DIMANCH 2

Koulè Vyolèt

SENKYÈM DIMANCH KARÈM, ANE-A

PREMYE LEKTI

«M’ap mete Lespri m’ nan nou, n’ap viv. »

LEKTI LIV PWOFÈT EZEKYÈL 37, 12-14

Men pawòl Granmèt Bondye:

«Men m’ap louvri tonbo nou yo, m’ap fè nou sòti nan tonbo nou yo, pèp mwen, m’ap fè nou antre nan tè Izrayèl la; n’ap konnen se mwen menm Granmèt la, lè m’ap louvri tonbo nou yo, epi m’ap fè nou sòti nan kavo nou yo, pèp mwen, lè m’ap mete Lespri m’ nan nou, pou nou viv la, lè m’ap fè nou repoze sou tè nou an, n’ap konnen se mwen menm Granmèt la, mwen pale, epi mwen aji», deklarasyon Granmèt Bondye».

Pawòl Granmèt la.

SÒM REPONS 129, 1-2. 3-4ab. c-6. 7-8

R/ Kot Granmèt la se kè sansib, se delivrans an kantite kote l’.

Nan bafon yo m’ap rele kote ou, Granmèt; Granmèt, koute vwa m’. Se pou zòrèy ou panche nan vwa lapriyè m’ nan.R.

Si ou kenbe fot yo, Granmèt, Granmèt, ki moun k’ap kanpe?

Paske kote ou se padon, nou respekte ou.R.

M’ap tann ou, Granmèt; nam mwen ap tann nan pawòl li, nam mwen espere nan Granmèt la. Plis pase yon santinèl k’ap espere devan-jou, se pou Izrayèl espere nan Granmèt la.R.

Paske kot Granmèt la se kè sansib, se delivrans an kantite kote l’.

Se li menm k’ap delivre Izrayèl sot nan tout fot li yo.R.

DEZYÈM LEKTI

«Lespri sila a ki leve Jezi sot nan pami mò yo, li abite nan nou».

LEKTI LÈT APOT PÒL KI SEN POU WOMEN YO 8, 8-11

Frè m’ yo:

Moun yo ki regle daprè chè a, yo pa kapab fè Bondye plezi. Nou menm nou pa regle nan chè a, men nan Lespri a, si reyèlman Lespri Bondye a abite nan nou.

Si yon moun pa gen Lespri Jezikri a, moun sa a pa pou li. Si Jezikri nan nou, kò a mouri poutèt peche a, Lespri a viv poutèt sa k’ fè l’ vin sen an. Si Lespri sila a ki leve Jezi sot nan pami mò yo abite nan nou, sila a ki leve Jezikri sot nan pami mò yo ap fè kò lanmò nou yo viv tou poutèt Lespri a ki abite nan nou an.

Pawòl Granmèt la.

LEVANJIL

«Mwen se leve a ak lavi a».

MEN BÒN NOUVÈL JEZIKRI A DAPRÈ JAN KI SEN 11,1 -40

Lè sa a:

Laza te malad, moun Betani an, vil Mari ak Mat sè l’ la. (Mari menm se sila a li te mete losyon sou Granmèt la, epi ki te siye pye l’ ak cheve l’ la, se frè l’ ki te malad la). Sè l’ yo voye kote l’, yo di: «Granmèt, men sila a ou renmen an malad». Lè Jezi menm tande sa, li di yo: «maladi sa a pa pou lanmò, men pou bèlte Bondye, pou Pitit Bondye a jwenn bèlte gras a li.

Jezi menm te renmen Mat ak sè l’ la Mari, ak Laza. Konsa lè l’ tande li te malad, lè sa a li rete kote l’ te ye a pandan de jou. Aprè sa, li di disip li yo: «An ale nan Lajide ankò».

Disip li yo di l’: «Rabi, koulye a Juif yo t’ap chèche kalonnen ou, epi ou a prale laba a ankò?

Jezi reponn: «Èske pa gen douzèd-tan nan jounen an? Si yon moun ap mache nan lajounen, li p’ap kase pye, paske li wè limyè tè sa a; men si l’ap mache nan fènwa, l’ap kase pye, paske limyè a pa nan li.

Li di sa, aprè sa, li di yo: «Laza, zanmi nou an, ap dòmi; men m’a prale pou m’ reveye l’ sot nan dòmi an».

Disip yo di: «Granmèt, si l’ap dòmi, l’ap sove». Jezi menm pale yo osijè lanmò l’; yo menm menm yo te konprann se osijè dòmi somèy la li t’ap pale.

Lè sa a atò Jezi di yo kareman. «Laza mouri, mwen kontan poutèt nou, pou nou kapab kwè, paske mwen pa t’ la. Men an ale kote l’.

Toma, sa yo rele Didim nan, li di lòt disip yo: «An ale nou menm tou, pou nou mouri ansanm avèk li».

Konsa Jezi rive, li jwenn li depi kat jou nan kavo. Betani te pre Jerizalèm, apeprè twa kilomèt. Anpil nan Juif yo te vin kot Mat ak Mari, pou yo konsole l’ pou frè l’ la.

Mat menm, lè l’ tande Jezi vini, li kouri al rankontre l’, kanta Mari li menm, li te ret chita lakay la. Mat menm di Jezi: «Granmèt, si ou te isit la, frè m’ nan pa t’ap mouri; men koulye a mwen konnen tout sa ou mande Bondye, Bondye ap ba ou li».

Jezi di l’: «Frè ou la ap leve»

Mat di l’: «Mwen konnen l’ap leve nan leve nan dènye jou a».

Jezi di l’: «Mwen se leve ak lavi a; moun ki kwè nan mwen, menm si l’ mouri, l’ap viv, epi tout moun k’ap viv epi ki kwè nan mwen, li p’ap janm mouri. Èske ou kwè sa»?

Li di l’: «Wi, Granmèt, mwen kwè ou se Kris Pitit Bondye vivan an, ki te vin sou tè sa a».

Kon l’ fin di sa, li pati 1’al rele Mari sè l’ la an kachèt, li di: «Mèt la la epi l’ap rele ou». Li menm kon l’ tande sa, li leve byen vit, li vin kote l’; Jezi pa t’ ko rive nan bouk la; men li te kote Mat te rankontre l’ la toujou. Juif yo menm, ki te avèk li nan kay la, epi ki t’ap konsole l’ yo, lè yo wè Mari, ki leve byen vit, li sòti, yo suiv li, yo di: «L’al nan kavo a, pou l’ kriye laba a».

Mari menm, lè l’ rive kote Jezi te ye a, kon l’ wè l’, li tonbe nan pye l’, li di l’: «Granmèt si ou te isit la, frè m’ nan pa t’ap mouri».Jezi menm, lè l’ wè l’ap kriye, ni Juif yo tou ki te vin avèk li a ki t’ap kriye, li santi lespri l’ tresayi, li twouble anndan li menm, li di: «Kote nou te depoze li»?

Yo di l’: «Granmèt vini, w’a wè». Jezi kriye, Juif yo di: «Gade kijan li te renmen l’! «Kèkzen nan yo menm te di: «Èske li pa t’ kapab fè pou sila a pa mouri, li menm ki te louvri je moun ki te fèt tou avèg la. Jezi menm tresayi ankò anndan li menm, li rive nan kavo a. Se te yon twou wòch, yon wòch te poze sou li. Jezi di: «Wete wòch la».

Mat, sè mò a, di l’: «Granmèt, li deja gen move lodè, sa fè katriyèm jou li la».

Jezi di l’: «Èske m’ pa di ou, si ou kwè, w’ap wè bèlte Bondye a»?

Yo weete wòch la. Jezi menm leve je l’ anlè, li di: «Papa, mwen fè konpliman pou ou, poutèt ou koute m’. Mwen te konnen ou toujou koute m’; men se poutèt pèp la ki antoure m’ nan, mwen pale, pou yo kwè se ou menm ki voye m’». Kon l’ fin di sa, li rele byen fò: «Laza, vini deyò». Menm lè a li sòti, pye l’ ak men l’ byen mare ak bann twal, figi l’te mare ak yon mouchwa. Jezi di yo: «Delage l’, kite l’ ale». Anpil nan Juif yo ki te vin kot Mari ak Mat la, lè yo wè sa Jezi fè, yo vin kwè nan li.

An nou fè lwanj ak konpliman pou pawòl Bondye a.

REFLEKSYON: Frè ak sè m’ yo, pawòl Bondye pou 5èm dimanch Tan Karèm nan ta kapab fè nou panse ke nou deja ap selebre kè kontan fèt Pak la. Depi nan premye moso Labib la pou rive nan Levanjil la se mesaj leve vivan  an ke  nou jwenn. Nou  konprann ke Bondye nou an pa vle lanmò pou nou  men lavi an  abondans.

Nan premye lekti a, Granmèt la anonse nan bouch  pwofèt  Ezekyèl ke l’ap fè pèp Izrayèl  la sòti nan tonbo l’ yo e l’ap fè l’ retounen lakay li. Ki sa sa vle di? Nan epòk sa a pèp  la te nan nan ekzil nan peyi Babilòn. Yo t’ap soufri, yo te fin pèdi espwa atèl pwen yo te kapab konpare sitiyasyon yo t’ap viv la ak yon sityasyon lanmò. Men Bondye ekri dwat sou liy brize; li te pral  chanje sitiyasyon yo. Li  pwomèt yo lavi. Se lavi sa a ke Jezi te bay Laza yon lòt fwa, li menm ki te gen tan gen 3 jou depi li antere. Se lavi sa a li vle kontinye ba nou jodi a, se lavi sa a li vle nou simen nan sosyete a. Kidonk, nou dwe sispann simen lanmò, sa vle di, nou nou dwe sispann kraze brize, sispann viv nan divizyon, sispann detui frè parèy nou ak kout lang, sòti nan endiferans nou yo devan kalamite frè ak sè nou, louvri men nou pou nou pataje, sispann se fè moun abi ak mechanste. Nou simen lanmò lè nou aji nan fason ki anpeche moun vin pi moun.

Ki responsabilite nou youn fas ak lòt? Kòman nou pral fè pou n’ fè lavi fleri lakay nou, nan katye kou, nan travay nou, nan kominote nou? Genyen bon entansyon, se byen, men sa pa sifi. Fòk nou angaje n’, mete men nan pat la, kole zepòl pou n’ pote yon vrè chanjman nan sosyete a.

Laza jwenn lavi aprè 3 jou  nan tonbo. Pou nou klè, nou pa kapab di sa a se rezireksyon paske Laza te vin mouri ankò. Aprè vrè rezireskyon ke  Bondye pwomèt nou  an, kò nou ap vin transfòme, n’ap vin gen yon kò ki glorifye, "nou p’ap kapab mouri ankò, n’ap tankou zanj yo"(Lik 20, 36). Sen Pòl di  nou : «Lè moun ki gen kò k’ap mouri an va resevwa kò ki pa kapab mouri an, lè sa a pawòl ki ekri nan liv la va rive vre: Pa gen lanmò ankò, nou genyen batay la nèt. Lanmò! Kote batay ou genyen an ?» 1Ko15, 54b-55a). E Lè sa a "n’ap wè Bondye fas a fas paske n’ap sanble avèk li".

Lavi sa a Bondye pwomèt nou an, nou dwe lite pou nou jwenn li. Chan an di nou sa byen: «syèl la la piyay nan pwen vòlè l’,  nan pwen achte l’, se lite chak jou». Nou p’ap kapab resisite pou vrè lavi a si nou pa kite Lespri Jezi a gide nou jan Sen Pòl siyale sa nan 2èm lekti a. Konsa, si nou viv daprè lachè nou pèdi. Si nou viv daprè lachè a, jan Pap Franswa konn di l’ la n’ap tonbe nan mondanite.

Pou n’ fini, m’ap souliye yon pwen enpòtan : nan syèl la se yon lavi san traka, san dlo nan je; tout pwoblèm ap disparèt. Poutan, nou dwe travay pou lavi sou tè a tounen yon avangou kè kontan syèl la. Nou pa dwe viv nan reziyasyon, nou pa dwe rete ap obsève sa lavi a ap pote tankou moun ki chita sou balkon k’ap gade moun k’ap pase. Fòk nou angaje n’ pou tout pitit Bondye anvi viv, pou wayòm Bondye a jèmen nan tout ti detay lavi nou! Bon dimanch!

LAPRIYÈ : Bondye Papa, tanpri ede nou viv selon volonte w’ pou nou kapab sove. Pa pouvwa Jezikri. Amèn

PWOPOZISYON: Si m’ kwè nan Bondye tout bon vre, menm si mwen mouri m’ap viv. Lafwa m’ se pa yon bagay pou mwen kenbe pou mwen sèl, fòk mwen pataje li.