MÈKREDI 2

Koulè Vèt

PREMYE LEKTI

"Lè yo wè fas Moyiz, yo pè pwoche tou pre".

LEKTI LIV EKZÒD 34, 29-35

Lè Moyiz te desann sot sou mòn Sinayi a, li te gen de galèt temwayaj la, li pa t’ konnen fas li te klere ak reyon limyè akoz konvèsasyon li te fè ak Granmèt la. Lè Aawon ak pitit Izrayèl yo wè kijan fas Moyiz klere, yo pè pwoche tou pre. Li rele yo, Aawon tounen ansanm ak chèf kay reyinyon yo. Lè l’ fin pale avèk yo, pitit Izrayèl yo vin jwenn li tou, e li te kòmande yo tout sa l’ te tande nan bouch Granmèt la sou mòn Sinayi a.

Lè l’ fin di tout pawòl yo, li poze yon vwal sou fas li. Lè l’ konn antre pou pale ak Granmèt la, li konn wete l’, joustan li sòti; lè l’ sòti, li konn pale ak pitit Izrayèl yo tout sa l’ te aprann. Yo te konn wè fas Moyiz klere lè l’ap sòti, men li menm li te konn kouvri fas li ankò, lè l’ap pale avèk yo.

Pawòl Granmèt la.

SÒM REPONS 98, 5. 6. 7. 9 (r.: cf. 9c)

R/ Ou sen, Granmèt Bondye nou.

Fè lwanj Granmèt Bondye nou an,

adore l’ devan macheskalye pye l’, paske li sen.R.

Moyiz avèk Aawon, nan pami prèt li yo, ak Samyèl,

nan pami sila yo ki rele non l’ yo.

Yo rele Granmèt la, li menm li reponn yo.R.

Nan kolòn nyaj la li t’ap pale avèk yo.

Yo te kenbe temwayaj li yo ak kòmandman li te ba yo a.R.

Fè lwanj Granmèt Bondye nou an,

Adore l’ sou mòn li ki sen an,

paske li sen, Granmèt Bondye nou an.R.

LEVANJIL

"Li vann tout sa l’ genyen, li achte jaden sa a".

MEN BÒN NOUVÈL JEZIKRI A DAPRÈ MATYE 13, 44-45

Lè sa a: Jezi di foul yo:

"Rèy syèl la sanble ak yon trezò ki kache nan yon jaden; moun ki jwenn li a, li kache l’, li tèlman kontan, l’ale, li vann tout sa l’ genyen, li achte jaden an.

Konsa tou rèy syèl la sanble ak yon komèsan k’ap chèchè bon bijou; lè l’ jwenn yon bijou ki gen anpil valè, li vann tout sa l’ genyen, li achte l’".

An nou fè lwanj ak konpliman pou Pawòl Bondye a.

REFLEKSYON: Jodi a, Levanjelis Matye envite nou reflechi sou 2 parabòl sou Wayòm Syèl la. Pou Jezi, li trè enpòtan pou nou anonse Wayòm nan, konsa tou pou esperans pèp Bondye chwazi a. Men, li klè, se pa tout moun ki te konnen kisa Wayòm sa a ye. Sila yo ki te kondane Jezi pou li mouri a, yo pa t’ konprann li, Pilat ak Ewòd pa t’ konprann li non plis, menm nan kòmansman an, disip yo pa t’ konprann li. Bon lawon an ki te klouwe sou kwa a bò kote Jezi a, se li ki ede nou konprann kisa Wayòm nan ye, lè li di: «Jezi, sonje m' wi lè w’a vin pran gouvènman an nan men ou!» (Lik 23,42). Ni Jezi ni bon lawon an, toulede te sibi akizasyon e yo te prèske mouri, men pou yon rezon ke nou pa konnen, bon lawon an rekonèt Jezi kòm Wa nan yon Wayòm ki gen pou tabli aprè lanmò li sou lakwa a. Se yon Wayòm Espirityèl.

Nan premye predikasyon li, Jezi pale de Wayòm Syèl la tankou yon trezò ki kache anba tè, moun ki rive jwenn trezò sa a, li si tèlman gen kè kontan, li vle achte tè sa a, pou li kapab pwofite trezò a pou tout tan. «Li tèlman kontan, l’ale, li vann tout sa l’ genyen, li achte jaden an» (Mt. 13, 44). An menm tan, pou nou jwenn Wayòm nan, nou pa dwe sispann chèche li, menm si nou ta dwe vann tout sa nou genyen: «Lè l’ jwenn yon bijou ki gen anpil valè, li vann tout sa l’ genyen, li achte l’» (Mt.13, 46).

«De ki sa y’ap pale nou lè yo di nou: ‘chèche’ oubyen ‘moun ki chèche l’a jwenn’? Èske mwen ta kapab di se de bijou ki gen anpil valè y’ap pale, bijou moun ki bay tout bagay e ki aksepte pèdi tout bagay kapab jwenn…» (Orijèn).

Wayòm nan se Lapè, Lanmou, Jistis ak Libète. Trezò sa a, menm si se Bondye ki ka ede nou rive jwenn li, jefò pa nou konte. Devan grandè kado Bondye a, nou konstate feblès ak defo jefò pa nou, ke peche a ak lagè souvan detui. Men nou dwe gen konfyans, paske sa ki parèt enposib pou moun, li posib pou Bondye.

LAPRIYÈ: Mèsi Granmèt pou trezò lafwa a ou ban mwen.

PWOPOZISYON: Kisa mwen ka kite jodi a pou m’ jwenn trezò syèl la.