SAMDI 1

Koulè Vyolèt

PREMYE LEKTI

«Mwen tankou yon mouton tou dou, y’ap mennen labatwa».

LEKTI LIV PWOFÈT JEREMI 11, 18- 20

Ou menm Granmèt, ou fè m’ wè, mwen konnen; ou montre m’ plan yo. Mwen menm mwen te tankou yon mouton tou dou, y’ap mennen labatwa, mwen pa t’ konnen, se sou mwen yo t’ap kalkile plan, yo t’ap di: «An nou mete bwa nan pen l’, an nou wete l’ sot sou tè vivan yo, yo p’ap sonje non l’ ankò».

Kanta ou menm, Granmèt lame yo, ou menm ki jije kòrèk, ki sonde ren ak kè, se pou m’ wè vanjans ou sou yo; sèke mwen devwale ou kòz mwen.

Pawòl Granmèt la.

SÒM REPONS 7, 2-3. 9bc-10. 11-12

R/ Granmèt Bondye m’, nan ou mwen espere.

Granmèt Bondye m’, nan ou mwen espere; sove m’ sot nan men tout moun k’ap pèsekite m’ yo, delivre m’, pou l’ pa pran lavi m’ tankou lyon k’ap dechire, san pa gen pèsòn pou sove.R.

Jije m’, Granmèt, daprè jistis mwen, daprè inosans mwen ki nan mwen. Se pou mechanste pechè yo boule; asire sila a ki kòrèk la: ou menm k’ap sonde kè ak ren, Bondye ki kòrèk.R.

Sekou m’ kot Bondye, li menm ki sove moun ki dwat nan kè yo. Bondye jij ki kòrèk. Li menm ki fò, li menm y’ap fè fache chak jou. R.

LEVANJIL

«Èske Kris la ta vin sot nan Lagalile»?

MEN BÒN NOUVÈL JEZIKRI A DAPRÈ JAN KI SEN 7, 40-53

Lè sa a:

Nan foul la, lè yo tande pawòl Jezi yo, yo t’ap di: «Sila a se pwofèt tout bon vre». Dòt t’ap di: «Sila a se Kris la». Kèkzen menm t’ap di: «Èske Kris la ta vin sot Lagalile»? Èske Labib pa di: «Se nan ras David ak nan bouk Bètleyèm, kote David te ye a, pou Kris la vin soti»? Konsa te gen dezakò nan foul la poutèt li. Gen nan yo ki te vle arete l’; men pèsòn pa t’ lonje men sou li.

Sèvitè yo rive kot prèt an chèf yo ak farizyen yo. Sila yo di yo: «Pouki sa nou pa t’ mennen li»?

Sèvitè yo reponn: «Pèsòn pa janm pale tankou mesye sa a».

Farizyen yo reponn yo: «Èske nou menm tou, nou kite yo twonpe nou? Èske nan prèt an chèf yo gen yon moun ki kwè nan li, oubyen nan pami farizyen yo? Men foul sa a, ki pa konn lalwa a, yo madichonnen».

Nikodèm di yo, li menm ki te vin kote l’ nannuit la, li menm ki te youn nan yo: «Èske lalwa nou an jije yon moun san l’ pa tande l’ anvan pou l’ konnen sa l’ fè»?

Yo reponn, yo di l’: «Èske ou menm se moun Lagalile ou ye? Fouye Labib, gade w’ap wè nan Lagalile pwofèt pa sot la». Konsa chak moun pati lakay li.

An nou fè lwanj ak konpliman pou pawòl Bondye a.

REFLEKSYON: Pwofèt Jeremi pale nou de mouton avèk labatwa. Jezi se mouton an, li san tach. Yo vle voye l’ nan labatwa pou yo sakrifye l’, pou yo touye l’; se konsekans ak pri peche nou yo. Malgre Jezi konnen kijan nou engra, li aksepte soufri, jis li bay lavi l’ pou nou pou l’ ka sove nou. Malgre li inosan, li pase tray akoz renmen li pou nou. An nou medite sou kalite lanmou sa a.

Levanjil la raple nou jan Farizyen ak gwo chèf lalwa yo t’ap planifye lanmò Jezi. Ki refleksyon nou ka fè sou sa jounen jodi a?

Premyèman, nou kapab di, Farizyen sa yo, poutèt yo te toujou kwè nan tèt yo, yo pa t’ kapab dekouvri verite a nan Jezi, yo te santi yo twò konnen; menm jan tou, lè nou pran pòz nou twò konesè nan pawòl Granmèt la, se pwòp tèt nou nou koute, se pa sa Granmèt la di nou.

Dezyèmman, nou dwe konsyan gen difikilte k’ap tann nou lè nou deside mache avèk Jezi. Konsa, nou dwe prepare nou pou n’ kapab fè fas ak soufrans, difikilte ak kontraryete pou nou kapab pa janm fè bak sou wout la.

LAPRIYÈ:Granmèt, tanpri, fè aktivite kè sansib ou dirije kè nou, paske san ou nou pa kapab fè ou plezi. Pa pouvwa Jezikri.

PWOPOZISYON:Reflechi sou kalite sakrifis Granmèt la te fè pou l’ te kab sove ou; ki sakrifis w’ap fè pou w’ sove yon moun ki nan danje?