MÈKREDI 24

Koulè Blan

PREMYE LEKTI

«Sa nou pa konnen n’ap adore a, se li menm menm mwen anonse nou an.»

LEKTI TRAVAY APOT YO 17, 15. 22-18, 1

Jou sa yo:

Moun yo ki te kondui Pòl yo, yo mennen l’ jous Atèn; yo resevwa lòd nan men l’ pou Silas ak Timote, pou yo vin jwenn li byen vit, epi yo menm yo pati.

Pòl menm kanpe nan mitan plas la, li di:

«Mesye Atenyen yo, nan tout bagay mwen wè se nou menm ki gen plis sans relijyon. Sèke antan m’ap mache, mwen wè zidòl nou yo, mwen jwenn ata yon kay sakre kote yo te ekri: «Pou Bondye nou pa konnen an». Ebyen sa n’ap sèvi san nou pa konnen an, se li menm mwen anonse nou.

Bondye, ki fè tè a, ak tout sa k’ ladan l’, li menm, kòm se Granmèt syèl la ak tè a, li pa abite nan kay sakre ki fèt ak men moun, ni li pa bezwen pou men lèzòm sèvi l’ kichòy, paske se li menm ki bay tout moun lavi, respirasyon ak tout bagay.

Apati yon sèl moun li fè tout ras lèzòm nan abite sou tout fas tè a, li fikse tan ekzak ak limit abitasyon yo, pou yo chèche Bondye, pou yo eseye antre an kontak avèk li oubyen pou yo jwenn li, paske li pa lwen chak moun nan nou. Reyèlman vre se nan li nou viv, nou gen mouvman, nou ekziste; jan kèkzen nan powèt nou yo te di yo: «Se ras li tou nou ye».

Konsa si nou se ras Bondye, nou pa dwe konsidere sa Bondye ye a sanble ak lò oubyen lajan oubyen bijou, fòm pòtre nou kalkile pou yo bèl ak panse lèzòm.

Bondye pa okipe tan inyorans sa a, li anonse lèzòm koulye a, pou yo tout toupatou chanje konduit; paske li fikse yon jou, kote l’ap jije fas tè a avèk jistis, nan yon mesye kote li fikse sa, antan li ofri tout moun lafwa, antan li fè l’ leve sot nan pami mò yo».

Lè yo tande rezireksyon sot nan pami mò yo, gen nan yo ki pase sa nan rizib, kèkzen menm di: «N’a tande yon lòt fwa». Se konsa Pòl sòti nan mitan yo.

Gen kèk mesye ki dakò yo kwè nan li; nan pami yo te gen Deni Lareopajit, ak yon madanm yo rele Damaris, ak kèk lòt moun avèk yo. Aprè sa, li kite Atèn, li rive Korent.

Pawòl Granmèt la.

SOM REPONS                           148, 1-2. ll-12ab. 12c-14a. 14bcd

R/ Syèl la ak tè a plen ak bèlte ou.

Fè lwanj Granmèt la depi sot nan syèl yo, fè lwanj li nan anwo syèl yo. Fè lwanj li, tout mesaje yo, fè lwanj li, tout pouvwa l’ yo.R.

Wa yo sou tè a ak tout pèp yo, chèf yo ak tout jij tè yo, jèn jan ak vyèj yo, granmoun yo ak timoun yo.R.

Se pou yo fè lwanj pou non Granmèt la, paske se non l’ sèl ki anlè nèt. Lwanj li anlè syèl la ak tè a.R.

Li leve kòn pèp li. Lwanj pou tout sen l’ yo, pou pitit Izrayèl yo, pèp ki tou pre l’ la.R.

LEVANJIL

«Lespri laverite a ap aprann nou tout laverite a»

MEN BÒN NOUVÈLJEZIKRI A DAPRÈ JAN KI SEN 16, 12-15

Lè sa a: Jezi di disip li yo:

«Mwen gen anpil bagay ankò pou m’ di nou; men nou pa kapab pòte yo koulye a. Men lè lespri laverite sa a ap vini, l’ap aprann nou tout laverite a. Sèke se pa ak pwòp fòs li l’ap pale; men tout sa l’ tande l’ap deklare l’, epi sa k’ap vini yo, l’ap anonse nou yo. Li menm l’ap mete m’ nan limyè, paske se nan men m’ l’ap resevwa, epi l’ap anonse nou.

Tout sa Papa a genyen, se pou mwen; se pousa mwen di: «Se nan men m’ l’ap resevwa, epi l’ap anonse nou».

An nou fè lwanj ak konpliman pou pawòl Bondye a.

REFLEKSYON:Atèn, se kapital yon peyi yo rele Lagrès. Pèp Atèn nan te trè relijye, li te vle sèvi Bondye malgre li pa t’ konnen reyèlman ki Bondye li t’ap sèvi. Pandan Pòl te sou plas Atèn nan, li te pwofite okazyon sa a pou l’ eksplike yo ki moun Bondye Granmèt la ye, kijan li mande nou pou nou sèvi l’. Bondye se renmen, li vle nou sèvi l’ nan lespri ak nan lanmou pwochen yo. Li pa vle nou konfonn li ak lòt bagay; li pa aksepte afè adore zidòl; li pa se Kreyatè ak Mèt linivè, li pa vle nou mete li nan plas kreyati. Se yon Bondye kip a mezire lanmou li ak tandrès li pou limanite. Li pa gade sou figi ak aparans.

Anpil fwa nou konpòte nou menm jan ak pèp Atèn nan, nou pa fikse nou, nou nan tout sòs. Nou te mèt fenk sot legliz, depi nou gen yon ti mal tèt, kè nou sote, lespri nou twouble. Nou manke fè Bondye konfyans. Nenpòt ti pay ki brase, kè nou kase. Nou menm kretyen jounen jodi a, nou dwe viv nan lespri Jezikri ki resisite pou li sove nou an, sa vlè di, nou dwe viv nan kè kontan, sitou nan lespwa lavi ki p’ap jan fini an. Se poutèt sa nou pa gen dwa dekouraje nan tout lit n’ap mennen, paskè si Granmèt nou an kraze lanmò, pa gen anyen ki enposib pou li, ni pou moun k’ap suiv li yo.

Nan Levanjil la, Jezi pwomèt nou Lespri Sen an, se li menm k’ap ba nou lavi, k’ap mennen nou nan verite, limyè k’ap klere fènwa ekzistans nou. Ann ouvri kè nou bay Lespri Sen an, pou li kapab transfòme nou epi abite nan nou. Nan lespri rezireksyon an, nou va viv nan renmen, nan pataj, nan padon e nan lapè.

LAPRIYÈ:Granmèt, tanpri klere mwen ak limyè Lespri w’ la pou m’ ka konprann Pawòl ou a epi mache nan chemen laverite w’ la.

PWOPOZISYON : Fè yon ti revizyon nan pwòp lavi m’ pou m’ wè ki lide mwen genyen de Bondye, kijan m’adore l’.