SAMDI 23

Koulè Vèt

PREMYE LEKTI

"Kenbe kòmandman an san fot joustan Granmèt la rive".

LEKTI PREMYE LÈT APOT PÒL KI SEN POU TIMOTE 6, 13-16

Ou menm mwen renmen anpil la:

Mwen pase ou lòd, devan Bondye ki bay tout bagay lavi a, ak devan Jezikri ki te bay temwyaj sou Pons Pilat, pou ou kenbe kòmandman an san fot, san repwòch, joustan Granmèt nou Jezikri rive; Sila a ki sen an ap fè l’ parèt nan tan l’ yo, sila a sèl ki gen pouvwa a, Wa wa yo ak Granmèt mèt yo, li menm sèl ki pa kapab mouri a, ki abite yon limyè pèsòn pa kapab pwoche a, li menm pèsòn nan moun yo pa janm wè a, ni yo pa kapab wè l’, konsiderasyon ak otorite tout tan pou li. Amèn.

Pawòl Granmèt la.

SÒM REPONS 99, 2. 3. 4. 5 (r.: 2c)

R/ Antre devan fas Granmèt la avèk gran fèt.

Fè lwanj pou Granmèt la, tout tè a, sèvi Granmèt la nan kè kontan; antre devan fas li avèk gran fèt.R.

Konnen Granmèt la se li menm ki Bondye; se li menm ki fè nou, se pou li nou ye, pèp li ak mouton pak li.R.

Antre nan pòtay li yo avèk lwanj, nan lakou l’ yo avèk kantik, fè lwanj li, fè konpliman pou non l’.R.

Sèke Granmèt la bon; pou tout tan kè l’ sansib pou jenerasyon ak jenerasyon verite l’ la.R.

LEVANJIL

"Sa k’ nan bon tè a, se sila yo ki kenbe pawòl la, ki donnen fwi nan pasyans".

MEN BÒN NOUVÈL JEZIKRI A DAPRÈ SEN LIK 8, 4-15

Lè sa a:

Kòm anpil foul te rasanble, yo te vin sot nan vil yo pou yo pwoche kot Jezi, li di sou fòm parabòl: "Sila a ki konn simen an sòti pou simen semans li. Pandan l’ap simen, yon pòsyon tonbe bò chemen an, yo foule l’ anba pye, zwazo syèl yo manje l’. Yon lòt pòsyon tonbe sou wòch, kon l’ pouse, li seche, paske pa t’ gen frechè. Yon lòt pòsyon tonbe nan pami pikan, pikan yo pouse ansanm avèk li, yo toufe l’. Yon lòt pòsyon tonbe nan bon tè, li leve, li bay fui san fwa plis".

Pandan l’ap di sa, li rele byen fò: "Moun ki gen zòrèy pou koute, se pou l’ koute".

Disip li yo poze l’ kesyon, sou sans parabòl sa a.

Li di yo: "Nou menm yo ba nou pouvwa pou nou konnen mèvèy sakre rèy Bondye a, lòt yo menm se an parabòl, pou yo gade san yo pa wè, pou yo tande san yo pa konprann.

Men parabòl la: Semans la se pawòl Bondye a. Sa k’ sou bò wout la, se sila yo ki fin tande, apre sa, dyab la rive, li wete pawòl la sot nan kè yo, pou yo pa kwè, pou yo pa sove. Sa k’ sou wòch la, se sila yo ki fin tande, yo resevwa pawòl la avèk kè kontan, men yo pa gen rasin, se pou yon tan yo kwè, epi nan tan difikilte a, yo sede. Sa k’ tonbe nan pikan yo, se sila yo ki fin tande, men antan y’ap travèse tèt chaje ak richès ak plezi lavi a, yo toufe, yo pa donnen fui.

Men sa k’ nan bon tè a, se sila yo ki tande pawòl la nan yon kè ki bon, ki kòrèk nèt, yo donnen fui nan pasyans".

An nou fè lwanj ak konpliman pou pawòl Bondye a.

REFLEKSYON: Nan premye lekti a, Apot Pòl, nan lèt li ekri Timote a, ap ekzòte l’ pou l’ kenben kòmandman yo san fot jiskaske Jezi retounen avèk pouvwa Wa li, ak tout otorite l’.

Pi devan, nan Levanjil la, Sen Lik prezante nou Jezi k’ap bay ansèyman sou «parabòl nèg ki t’ap simen an». An nou wè nan ti refleksyon nou, kisa Jezi vle fè nou konprann atravè parabòl sa a. Nou te kapab di, moun k’ap simen an se Jezi. Semans la, se pawòl Bondye.

Chak moun gen yon fason li akeyi semans pawòl la. Jezi rann li kont gen moun ki tande pawòl la, men yo pa akeyi l’; dòt akeyi l’ men yo pa pratike l’; dòt tande pawòl la men yo kite pwoblèm ak traka lavi a rache pawòl la nan kè yo; epi dòt koute pawòl la, malgre tout difikilte yo rive mete l’ an praktik nan lavi yo.

Pawòl Bondye toujou vivan e se menm pawòl sa a n’ap tande jodi a. Kòman mwen akeyi l’ nan lavi m’? Ki fwi li pote nan lavi mwen? Èske lè m’ ale Legliz oubyen nan yon rankon lapriyè, se pa lòt bagay m’ al okipe? Èske m’ pa kite pwoblèm lavi a fè m’ soud pafwa ? An nou pwofite ansèyman Jezi ban nou jodi a atravè bèl parabòl sa a pou de jou an jou, nou tounen pi bon tè pou semans pawòl Granmèt la kapab jèmen, grandi epi pote bon jan fwi nan lavi nou.

LAPRIYÈ: Bondye Granmèt, tanpri fè m’ tounen yon bon tè pou semans pawòl ou ka pote fwi nan lavi mwen. Amèn.

PWOPOZISYON: M’ap reflechi sou sa ki antrave kwasans semans pawòl Bondye a nan kè mwen.