VANDREDI 26

FILIP NERI KI SEN, Prèt

(Memwa)

Koulè Blan

PREMYE LEKTI

«Mwen gen yon gran pèp nan lavil sa a»

LEKTI TRAVAY APOT YO 18, 9-18

Pandan Pòl te Korent, Granmèt la di l’ yon nuit nan vizyon: «Pa pè, se pou ou pale, pa pe bouch ou. Paske mwen avèk ou, pèsòn p’ap poze men sou ou pou yo fè ou kichòy, sèke mwen gen yon pèp ki anpil pou mwen nan vil sa a». Li rete la yon ane ak si mwa, l’ap anseye pawòl Bondye a lakay yo. Pandan Galyon te prefè Lagrès, Juif yo met ansanm yo fè konplo kont Pòl, yo kondui l’ nan tribinal, yo di: «Sila a ale kont lalwa a, l’ap pran tèt moun yo pou yo adore Bondye». Pòl menm te kòmanse ap louvri bouch li, Galyon di Juif yo: «Si se te yon krim oubyen yon move aksyon, mesye Juif yo, mwen ta pran ka nou byen Men si se kesyon sou mo ak non ak lalwa nou an, se nou menm ki pou wè sa; mwen pa vle jij bagay sa yo». Li ranvwaye yo sot nan tribinal la. Tout moun sezi Sostèn, chèf kay reyinyon an, yo kòmanse frape l’ devan tribinal la, Galyon menm pa okipe yo. Kanta Pòl, li te rete ankò kèk jou, aprè sa li kite frè yo, li navige pou Lasiri (Prisil avèk Akila te avèk li). Li te fè koupé cheve l’ Sankre; paske li te fè yon ve.

Pawòl Granmèt la.

SÒM REPONS 46, 2-3. 4-5. 6-7

R/ Bondye wa tout tè a.

Tout nasyon yo, se pou nou bat bravo, fè lwanj pou Bondye avèk kè kontan. Paske Granmèt la ki anwo nèt la, li terib, wa ki gran anlè tout tè a.R.

Li mete pèp yo anba lòd nou, ak nasyon yo anba pye nou.

Li chwazi eritaj nou pou nou, bèlte Jakòb la, sila a li renmen an.R

Bondye monte nan gran fèt, Granmèt la monte nan son klewon. Fè lwanj pou Bondye, fè lwanj; fè lwanj pou wa nou an, fè lwanj.R.

LEVANJIL

«Kè kontan nou an, pèsòn p’ap wete l’ sot nan nou»

MEN BÒN NOUVÈL JEZIKR A DAPRÈ JAN KI SEN 16, 20-23a

Lè sa a: Jezi di disip li yo:

«An verite, an verite mwen di nou, n’ap kriye, n’ap plenn, tè a menm ap nan kè kontan. N’ap gen lapenn, men lapenn nou an ap vin tounen kè kontan.Yon madanm k’ap anfante, li nan lapenn, paske lè l’ rive; men lè l’ fin fè pitit la, li pa sonje soufrans la ankò akoz kè kontan an, paske yon moun fèt sou tè a. Konsa nou menm tou koulye a nou gen lapenn; men m’ap wè nou ankò, kè nou ap kontan, kè kontan nou an, pèsòn p’ap pran l’ sot nan nou. Jou sa a nou p’ap mande m’ anyen».

An nou fè lwanj ak konpliman pou pawòl Bondye a.

REFLEKSYON: «Lapenn nou an ap vin tounen kè kontan».

Jodi a, nou kapab kòmanse panse ak sa ki pral rive nan dis jou: Evénman Lapannkot la. Antan n’ap reviv Senak la, nou wè Manman Jezi, Manman Bon Konsèy la, li nan konvèsasyon avèk Apot yo.  Se yon konvèsasyon sensè! Yo sonje tout bèl moman yo te pase ak Mèt la. Y’ap sonje tou tout sa ki te pase depi aprè Jezi te leve byen vivan an, Asansyon an ak pwomès Jezi yo. Soufrans Jezi yo vin tounen kè kontan. Se yon bèl anbyans ki genyen nan Senak la! Genyen yon lòt bèl anbyans k’ap tann yo selon sa Jezi di!

Nou menm, nou konnen Mari, Rèn Apòt yo, Madanm Lespri Sen an, Manman Legliz la k’ap boujonnen, l’ap gide nou pou nou resevwa kado ak fui Lespri Sen an. Kado yo, se vwal bato a lè l’ap deplwaye, e van an- senbòl lagras la- li favorab pou li: ala yon chemen fasil e rapid!

Nou menm tou, Granmèt la pwomèt l’ap fè lapenn nou an ap vin tounen kè kontan: «kè kontan nou an, pèsòn p’ap pran l’ sot nan nou» (Jn 16,22), « jou sa a nou p’ap mande m’ anyen» (Jn 16,24).  Nou li nan Sòm 126,6: «Moun ki t'ap kriye lè yo t'aprale avèk grenn pou yo simen nan jaden yo, y'ap tounen ak bèl chante nan bouch yo sitèlman yo kontan lè y'ap pote rekòt la lakay yo».

Pandan tout semèn sa, litiji a pral pale nou sou rajenisman (kè kontan), lajwa k’ap dire pou tout tan. Tout bagay pral sèvi pou ede nou viv nan lapriyè. Sen Jozmari di nou: «Mwen vle kè ou toujou kontan, paske kè kontan fè pati chemen an. Mande pou tout moun kè kontan sa ki sòti nan Bondye a».

Pou li ka gen sante fizik ak sinatirèl, moun nan bezwen ri. Se yon sans ki aprann moun viv. Sen Pòl pral di nou: «nan tout bagay, Bondye ap travay pou byen tout moun ki renmen l'» (Wom 8, 28).

LAPRIYÈ: Bondye ki refè nou pou lavi tout tan an nan leve vivan Jezikri a, drese nou kot lotè delivrans nou an ki chita adwat ou a, pou lè Sovè nou an rive nan bèlte l’ la, sila yo ou te refè nan batèm nan, ou a fè yo abiye avèk lavi ki p’ap fini an, ki sen an. Pa pouvwa Jezikri.

PWOPOZISYON: Si m’ rann yon moun yon sèvis, se yon fason mwen kapab pataje kè Kontan Kris la.