SAMDI 18

Koulè Vèt.

PREMYE LEKTI

"Gras a lafwa nou konnen se Bondye ki te regle syèk yo".

NAN LÈT POU EBRE YO 11, 1-7

Frè m’ yo:

Lafwa a se garanti sa n’ap espere yo, prèv sa k’ parèt yo. Se pousa ansyen te jwenn temwayaj.

Gras a lafwa nou konnen se pawòl Bondye a ki te regle syèk yo, konsa se nan sa nou pa kapab wè sa nou wè yo fèt.

Gras a lafwa Abèl ofri Bondye yon sakrifis ki pi bon, akoz sa, yo rann li temwayaj di li kòrèk, se Bondye ki t’ap sèvi temwen pou kado l’ yo; gras a lafwa, malgre li mouri l’ap pale toujou.

Gras a lafwa yo transpòte Enòk pou l’ pa wè lanmò; yo pa t’ jwenn li, paske Bondye te transpòte l’. Anvan yo transpòte l’ la, li te jwenn temwayaj li te fè Bondye plezi. Sèke san lafwa a yo pa kapab fè Bondye plezi; moun k’ap pwoche kot Bondye dwe kwè li ekziste, li rekonpanse moun k’ap chèche l’.

Gras a lafwa, lè Noe jwenn avètisman sou sa l’ pa t’ ko wè, li vin pè, li pare ach la pou sove kay li a; konsa li kondane tè a, yo fè l’ eritye jistis la ki reyalize nan lafwa a.

SÒM REPONS 144, 2-3. 4-5. 10-11 (r.: cf. Ib)

R/ M’ap fè konpliman pou non ou, Granmèt, pou tout tan.

Chak jou m’ap fè konpliman pou ou, m’ap fè konpliman pou non ou, pou tout tan ak tout tan gen tan.

Granmèt la gran, li merite anpil lwanj, yo pa kapab sonde grande l’.R.

Yon jenerasyon ap fè lwanj pou travay li, bay yon lòt jenerasyon, y’ap rakonte fòs pouvwa ou.

Grandè bèlte wotè ou, y’ap deklare l’, mèvèy ou yo, y’ap detaye yo.R.

Se pou yo fè lwanj ou, Granmèt tout sa ou fè yo; se pou sen ou yo fè konpliman pou ou.

Se pou yo deklare bèlte rèy ou an, se pou yo anonse pouvwa ou.R.

LEVANJIL

"Li chanje fas devan yo".

MEN BÒN NOUVÈL JEZIKRI A DAPRÈ MAK KI SEN 9, 1-12

Lè sa a:

Jezi pran Pyè, Jak ak Jan, li mennen yo sou yon mòn ki wo, pou kont yo sèl; li chanje aparans devan yo. Rad li vin klere tou blan tankou lanèj, pa gen okenn savon ki kapab fè rad vin blanch konsa sou tè a. Eli ak Moyiz parèt devan yo, yo t’ap pale ak Jezi.

Pyè pran lapawòl, li di Jezi: "Rabi, li bon pou nou ret isit la; an nou fè twa joupa, youn pou ou, youn pou Moyiz ak youn pou Eli". Li pa t’ konnen sa pou l’ te di sèke yo te sezi anpil.

Vin gen yon nyaj ki kouvri yo, yon vwa rive sot nan nyaj la, li di: "Sa a, se Pitit mwen an sa m’ renmen anpil la, koute l’". Menm lè a, yo gade toutotou, yo pa wè pèsòn ankò, sof Jezi pou kont li.

Pandan y’ap desann sot sou mòn nan, li pase yo lòd, pou yo pa di pèsòn bagay sa yo te wè yo, sof lè Pitit moun nan ap leve sot nan pami mò yo. Yo te kenbe pawòl sa a kote yo, yo t’ap chèche sa sa vle di: 'Lè l’ap leve sot nan pami mò yo".

Yo poze l’ kesyon, yo di: "Pouki sa farizyen yo ak pwofese yo di eli gen pou l’ vini anvan an"?

Li reponn, li di yo: "Eli, lè l’ap vini anvan, l’ap renmèt tout bagay nan plas yo; men kijan Labib la di osijè Pitit moun nan, pou l’ soufri anpil, pou yo meprize l’. Sèlman mwen di nou Eli vini, yo fè l’ sa yo vle, jan sa te ekri osijè l’ la.

REFLEKSYON: « Jezi pase yo lòd, pou yo pa di pèsòn bagay sa yo te wè yo»

Jodi a, Levanjil Transfigirasyon an prezante yon pwoblèm devan nou pou nou rezoud. Tèks Sen Mak la ranpli ak sekrè sou Mesi a, anpil moman kote Jezi bay lòd pou yo pa di bagay li fè. Jodi a, kèk nan patizan li yo te wè ak pwòp je yo mèvèy transfigirasyon an e li ba yo lòd pou yo pa di pèsonn sa yo te wè, avan Pitit moun nan leve byen vivan sòti pami mò yo» (Mak 9,9).

Kisa mesaj mesyanik sa ye menm? Ki kalite mesaj sa? Se vwal yo fè yon ti leve pou dekouvri sa ki kache dèyè li, sa Bondye pral revele atravè limyè Pak la, nan dènye moman lavi Jezi. Jodi a, nou wè sa byen klè nan levanjil la: Transfigirasyon an, se yon ti moman, yon avangou limyè bèlte a pou disip yo ka konprann sans moman entimite sa.

Jezi te deja anonse disip li yo kijan li ta pral soufri, men lè li wè kòman kè yo twouble, yo boulvèse akoz trajedi a, li pran tan pou li eksplike yo atravè pawòl li ak aksyon li, kijan dènye jou li yo pral ye: se jou gwo soufrans, lanmò, men se avèk rezireksyon an tout bagay pral fini. Men gwo mistè nou te gen pou dekouvri a. Sen Toma Daken di nou: « Pou yon moun kapab mache kòrèkteman sou wout li, li nesesè pou li konnen kote li prale».

Menm jan tou, lavi nou antan ke kretyen, se Granmèt nou Jezikri ki devwale nou kijan l’ap ye alafen: N’ap nan juisans Bondye nou an pou toutan. Men nou p’ap ka rive nan juisans sa a si nou pa aksepte fè sakrifis, si nou pa pote kwa nou. Nou dwe toujou sonje mesaj vivan Levanjil jodi a: lavi sa a, se yon chemen aparans ki pa gen kote pou moun sòti, si nou rete fidèl ak Bondye e si nou viv yon fason ki konfòm ak lespri Beyatitid yo, nou va jwenn plas nou bò kote Bondye e nou va jwi ansanm ak li pou toutan.

LAPRIYÈ: Bondye Papa, antan n’ap kontanple bèlte ou a nan Jezi, tanpri fè nou travay pou mond nou an chanje figi, antan n’ap sispann fè lagè, antan n’ap sispann viv nan chen manje che. Pa pouvwa Jezikri. Amèn.

PWOPOZISYON: Si mwen renmen pwochen mwen plis, si mwen kolabore nan sa ki byen lakay mwen, nan kominote mwen, lavi ka vin pi bèl.