DIMANCH 19

Koulè Vèt

SETYÈM DIMANCH TAN ÒDINÈ, ANE-A

PREMYE LEKTI

« Se pou ou renmen zanmi ou tankou ou menm ».

NAN LIV LEVITIK 19, 1-2. 17-18

Granmèt la pale ak Moyiz, li di :

« Pale ak tout foul pitit Izrayèl yo, w’a di yo : « Se pou nou sen, paske mwen menm mwen sen, Granmèt Bondye nou an.

Pa rayi frè ou nan kè ou, men se pou ou reprann li an piblik, pou ou pa gen peche sou li. Pa chèche vanjans, pa sonje move pawòl moun menm peyi ak ou yo. Se pou ou renmen zanmi ou tankou ou menm. Se mwen menm Granmèt la ».

Pawòl Granmèt la.

SÒM REPONS 102, 1-2. 3-4. 8 e 10. 12-13

R/ Granmèt la pran pitye, li sansib.

Fè konpliman pou Granmèt la, nam mwen ; tout sa k’ anndan m’, fè konpliman pou non l’ ki sen. Fè konpliman pou Granmèt la, nam mwen, pa bliye tout sa l’ fè yo.R.

Li menm ki padonnen tout fot ou yo, li geri tout maladi ou yo : li menm ki delivre lavi ou sot nan fòs la, ki kouwonnen ou ak mizerikòd, ak pitye.R.

Granmèt la pran pitye, li gen mizerikòd, li pran pasyans, li gen anpil mizerikòd. Se pa daprè peche nou yo li trete nou, ni daprè fot nou yo li renmèt nou.R.

Otan olevan lwen okouchan, li ranvwaye peche nou yo lwen nou.

Tankou papa sansib pou pitit li yo, Granmèt la sansib pou moun ki krenn li yo.R.

DEZYÈM LEKTI

« Tout bagay se pou nou, nou menm se pou Jezikri nou ye, Jezikri menm li pou Bondye »

NAN PREMYE LÈT APOT PÒL KI SEN, POU KORENTYEN YO 3, 16-23

Frè m’ yo :

Èske nou pa konnen se tanp Bondye nou ye, epi Espri Bondye a abite nan nou ? Si yon moun atake tanp Bondye a, Bondye ap kraze l’. Tanp Bondye a sen, se nou menm.

Pèsòn pa bezwen twonpe tèt li. Si gen yon moun nan pami nou ki konprann li gen sajès ; nan sans syèk sa a, se pou l’ vin fou pou l’ kapab gen sajès ; sèke sajès tè sa a se foli kot Bondye.

Sèke men sa k’ ekri : «M’ap pran saj yo nan pyèj yo» ; epi tou : «Granmèt la konnen panse saj yo, yo pa vo anyen ». Konsa pèsòn pa bezwen tire lwanj nan lèzòm. Tout bagay pou nou ; swa Pòl, swa Apolon, swa Sefas, swa tè a, swa lavi a, swa lanmò a, swa sa k’ la koulye a, swa sa k’ap vini an ; tout bagay reyèlman vre se pou nou, nou menm nou pou Jezikri, Jezikri menm li pou Bondye.

Pawòl Granmèt la.

LEVANJIL

«Renmen lènmi nou yo».

MEN BÒN NOUVÈL JEZIKRI A DAPRÈ MATYE KI SEN 5, 38-48

Lè sa a: Jezi di disip li yo:

« Nou te tande yo te di : « Je pou je, dan pou dan ». Mwen, mwen di nou pa reziste mechan an ; men si yon moun frape ou sou machwa dwat ou, prezante l’ bò gòch la tou ; moun ki vle fè pwosè nan jijman avèk ou pou l’ pran chemiz ou, kite manto a pou li tou ; nenpòt ki moun ki fòse ou fè mil pa, ale, fè de mil pa avèk li. Moun ki mande ou, ba li ; moun ki vle prete nan men ou, pa vire do ba li.

Nou te tande yo te di : « Se pou ou renmin pwochen ou, pou ou rayi lènmi ou. Mwen menm mwen di nou : Renmen lènmi nou, fè dibyen pou moun ki rayi nou yo, lapriyè pou moun k’ap pèsekite nou yo, k’ap fè manti sou nou ; pou nou kapab vin tounen pitit Papa nou ki nan syèl la, li menm ki fè solèy li leve sou bon yo ak move yo, ki fè lapli tonbe sou moun kòrèk yo ak sou mechan yo.

Si nou renmen sa a yo ki renmen nou, ki rekonpans nou genyen ? Èske pibliken yo pa fè sa ? Si nou salye frè nou yo sèlman, ki sa nou fè an plis ? Èske payen yo pa fè sa ? Konsa se pou nou kòrèk nèt, tankou Papa nou ki nan syèl la li kòrèk nèt ».

An nou fè lwanj ak konpliman pou pawòl Bondye a.

REFLEKSYON: Dimanch pase, nou te wè kijan li enposib pou nou fè Bondye plezi si nou pa aprann kiltive tolerans, si nou pa aprann padone youn lòt, si nou pa aprann viv an amoni youn ak lòt. Litiji Pawòl Bondye pou jodi a ap ede nou konprann kòman li enpòtan pou nou renmen epi kijan renmen an kapab ede nou jwenn kalite amoni sa ke n’ap chèche a. Jounen jodi a, pou jan nou wè mond nou an ap evolye, se sèl renmen ki kapab pote lapè pou nou, se pa Nasyon Zini.

Sèl fòs ki kapab transfòme mond nou an, se fòs renmen an. Nou menm ki se patizan Jezikri, nou kwè nan verite sa a ak tout fòs nou ; men pou kèk rezon nou gen lapenn pou nou mete li an pratik. Jou nou rive kapab fè yon vrè konvèsyon, n’a kapab bay temwayaj devan tout moun, ke ni zam chimik, ni vyolans gwo nèg yo, ni chantaj politisyen yo, ni lajan nèg rich yo p’ap rezoud pwoblèm ak enkyetid limanite. San dout, nou tout nou pale de lanmou, nou pale kòman li enpòtan ak nesesè. Nou tout n’ap pale byen de li, nou sipliye, nou mande li.

Men, sa mond nou an plis bezwen, se pratike pou nou pratike renmen an epi pou nou viv li. Bondye se lanmou epi li rele nou nan lanmou ; si nou vle tounen disip li tout bon vre, nou pa gen lòt chemen pou nou pran : renmen Bondye epi renmen pwochen nou.

LAPRIYÈ : Granmèt, ou menm ki renmen nou tout bon vre, tanpri ede nou renmen menm jan ak ou pou nou konstwi yon mond kè poze, pa pouvwa Jezikri.

PWOPOZISYON : Jodi a mwen pral leve yon defi : mwen pral renmen lènmi mwen yo, ak konkou lagras Bondye, paske rayisans ak lespri vanjans peze twò loud sou do mwen.