SAMDI 1

Koulè Blan

TERÈZ DE LANFAN JEZI KI SEN,

Vyèj e savan sakre Legliz la

(Memwa)

PREMYE LEKTI

«Koulye a je m’ wè ou. Se pousa mwen wete sa m’ te di a».

LEKTI LIV JÒB 42, 1-3. 5-6. 12-16

Jòb reponn Granmèt la, li di:

"Mwen konnen ou kapab pou tout bagay, pa gen okenn panse ki kache pou ou. Kilès sila a ki kache plan ou nan, san konesans la? Reyèlman vre se san sajès mwen te pale, se bagay ki depase konesans mwen nèt. Ak pwòp zòrèy mwen mwen te tande ou; koulye a menm se ak je m’ mwen wè ou. Se pousa mwen menm menm mwen korije pwòp tèt mwen, mwen fè penitans nan pay ak sann".

Granmèt la menm beni Jòb ankò plis pase anvan, li vin gen katòz mil mouton, si mil chamo, mil pè bèf, mil bourik. Li vin gen sèt pitit gason ak twa pitit fi, li rele non youn Lajounen, non dezyèm nan Kasya, ak non twazyèm nan Kòn fè. Yo pa jwenn fi ki bèl tankou pitit fi Jòb yo sou tout tè a; papa yo ba yo eritaj nan pami frè yo.

Jòb viv aprè sa pandan sankarantan, li wè pitit gason l’ yo ak pitit fi l’ yo jous sou katriyèm jenerasyon; li mouri vye granmoun, plen laj.

Pawòl Granmèt la.

SÒM REPONS 118, 66. 71. 75. 91. 125. 130

R/ Klere fas ou, Granmèt, sou sèvitè ou la.

Bon kè, ladrès ak syans, aprann mwen sa, paske mwen kwè nan lòd ou yo.R.

Sa bon pou mwen poutèt mwen te rabese, pou m’ aprann desizyon ou yo.R.

Mwen konnen, Granmèt, jijman ou yo kòrèk, se nan verite ou rabese m’.R.

Daprè jijman ou yo yo dire jodi a, paske tout bagay sèvi ou.R.

Se sèvitè ou mwen ye; ban m’ entelijans, pou m’ konnen temwayaj ou yo.R.

Deklarasyon pawòl ou yo klere, li bay ti moun yo entelijans.R.

LEVANJIL

"Fè kè nou kontan paske non nou ekri nan syèl yo".

MEN BÒN NOUVÈL JEZIKRI A DAPRÈ LIK KI SEN 10, 17- 24

Lè sa a:

Swasanndouz yo tounen avèk kè kontan, y’ap di: "Granmèt, menm demon yo, yo obeyi nou o non ou".

Li di yo: "Mwen te wè Satan tankou zèklè ki t’ap tonbe sot nan syèl la. Men mwen ba nou pouvwa pou nou mache sou sèpan ak skòpyon ak sou tout pouvwa lènmi an, epi anyen p’ap fè nou sa k’ mal. Sèlman se pa pousa pou nou fè kè nou kontan, poutèt lespri yo obeyi nou an; se pou nou fè kè nou kontan pito paske non nou ekri nan syèl la".

Lè sa a menm li tresayi nan Lespri Sen an, li di: ‘‘Mwen fè konpliman pou ou, Papa, Granmèt syèl la ak tè a, paske ou te kache bagay sa yo pou savan yo ak moun entelijan yo, epi ou te devwale yo bay sa ki pòv yo. Wi, Papa, se konsa sa te fè ou plezi. Papa m’ renmèt mwen tout bagay. Pèsònn pa konnen sa Pitit la ye, sof Papa a, epi sa Papa a ye, sof Pitit la ak moun Pitit la vle devwale sa".

Li vire kot disip li yo, li di: "Se chans pou je yo ki wè sa n’ap wè yo; paske mwen di nou anpil pwofèt ak wa te vle wè sa n’ap wè yo, men yo pa t’ wè l’, epi tande sa n’ap tande yo, men yo pa t’ tande li’’.

An nou fè lwanj ak konpliman pou pawòl Bondye a.

REFLEKSYON: Jodi a Legliz la ap sonje youn nan temwen fidèl li yo, ki gen anpil popilarite, Sen Terèz de Lanfan Jezi ki Sen, vyèj e savan sakre Legliz la. Se te yon fanm ki t’ap chèche viv nan kominyon total ak Bondye antan li te abandone li ak yon total konfyans nan men Lasent Vyèj Mari. Kidonk li te kwè Manman Jezi te kapab sèvi kòm kanal pou li te resevwa tout gras nan men Bondye. Terèz te kite renmen Bondye a penetre li pou li te ka tounen yon siy vizib renmen sa nan Legliz la ki nan pelerinaj sou tè a.

Se nan fason li te viv renmen sa a an pwofondè ki fè Legliz la prezante li tankou yon modèl jounen jodi a. An nou pran modèl sou Terèz, an nou chache imite li nan jan li te fè Bondye konfyans, nan jan li te lapriyè ak nan jan li te devwe pou sèvi Bondye atravè sila yo ki pi pòv.

Jodi a, Levanjelis Lik rakonte nou evénman ki fè Jezi montre Papa rekonesans li pou byen li fè limanite. Li di Bondye mèsi poutèt li devwale gwo sekrè wayòm nan bay pòv yo. Jezi santi li vrèman satisfè lè li wè pòv yo konprann epi yo pratike sa Bondye revele yo atravè li menm nan. Nan lòt okazyon, nan dyalòg li ak Papa a, Jezi di l' mèsi tou paske li toujou koute lapriyè li. Jezi fè konpliman pou samariten ki te gen lèp la, sila ki te tounen ansanm ak lòt nèf moun yo pou vin di li mèsi pou sa li te fè pou li.

Sen Ogisten te ekri: «Kisa ki pi bon pou yon moun ta gen nan kè li, pou yon moun ta pwononse ak bouch li oubyen ekri ak men li, ke pawòl sa yo: 'mèsi Bondye'».

 Nou menm, nou dwe toujou di Bondye mèsi, nou dwe rekonesan tou anvè pwochen nou, tout moun k'ap ede nou, moun k'ap ankouraje nou nan sa ki bon, moun ki nan sèvis nou. Nou dwe gen rekonesans tou anvè Legliz la. Sen yo te toujou gen atitid sa a. Sen Toma d'Aken di nou gen twa fason yo te konn fè sa: premyèman nan rekonesans yo manifeste nan kè yo; dezyèmman nan fè lwanj ak konpliman pou Bondye ak pawòl; finalman nan fason yo chèche rekonpanse zèv Bondye yo ak zèv nan lavi yo, selon posiblite chak moun genyen.

Jodi a, Jezi envite nou fè kè nou kontan, paske avèk li nou gen tout garanti pou ranpòte lavitwa sou lanmò, ak sou tout fòs fènwa yo. «Se pou nou fè kè nou kontan pito paske non nou ekri nan syèl la».

Nou tout ki se kretyen, nou gen mil rezon pou nou fè kè nou kontan nan Levanjil la. Pap Franswa fè nou sonje sa nan Entwodiksyon Ekzòtasyon Apostolik, Evangelii Gaudium:«Kè kontan Levanjil la ranpli kè ak tout lavi sila yo ki rankontre ak Jezi. Tout moun ki kite Jezi sove yo, yo chape anba peche, tristès, yo pa santi kè yo vid ankò, yo pa santi yo pou kont yo ankò».

LAPRIYÈ: Bondye, ou menm ki prepare peyi wa ou la pou pòv yo ak piti yo, fè nou suiv tras Terèz ki sen avèk konfyans, pou, gras a priyè l’, ou devwale glwa tout tan ou nan nan nou. Pa pouvwa Jezikri.

PWOPOZISYON:Lage mwen nan men Bondye ak yon konfyans total, antan m’ap imite Lavyèj Mari ak Sen Terèz.