LENDI 3

Koulè Vyolèt

PREMYE LEKTI

«Men m’ap mouri san m’ pa fè anyen nan bagay sa yo».

LEKTI LIV PWOFÈT DANYÈL       13. 1-9. 15-17. 19-30. 33-62

Jou sa yo:

Te gen yon mesye ki te abite Babilòn, yo te rele non l’ Joakim; li te marye ak yon fi yo te rele Sizán, pitit fi Elsyas, li te bèl anpil, li te respekte Bondye: sèke paran l’ yo te kòrèk, yo te fè ledikasyon pitit fi yo a daprè lalwa Moyiz la. Joakim nan te rich anpil, li te gen yon jaden tou kole lakay li; Juif yo te konn vin lakay li anpil, paske li te yon moun respektab nan pami tout moun.

Ane sa a, nan pèp la yo te enstale de ansyen kòm jij, se osijè yo Granmèt la te pale: «Peche a sòti nan Babilòn, nan ansyen yo ki jij yo, yo menm ki gen wòl pou dirijé pèp la». Yo te konn frekante kay Joakim nan; tout moun ki te gen koz pou regle, yo te konn vin kote yo. Lè pèp la te konn pati vè midi, Sizán te konn antre, li te konn pwomennen nan jaden mari l’ la. Chak jou ansyen yo te konn wè l’ ap antre, ap pwomennen, lanvi yo t’ap boule pou li, yo pèvèti sans yo, yo bese je yo, pou yo pa wè syèl la, pou yo pa sonje jijman ki kòrèk yo.

Rive, kòm yo te veye yon jou ki ranje yo, madanm nan antre jan l’ te konn abitye fè ni yè ni avantyè avèk de jèn fi sèlman, li te vle benyen nan jaden an, paske l’ te fè cho. Pa t’ gen pèsòn la sof  de granmoun yo ki te kache, ki t’ap ekzamine l’. Li di jèn fi yo: «Pote savon ak losyon pou mwen, epi fèmen pòt jaden an, pou m’ kapab benyen.

Kon ti fi yo sòti, de granmoun yo leve, yo kouri kote l’, yo di: «Men pòt jaden an fèmen, pèsòn pa wè nou, nou anvi ou; se pou ou konsanti ba nou, pou ou gen relasyon avèk nou. Si ou pa vle, n’ap sèvi temwen kont ou, n’ap di te gen yon jenòm avèk ou, epi se pousa ou te ranvwaye ti fi yo sot kote ou la».

Sizán plenn, li di: «Tray ap sere m’ tout kote; sèke si m’ fè bagay sa a, se lanmò pou mwen; men si m’ pa fè l’, mwen p’ap chape sot nan men nou; epoutan li pi bon pou mwen pou m’ tonbe nan men nou san m’ pa fè sa, pase pou m’ fè peche devan fas Granmèt la». Sizán pouse yon gran rèl, men granmoun yo pouse yon gran rèl tou kont li, youn nan yo kouri nan pòt jaden an, li louvri l’.

Lò sèvitè kay la tande rèl nan jaden an, yo kouri nan ti pòt dèyè a, pou yo wè sa k’ genyen. Lò granmoun yo fin pale, sèvitè yo vin wont anpil, paske yo pa t’ janm tande kalite pawòl konsa sou do Sizán.

Landmen rive. Lè pèp la vin kay Joakim, mari l’ la, de granmoun yo vini tou, yo te plen move panse kont Sizán, pou yo touye l’. Yo te di devan pèp la: «Voye chèche Sizán, pitit fi Elsyas la, madanm Joakim nan». Menm lè a, yo voye chèche l’. Li rive avèk paran l’ yo avèk pitit li yo avèk tout fanmi l’ yo. Moun lakay li yo t’ap kriye, ni tout moun ki te konnen l’.

De prèt leve nan mitan pèp la, yo poze men yo sou tèt li. Li menm, li kriye, li leve je l’ gade syèl la: sèke kè l’ te gen konfyans nan Granmèt la. Prèt yo di: «Pandan nou t’ap pwonmnen nan jaden an pou kont nou, sila a antre avèk de jèn fi, li fèmen pòt jaden an, li ranvwaye ti fi yo sot kote l’; gen yon jenòm ki te kache, li rivé, li fè move aksyon avèk li. Sèlman nou menm, kòm nou te nan kwen jaden an, nou wè peche a, nou kouri sou yo, nou wè yo toulède ap fè move aksyon. Li menm menm nou pa resi kenbe l’, paske li gen plis fòs pase nou, li louvri pòt yo, li sove. Fi sa a menm, nou kenbe l’, nou poze l’ kesyon, nou mande l’ kilès jenòm sa a, li refize deklare nou. Se bagay sa a nou temwen».

Foul la kwè yo, paske se ansyen ak jij pèp la yo te ye, yo kondane madanm nan pou l’ mouri.

Sizán rele byen fò, li di: «Bondye ki ekziste tout tan, ou menm ki konnen sa k’ kache, ou menm ki konnen tout bagay anvan yo rive, ou konnen se temwayaj ki pa vre yo depoze kont mwen. Men m’ap mouri, san m’ pa fè anyen nan bagay sa yo mesye sa yo envante avèk mechanste kont mwen an».

Granmèt la koute vwa l’. Pandan y’ap kondui l’ nan lanmò, Granmèt la drese lespri sen yon jèn ti gason, yo te rele l’ Danyèl; li rele byen fò: «Mwen inosan nan san madanm sa a». Tout pèp la vire kote l’, yo di l’: «Ki kalite pawòl sa a ou di a?» Li menm menm, li kanpe nan mitan yo, li di:«Se konsa nou aji san refleehi, pitit Izrayèl yo? nou pa menm jije, nou pa menm konnen sa k’ vre, nou kondane yon pitit fi Izrayèl. Tounen nan jijman an, paske se temwayaj manti yo depoze kont li».

Konsa pèp la tounen byen vit, granmoun yo di l’: «Vini, chita nan mitan nou, montre nou laverite, paske Bondye ba ou konsiderasyon vyeyès». Danyèl di yo: «Separe yo lwen youn sot kot lòt, m’ap jije

Yo». Lè yo fin separe yo youn sot kot lòt, li rele youn nan yo, li di l’:«Ou menm ki vyeyi nan mal, koulye a peche ou yo fè mas, peche sa yo ou t’ap fè depi lontan an, lè ou te konn ap jije jijman ki pa kòrèk yo, lè ou te konn ap kraze inosan yo, ou te konn ap lage koupab yo, malgre Granmèt la di: «Pa touye inosan an ak sila a ki kòrèk la». Ebyen koulye a, si ou te wè l’, di anba ki pye bwa ou te wè yo ap pale ansanm». Li di: «Anba yon pye bwa-d-chèn». Danyèl di: «Se sou pwòp tèt ou ou fè manti a tou dwat: sèke men Mesaje Bondye a, li resevwa rezilta jijiman an nan men l’, l’ap koupe ou nan mitan». Li voye l’ ale, li pase lòd pou lòt la vini, li di l’: «Ras Kanaan, ou pa ras Jida, bèlte a pran ou nan pyèj, move lanvi a pèvèti kè ou. Se konsa nou aji avèk pitit fi Izrayèl yo, epi yo te konn pè nou, yo te konn pale avèk nou; men yon pitit Jida pa sipòte peche nou an. Koulye a, ebyen, di m’ anba ki pye bwa ou te pran yo ap pale ansanm». Li di: «Anba yon pye kaliptis». Danyèl di l’: «Manti sa a ou fè a, se sou tèt ou tou dwat l’ap tonbe: sèke Mesaje Granmèt la deja rèt la, li gen epe a nan men l’, l’ap koupe ou nan mitan, l’ap touye nou». Konsa tout foul la rele byen fò, yo fè konpliman pou Bondye, ki sove moun ki mete espwa sou li, yo fonse sou de ansyen yo (sèke Danyèl te konvenk yo ak pwòp bouch yo sou temwayaj manti a yo te fè a), yo fè yo sibi mal la yo te vle fè pwochen yo sibi a, konsa yo aji daprè lalwa Moyiz la, yo touye yo, yo sove yon san inosan jou sa a.

Pawòl Granmèt la.

SÒM REPONS 22, l-3a. 3b-4. 5. 6 3, 1-11

R/ Si m’ap mache nan bafon lonbraj lanmò, mwen p’ap pè malè, paske ou avèk mwen.

Granmèt la ap kondui m’, anyen p’ap manke m’: nan zèb vèt li enstale m’, sou bò dlo trankil li mennen m’, li refè nam mwen.R.

Li kondui m’ nan santye jistis poutèt non l’. Sèke menm si m’ap mache nan bafon lonbraj lanmò, mwen p’ap pè malè, paske ou avèk mwen. Baton ou ak bagèt ou se yo k’ap konsole m’.R.

Ou pare yon tab devan fas mwen kont sila yo k’ap fè m’ pase tray; ou swen tèt mwen ak losyon, kalis mwen ap debòde.R.

Reyèlman vre se bon kè ak kè sansib k’ap rapousuiv mwen tout tan lavi m’, m’ap abite nan lakay Granmèt la pou tout longè tan yo.R.

LEVANJIL

"Moun ki san peche nan pami nou an, se li menm an premye ki pou voye wòch la sou li".

MEN BÒN NOUVÈL JEZIKRI A DAPRÈ JAN KI SEN 8, 1-11

Lè sa a:

Jezi rive sou mòn Olivye yo. Granmaten, li tounen nan kay sakre a, tout pèp la vin kote l’, li chita, l’ap bay lansèyman.

Pwofesè yo ak farizyen yo mennen yon madanm yo te jwenn ki t’ap fè adiltè, yo mete l’ kanpe nan mitan, yo di l’: "Mèt, madanm sa a yo jwenn li ap fè adiltè. Nan lalwa a, Moyiz pase nou lòd pou nou touye kalite moun sa yo avèk kout wòch; ou menm menm sa ou di"? Yo te di sa pou yo eseye l’, pou yo te kapab akize l’.

Jezi menm panche atè a, li kòmanse ekri ak dwèt li atè a. Kòm yo te kontinye ap poze l’ kesyon, li drese, li di yo: "Moun ki san peche nan pami nou, se li menm ki pou voye wòch sou li an premye". Li panche ankò, li t’ap ekri atè a. Lè yo tande sa, youn pati aprè lòt, kòmanse sou sa k’ pi granmoun yo, Jezi ret pou kont li ak madanm nan ki kanpe nan mitan.

Jezi drese kò l’, li di l’: "Madanm, kote moun yo ki t’ap akize ou yo? Pèsòn pa kondane ou"?

Li di: "Pèsòn, Granmèt".

Jezi di: "Mwen menm tou mwen pa kondane ou: ale, pa fè peche ankò".

An nou fè lwanj ak konpliman pou pawòl Bondye a.

REFLEKSYON: Jodi a, nan Levanjil la, n’ap kontanple vizaj mizerikòd Jezi. Bondye se Lanmou, Lanmou ki padone, Lanmou ki soufri pou feblès nou yo, Lanmou ki sove nou. Pwofesè yo ak farizyen yo «mennen yon madanm yo te jwenn ki t’ap fè adiltè» (Jan 8,4) e yo mande Granmèt la: «Ou menm menm sa ou di?» (Jan 8,5). Sa yo vle, se pa suiv lansèyman Jezi, men yo vle jwenn rezon pou yo akize li kòm moun ki pa respekte Lalwa Moyiz la.

Men Mèt la pwofite pou li di yo, li vini pou sove pechè yo, moun ki tonbe yo li vini pou l’ ede yo leve, li vini ankouraje yo konvèti, fè penitans. Se la nou menm nou dekouvri mesaj Karèm nan, puiske nou tout nou se pechè, e nou bezwen Bondye delivre nou.

Nan tan n’ap viv la, se kòm si moun yo pèdi sans peche a. Anpil moun pa konnen ankò sa ki byen oubyen sa ki mal, ni yo pa konnen pou ki rezon li byen oubyen li mal. Nan sans sa se kòmsi nou ta ka di, moun yo pèdi sans Lanmou Bondye: Lanmou Bondye gen pou nou, ak repons nou dwe bay Lanmou sa a. Moun ki renmen, li pa ofanse pwochen li. Moun ki renmen tout bon an, li pa mezire lanmou.

Se poutèt sa, sans konvèsyon ak penitans ki karakterize Karèm nan, envite nou kanpe devan Granmèt la, gade li nan je antan li sou kwa a, kouri al akize tèt nou devan li nan sakreman Penitans la. E Jezi ap di nou, menm jan li te di madanm nan: «Mwen menm tou mwen pa kondane ou: ale, pa fè peche ankò».

LAPRIYÈ: Granmèt, aprann mwen gen zantray mizerikòd ak sila yo ki fèb, menm jan avèk ou.

PWOPOZISYON: Kòm mwen se pechè, m’ap aprann padone pou m’ ka resevwa padon. Jodi a Bondye envite m’ tounen temwen Mizerikòd li.