DIMANCH 29

Koulè Vèt

TRANTYÈM DIMANCH ÒDINÈ, ANE-A

PREMYE LEKTI

«Si nou fè vèv la ak òfelen an afwon, kòlè m’ ap flanbe kont nou»

LEKTI LIV EKZÒD 22, 21-37

Men pawòl Granmèt la:

«Nou pa dwe fè etranje a lapenn, nou pa dwe fè l’ afwon; sèke nou menm tou se etranje nou te ye nan peyi Ejip la.

Pa trakase vèv la ak òfelen an. Si nou fè yo kichòy ki mal, y’ap rele kote m’, m’ap tande rèl yo a, kòlè m’ap flanbe kont nou, m’ap frape nou ak epe, madanm nou ap vin vèv, pitit nou yo ap vin òfelen.

Si ou prete lajan bay pèp mwen an ki pòv, ki abite avèk ou, pa kole nan kò l’ tankou moun k’ap fòse yon lòt renmèt ni pa kraze l’ antan pou ou fè l’ peye plis. Si ou pran manto nan men pwochen ou kòm garanti, anvan solèy kouche se pou ou renmèt li l’, paske se sa sèlman li genyen pou l’ kouvri, se rad kò l’, li pa gen anyen pase sa pou l’ dòmi; si l’ rele kote m’, m’ap koute l’, paske mwen gen kè sansib».

Pawòl Granmèt la.

SÒM REPONS 17, 2-3a. 3bc-4. 47 e 51ab (r.: 2)

R/ Mwen renmen ou, Granmèt, ou menm ki fòs mwen.

Mwen renmen ou, Granmèt, ou menm ki fòs mwen.

Granmèt, fondasyon m’ ak kachèt mwen, ou menm ki liberatè mwen.R.

Bondye mwen, sekou m’, se nan li m’ap espere, pwoteksyon m’,

kòn delivrans mwen, defans mwen.

M’ap fè lwanj Granmèt la, l’ap sove m’ anba men ènmi m’ yo.R.

Viv Granmèt la, konpliman pou sa a k’ap pote m’ sekou a lwanj pou Bondye sovè mwen an,

li fè wa l’ la ranpòte gran viktwa, li fè kè l’ sansib pou Kris li a .R.

DEZYÈM LEKTI

«Nou chanje chemen sot nan zidòl yo vin jwenn Bondye, pou nou espere Pitit li a li resisite a»

LEKTI PREMYE LÈT APOT PÒL KI SEN POU TESALONISYEN YO 1, 5c-10

Frè m’ yo:

Nou konnen kijan nou menm nou te ye nan mitan nou poutèt nou. Nou menm menm, nou vin pran modèl sou nou menm bò isit la ak sou Granmèt la, antan nou resevwa pawòl la nan anpil tray ak kè kontan Espri Sen an; atèl pwen nou vin sèvi modèl pou tout moun yo ki gen lafwa yo nan Masedwán ak nan Akayi a.

Reyèlman, pawòl Granmèt la gaye sot lakay nou, pa sèlman nan Masedwán ak nan Akayi, men nan tout kote: lafwa nou gen nan Bondye a, li mache, atèl pwen nou menm nou pa bezwen di anyen ankò: se yo menm menm k’ap anonse sou nou menm kijan nou te rive lakay nou epi kijan nou menm menm nou te konvèti sot nan zidòl yo vin jwenn Bondye, pou nou sèvi Bondye ki vivan an, ki vre a, pou nou tann Pitit li a k’ap sòti nan syèl la, li menm li te resisite sot nan pami mò yo: Jezi, ki delivre nou sot anba kòlè k’ap vini an.

Pawòl Granmèt la.

LEVANJIL

«Se pou ou renmen Granmèt Bondye ou la, ak pwochen ou tankou ou menm»

MEN BÒN NOUVÈL JEZIKRI A DAPRÈ MATYE KI SEN 22, 34-40

Farizyen yo tande kijan Jezu te fèmen bouch sadiseyen yo, yo rasanble ansanm. Youn nan yo ki te savan nan lalwa a poze l’ kesyon, pou l’ tante l’: «Mèt, kilès ki gran kòmandman an nan Lalwa a?

Jezi di l’: «Se pou ou renmen Granmèt Bondye ou la ak tout kè ou, ak tout nam ou, ak tout lespri ou».Sa a se pi gran, se premye kòmandman an. Dezyèm nan menm sanble avèk li: «Se pou ou renmen pwochen ou tankou pwòp tèt ou». Se nan de kòmandman sa yo tout Lalwa a ak Pwofèt yo pandye».

An nou fè lwanj ak konpliman pou pawòl Bondye a.

REFLEKSYON: Frè ak sè m’ yo, sèvi Bondye se pa yon bagay ki fasil, men se pa yon bagay ki difisil non plis. Li pa fasil, paske lè yon moun fè rankont avèk Pawòl Bondye a, li mande w’ pou w’ chanje tout sa k’ pa bon nan lavi w’ kòm moun, pou w’ mache nan aksyon ki korèk la.

Anpil fwa chanjman sa a konn parèt difisil pou nou menm rive fè, menm si nou ka konprann li nesesè pou nou fè li. Pa gen anyen ki gran yon moun ka rive ladan l’ san l’ pa fè sakrifis pou jwenn li. Sèvi Bondye a fasil nan mezi ou mete tout konfyans ou sou Pawòl Bondye a, ou aprann dekouvri epi santi efè Pawòl li yo nan ou, lè ou rive konprann plan renmen Bondye gen pou ou a epi w’ rive mete tout lavi w’, volonte w’, tout ou menm nan men Granmèt la.

Premye lekti a nou jwenn nan liv Eòzòd la endike pèp la pou l’ konnen Bondye ki sove l’ la se Sila a ki korèk la, ki pa pran pa nan move kondwit yo. Li mande pèp Izrayelit la pou l’ aprann gen kè sansib pou moun ki vèv yo, òfelen yo ak etranje yo, paske yo menm tou yo te etranje nan peyi Lejip nan tè esklavaj la.

Bondye se Delivrans yo, li se Sila a k’ap gide pèp la nan chemen ki dwat la, nan chemen jistis ak verite a. Li se Bondye k’ap koute rès moun ki sans defans yo, moun ki santi yo eksplwate yo, moun ki mare anba tout kalite antrav lavi a. Li se Bondye ki wè, ki tande, ki konprann, ki pran pasyans, ki padone, k’ap aji lè li menm li deside a.

Sen Pòl, nan dezyèm lekti a ap lwanje moun Tesalonik yo pou bèl temwanyaj lafwa sa a yo bay nan Masedwán, Akaya ak tout lòt zòn vwazen yo. Pòl fè konpliman pou yo menm, paske bèl zèv y’ap fè yo montre kote yo mare fache ak sèvis zidòl yo pou yo mete yo nèt ale nan sèvis Granmèt la. Se pou lafwa nou yo parèt aklè nan fason n’ ap viv la pou Bondye Granmèt nou an kapab jwenn glwa li devan tout moun. Pèp konvèti a nan vil Tesalonik la te rankontre anpil difikilte akoz lafwa yo, men yo te rive kenbe fèm nèt ale nan bon temwanyaj nouvo lavi a nan Lespri Sen an.

Nan levanjil la, Jezi pral konfime nan repons l’ap bay otorite jwif yo, kisa ki nan plan Bondye depi nan kòmansman konsènan relasyon moun avèk pwochen l’. Ki pi gran bagay Bondye vle: “Se renmen Bondye ak tout kè w’, ak tout nanm ou, ak tout lespri w’, sa se pi gran kòmandman an. Epi dezyèm nan, ki sanble ak li a, se pou w’ renmen pwochen w’ menm jan ak pwòp tèt pa w”.

Jezi ajoute, se nan kòmandman sa yo, tout lalwa a ak pwofèt yo rete.  Sa vle fè n’ konnnen tout Labib la, depi nan kòmansman vle mete moun nan nan bon jan relasyon ak pwochen li. Sa vle di, depi nan kòmansman Bondye vle rekonsilye moun yo ansanm, konsa yo te gen pwomès yon tè nouvo ki sèlman rete sou reyalite fizik la, men ki chita sou reyalite espirityèl la, Jerizalèm ki anwo nèt la.

Pawòl Bondye a, se chak jou l’ap fòme konsyans nou, li mande n’ pou n’ konvèti pou n’ antre nan peyi Bondye ap kòmande a, ki dwe kòmanse depi kounye a nan lavi lafwa tout kretyen yo, ki dwe debouche sou bon temwayaj y’ap bay.

Se pou chak jou nan lavi nou kòm kretyen, nou aprann poze aksyon k’ap ede n’ reponn Bondye pou nou travay pou tabli gouvènman li an ki chita sou renmen, jistis, verite, padon, tèt ansanm, solidarite.

Se pou Lespri Bondye a gide nou nan inisyativ n’ap pran pou n’ mache epi trase chemen pou sila yo Bondye rele sot nan fènwa a pou rantre nan bèl limyè a.

LAPRIYÈ: Granmèt, anpil fwa nou di nou renmen w’ epi n’ap viv nan yon total endiferans ak frè ak sè n’ yo; tanpri ede n’ kite Lespri pa w’ la mennen nou rankontre avèk ou pandan n’ap chache gen yon relasyon ki nèf avèk pwochen nou yo.Amèn.

PWOPOZISYON: Chache mete gwoup apostola kanpe pou n’ gaye levanjil renmen Jezikri a bay tout moun k’ap viv nan antouraj nou yo, espesyalman nan zòn ki difisil yo.