MÈKREDI 24

Koulè Blan

FRANSWA DE SAL, KI SEN,  Evèk e Savan sakre Legliz la

(Mema)

PREMYE LEKTI

« M’ap leve desandans ou apre ou, m’ap asire peyi-wa li »

NAN DEZYÈM LIV SAMYÈL 7, 4-17

Jou sa yo :

Men pawòl Granmèt la bay Natan, li di: “Al di David sèvitè m’ nan: Men pawòl Granmèt la? “Èske se ou menm k’ap bati yon kay ban mwen, pou m’ abite? Mwen pa t’abite nan kay, depi jou mwen te fè pitit Izrayèl yo sòti nan peyi Ejip la jous jodi a ; men mwen te pwomennen nan tant ak nan tonnèl.Nan tout kote mwen te pase avèk tout pitit Izrayèl yo, èske mwen te janm pale avèk youn nan ras Izrayèl yo, sa m’ te pase lòd pou okipe pèp mwen Izrayèl, pou mwen te di : Pouki sa nou pa bati yon kay bwapen pou mwen?

Koulye a men sa w’a di sèvitè m’ David. Men pawòl Granmèt lame yo : « Se mwen menm ki te pran ou sot nan savann zèb la, lè ou t’ap suiv bann mouton yo, pou ou te kapab vin chèf sou pèp mwen Izrayèl, mwen te avèk ou nan tout okazyon tout kote ou te pase, mwen te touye tout ènmi ou yo sot devan fas ou ; mwen te fè ou vin gen yon non ki gran tankou non gran pèsonaj yo ki sou tè a. M’ap mete yon kote pou pèp Izrayèl, m’ap plante l’, l’ap abite la, li p’ap nan kè sote ankò ; pitit mechanste yo p’ap vin pou yo trakase l’ tankou anvan, depi jou mwen te enstale jij yo sou pèp mwen Izrayèl la.

M’ap ba ou repo anba men lòt ènmi ou yo, Granmèt la avèti ou davans l’ap fè yon kay pou ou. Lè jou ou yo ap rive nan bout yo, lè w’a dòmi avèk papa ou yo, m’ap leve desandans ou aprè ou, k’ap sòti nan vant ou, m’ap asire peyi-wa li. Se li menm k’ap bati yon kay pou non m’, m’ap asire twòn peyi-wa li pou tout tan. M’ap yon papa pou li, li menm l’ap yon pitit pou mwen. Si l’ fè bagay ki pa kòrèk, m’ap korije l’avèk bagèt moun yo, ak chatiman pitit moun yo. Men kanta pou mizerikòd mwen an, mwen p’ap retire l’ sot nan li, jan m’ te wete l’ sot nan Sayil la, li menm mwen rejte sot devan fas mwen an. Kay ou a ap fidèl, ni peyi-wa w’ la jous pou tout tan devan fas ou, twòn ou a ap solid pou tout tan ».

Daprè tout pawòl sa yo epi daprè tout vizyon sa a, se konsa menm Natan pale ak David.

Pawòl Granmèt la.

SÒM REPONS 88, 4-5. 27-28. 29-30

R/ Pou tout tan m’ap kenbe mizerikòd mwen pou li.

« Mwen pase alyans avèk sa a mwen chwazi a, mwen fè sèman bay David, sèvitè m’ nan : Pou tout tan m’ap asire desandans ou, m’ap drese twòn ou pou jenerasyon ak jenerasyon ».R.

Li menm l’ap rele m’ : Se Papa m’ ou ye, Bondye m’ak kachèt k’ap sove mwen. Mwen menm m’ap mete l’ kòm premye pitit, pi wo pase wa yo sou tè a.R.

Pou tout tan m’ap kenbe mizerikòd mwen pou li, alyans mwen an ap fidèl pou li.M’ap mete desandans li pou tout tan gen tan, ak twòn li tankou jou syèl yo ».R.

LEVANJIL

« Moun k’ap simen an, li sòti pou l’ simen »

MEN BÒN NOUVÈL JEZIKRI A DAPRÈ MAK KI SEN 4, 1-20

Lè sa a :

Jezi kòmanse bay ansèyman ankò bò lanmè a ; anpil foul rasanble kote l’, atèl pwen li blije monte nan batiman an, pou l’ chita sou lanmè, tout foul la te sou bò lanmè a, atè a. Li t’ap ba yo ansèyman an parabòl sou anpil bagay, li t’ap di yo nan ansèyman l’ nan :

« Koute : men moun ki konn simen an sòti pou l’ simen. Pandan l’ap simen, gen yon pòsyon ki tonbe bò wout la, zwazo syèl yo rive, yo manje l’. Yon lòt pòsyon tonbe sou kote ki gen wòch, kote pa t’ gen anpil tè ; menm lè a li leve, paske pa t’ gen pwofondè tè. Lè solèy leve, li boule, epi, kòm li pa t’ gen rasin, li seche. Yon lòt pòsyon tonbe nan pikan yo, pikan yo monte, yo toufe l’, li pa bay fwi. Yon lòt pòsyon tonbe nan bon tè a, li bay fwi k’ap monte, k’ap devlope; li donnen yon pati trant, yon lòt swasant epi yon lòt san”. Li t’ap di: “Moun ki gen zòrèy pou koute, se pou l’ koute”.

Lè l’ te pou kont li, douz yo ki te avèk li yo, yo poze l’ kesyon sou parabòl la. Li di yo: “Nou menm yo ba nou pouvwa pou nou konnen mistè peyi-wa Bondye a; yo menm menm, sa k’ deyò yo, se an parabòl tout bagay fèt pou yo, pou yo gade byen gade, san yo pa wè, yo tande byen tande, san yo pa konprann, otreman yo ta chanje konduit, yo ta padonnen peche yo”.

Li di yo: “Nou pa konprann parabòl sa a? Ebyen kijan n’ap fè konprann tout parabòl yo?

Moun nan k’ap simen an, se pawòl la l’ap simen. Sa yo ki sou bò wout la, kote pawòl la simen an; lè yo tande, menm lè a Satan rive, li wete pawòl la, ki te simen nan kè yo a. Menm jan an tou sa k’ simen sou kote ki gen wòch yo, kon yo tande pawòl la, menm lè a yo resevwa l’ ak kè kontan, men yo pa gen rasin, se pou yon tan yo ye, aprè sa, lè tray vin leve, ak pèsekisyon poutèt pawòl la, menm lè a yo bite. Lòt ki simen nan pikan yo ; se sa yo ki tande pawòl la, men prewokipasyon syèk sa a avèk atirans richès avèk lòt move lanvi yo antre, yo toufe pawòl la, li rete san fwi. Sa yo menm ki simen sou bon tè a, se moun ki tande pawòl la, yo resevwa l’, yo donnen yon pòsyon trant, yon lòt swasant, yon lòt san ».

An nou fè lwanj ak konpliman pou pawòl Bondye a.

REFLEKSYON : Frè ak sè m’ yo, Bondye se sila ki sousye de pòsyon pèp li a (Izrayèl), e nou wè Granmèt la se pa sila ki mande nou pou nou fè bagay ki ekstrawòdinè pou li; okontrè se li ki antre nan kondisyon lavi nou pou li ba li yon vrè sans.

David se youn nan ekzanp nan premyè lekti a : yon senp gadyen mouton, Bondye chwazi l’ pou l’ vin wa e li ba l’ yon jenerasyon k’ap dire pou tout tan. Sa ki pa itil oubyen ki pa gen gwo valè nan je lèzòm, Bondye sèvi avè l’ pou li manifeste pwisans li. Pèp Izrayèl la, se yon ekzanp nan zye tout nasyon.

Nan istwa pèp sa a gen yon veritab chanjman ki fèt ; li te yon pèp nomad, sa vle di, li pa t’ gen yon pozisyon fiks. Men kounye a li vin tounen yon pèp ki òganize sou yon tèritwa ak pwòp otorite yo.

Nan levanjil la nou wè Jezi itilize yon parabòl pou anonse rèy Bondye a, men se avèk yon imaj li montre nou kòman rèy nan ap develope pami nou. Imaj la, se te yon semè ki sòti al simen grenn. Travayè sa a kan menm ap tann lè moman rekòt la rive, paske pa gen moun ki travay ki p’ap tann rekòt. Men semè sa levanjil la ap pale nou an se Jezi : li sòti pou’l simen. Se misyon an menm, semans lan se pawòl Bondye a, kote grenn yo tonbe a (tè a), se kè lèzòm, fwi yo se developman wayòm Bondye nan lavi moun ki aksepte l’e moman rekòlt la, se finisman mond lan.

Jodi a, nou menm ki gen chans tande pawòl la, Jezi ba nou yon avètisman : li di nou: louvri zòrèy nou e louvri kè nou pou pawòl Bondye a donnen nan lavi nou.

Envitasyon pou nou tande pawòl la, se yon envitasyon tou pou mete l’an pratik. Sa montre si lòm nan li menm li bati lavi l’ sou Bondye, lavi l’ap bèl, lavi l’ap fleri e l’ap jwenn siksè ; men si li bati lavi l’ san Jezi, l’ap tankou grenn yo ki tonbe nan wòch yo, nan pikan, nan move tè yo. Kòm konsekans se mizè, traka ak soufrans k’ap depafini ak lavi li.

LAPRIYÈ : Granmèt, aprann mwen viv nouvo lavi ou pote pou mwen chak jou a ; ban m’ yon kè nouvo pou m’ ka dekouvri prezans ou nan tout moman nan lavi mwen. Ede m’ viv jan w’ mande nan levanjil la. Amèn.

PWOPOZISYON : Swiv Jezi, koute pawòl li yo, epi viv selon pawòl la, dekwa pou m’ kapab rekòlte bon fwi.