fanmi ak zanmi ki akonpaye li sou wout ki menn nan simityè a kote li ta pral antere pitit gason li an, epi sanzatann li wè yon foul moun ki t’ap mache ansanm ak Jezi. De gwoup yo kwaze sou wout la, yo kanpe, e Jezi di madanm nan ki ta pral antere pitit li a: «Pa kriye» (Lik 7,13). Zye tout moun te fikse sou Jezi, ki pa t’ rete endiferan devan doulè ak soufrans ki t’ap dechire kè madanm sila a, kote li santi konpasyon epi li bay pitit gason li an lavi. Sèke kwaze Jezi, rankontre ak Jezi, se jwenn lavi, se li menm menm ki di sa sou pwòp tèt li: «Mwen se rezireksyon ak lavi» (Jan 11,25). Sen Brawoulyo moun Zaragòs ekri: «Esperans nou genyen pou leve byen vivan an dwe konsole nou, paske nou va nan syèl la sa nou te pèdi isit la».

Avèk lekti moso Levanjil ki pale nou sou leve byen vivan an jèn Nayim, nou ta ka ensiste yon lòt fwa ankò sou divinite Jezi, antan nou di ke se Bondye sèlman ki ka bay yon jèn lavi; mwen prefere mete aksan sou Jezi an tan ke moun, pou nou pa wè li kòm yon moun ki lwen, kòm yon pèsonaj ki tèlman diferan ak nou, oubyen kòm yon moun ki tèlman enpòtan ki pa fè nou santi nou gen konfyans ke yon bon zanmi te ka enspire nou.

Kretyen yo dwe aprann imite Jezi. Nou dwe mande Bondye gras pou nou tounen Kris pou lòt yo. Si sèlman tout moun ki te wè nou te ka kontanple yon imaj Jezi sou tè a! Pa ekzanp, moun ki te wè Sen Franswa D’Asiz te wè yon imaj vivan Jezi. Sen yo se moun ki pote Jezi nan pawòl yo ak nan aksyon yo epi ki imite fason li aji ak bonte li. Sosyete nou an swaf sen e ou kapab youn nan yo nan antouraj ou.

LAPRIYÈ: Bondye, fòs moun ki espere nan ou yo, ou menm ki te vle fè evèk Jan Krizostòm ki sen klere avèk bèl prèch, avèk jan li te konn sipòte pakèt tray, tanpri, fè nou favè pou, antan nou jwenn fòmasyon nan ansèyman l’ yo, nou jwenn fòs nan ekzanp pasyans li a ki pa janm febli a. Pa pouvwa Jezikri.

PWOPOZISYON: An nou kolabore ak Bondye pou pote sekou bay frè ak sè nou yo k’ap soufri, antan n’ap pratike zèv mizerikòd yo.