LENDI 12

Koulè Vyolèt

PREMYE LEKTI

M’ap leve, menm si m’ chita nan fènwa yo; Granmèt la se limyè m’".

LEKTI LIV PWOFÈT MICHE 7, 7-9

Mwen menm m’ap gade nan direksyon Granmèt la; m’ap tann Bondye sovè m’ nan; Bondye m’ nan ap koute m’.

Ou pa bezwen kontan, lènmi m’ nan, osijè m’, poutèt mwen tonbe a; m’ap leve, menm si m’ chita nan fènwa: Granmèt la se limyè m’.

M’ap pote kòlè Granmèt la, poutèt mwen fè peche kont li a, joustan li jije kòz mwen an, li fè jijman m’. L’ap fè sòti nan limyè a, m’ap wè jistis li a.

Pawòl Granmèt la.

SÒM REPONS 26. 1. 7-8a. 8b-9abc. 13-14 (r-: la)

R/ Granmèt la se limyè m’ ak delivrans mwen.

Granmèt la se limyè m’ ak delivrans mwen, ki moun pou m’ pè?

Granmèt la se pwoteksyon lavi m’, devan ki moun pou m’ tranble? R.

Granmèt, koute vwa m’ k’ap  rele, pitye pou mwen, koute m’.

Se osijè ou kè m’ di: "Chèche fas li".R.

Se fas ou, Granmèt, m’ap chèche.

Pa vire fas ou lwen m’, pa vire do bay sèvitè ou la nan kòlè.

Se sekou m’ ou ye, pa lage m’.R.

Mwen kwè m’ap wè byen Granmèt la nan peyi vivan yo

Tann Granmèt la, aji avèk kouraj,

Asire kè ou, pare pou ou tann Granmèt la.R.

LEVANJIL

"L’ale, li lave kò l’, li vini, li wè".

MEN BÒN NOUVЀL JEZIKRI A DAPRЀ SEN JAN 9, 1-41

Jou sa a:

Pandan Jezi ap pase, li wè yon moun ki avèg depi l’ te fèt. Disip li yo poze l’ kesyon: "Rabi, kilès ki fè peche, sila a oubyen paran l’ yo, pou l’ fèt tou avèg la"?

Jezi reponn: "Ni li menm li pa fè peche, ni paran l’ yo; men se pou travay Bondye kapab parèt klè nan li. Mwen gen pou m’ reyalize travay sila a ki sove m’ nan, toutotan li jou; lannuit la ap rive, kote pèsòn pa kapab travay. Toutotan mwen sou tè a, mwen se limyè tè a. Lè  l’ fin di sa, li krache atè a, li fè labou ak saliv la, li pase labou a sou je l’, li di l’: "Ale, lave kò ou nan basen Siloe a", sa vle di "Sila a yo voye a". Konsa, 1’ale, li lave kò l’, li tounen antan l’ wè.

Se pousa vwazen yo ak moun ki te konn wè l’ anvan, paske se lacharite li te konn mande, yo t’ap di: "Èske sila a se pa li menm ki te konn chita ap mande a"? Yon pati t’ap di: "Se li menm" Lòt yo menm: "Pa ditou, men se youn ki sanble ak li". Li menm li t’ap di: "Se mwen menm menm".

Yo t’ap di l’: "Kijan je ou fè louvri"?

Li reponn: "Moun sa a yo rele Jezi a, li fè labou, li pase sou je m’, li di m’: 'Al nan basen Siloe a, epi lave kò ou'. M’ale, mwen lave kò m’ mwen wè". Yo di l’: "Kote l’"? Li di: "Mwen pa konnen".

Yo mennen l’ kot farizyen yo, sila a ki te avèg anvan an. Men se te jou saba, lè Jezi te fè labou epi li te louvri je l’ la. Konsa farizyen yo mande l’ ankò kijan li te fè wè a; li menm menm li di yo: "Se labou li mete sou je m’, mwen lave kò m’, mwen wè".

Gen kèkzen nan farizyen yo ki t’ap di: "Moun sa a pa vin sot nan Bondye, paske li pa obsève saba a". Dòt menm t’ap di: "Kòman yon moun ki peche kapab fè siy sa yo"? Te gen divizyon nan pami yo. Yo di avèg la ankò: "Ou menm sa ou di osijè sila a ki louvri je ou la"? Li menm li di: "Se yon pwofèt".

Juif yo pa t’ kwè mesye a te avèg epi li vin wè , joustan yo rele paran mesye a ki te vin wè a. Yo poze yo kesyon, yo di: "Sila  a se pitit nou an, sa nou di ki fèt tou avèg la? Kijan l’ fè wè koulye a"? Paran l’ yo reponn, yo di: "Nou konnen sila a se pitit nou an, epi li te fèt avèg. Kijan li fè wè koulye a, nou pa konnen, oubyen kilès ki louvri je l’, nou pa konnen; mande l’: li gen laj, 1’a pale pou kont li". Paran l’ yo te di sa, paske yo te pè Juif yo; sèke Juif yo te deja fè konplo pou si yon moun rekonèt li se Kris la, y’ap mete l’ deyò kay reyinyon an. Se pousa paran l’ yo di: "Li gen laj, poze l’ kesyon".

Konsa yo rele moun nan ki te avèg la, yo di l’: "Fè konpliman pou Bondye, nou menm nou konnen meye sa a se yon pechè". Li menm li di yo: 'Si se yon pechè, mwen pa konnen; yon sèl bagay mwen konnen: Sèke mwen te avèg, koulye a mwen wè". Yo di l’: "Ki sa l’ fè ou? Kijan li louvri je ou"? Li reponn yo "Mwen te deja di nou, epi nou pa t’ kwè: kisa nou vle tande ankò? Èske nou menm tou nou vle vin disip li"?

Yo madichonnen l’, yo di: "Ou menm ou mèt disip li; nou menm se disip Moyiz nou ye. Nou menm nou konnen Bondye te pale ak Moyiz, sila a menm, nou pa konn kote l’ soti".

Mesye a reponn, li di yo: "Se sa a ki dwòl la, nou pa konn kote l’ sòti, epi li louvri je m’. Nou konnen Bondye pa koute pechè yo; men, si yon moun respekte Bondye, epi li fè volante l’, Bondye koute l’. Depi tout tan yo pa janm tande yon moun louvri je yon moun ki fèt tou avèg. Si mesye sa a pa t’ sot nan Bondye, li pa t’ kapab fè anyen. Yo reponn, yo di l’: "Se nan peche ou fèt toutantye, epi w’ap fè nou laleson"? Yo jete l’ deyò.

Jezi tande yo jete l’ deyò, lè l’ jwenn li, li di l’: "Èske ou kwè nan Pitit Bondye a"? Li reponn, li di: "Kilès li ye, Granmèt, pou m’ kwè nan li"? Jezi di l’: "Ou wè l’, se li menm k’ap pale avèk ou a". Li minm li di: "Mwen kwè, Granmèt". Li bese, li adore l’.

Jezi di: "Se pou yon jijman mwen vini sou tè sa a, pou moun ki pa wè yo vin wè, epi pou sa k’ wè yo vin avèg". Kèkzen nan farizyen yo tande, sa k’ te bò kote l’ yo, yo di l’: "Èske nou menm tou nou avèg"? Jezi di yo: "Si nou te avèg, nou pa ta gen peche: men koulye a nou di: 'Nou wè'. Peche nou an rete".

An nou fè lwanj ak konpliman pou Pawòl Bondye a.

REFLEKSYON: Tankou pwovèb la di: pa gen moun ki pi avèg pase sila ki refize wè a. Paske, an plis de moun ki pèdi vizyon fizik la, tankou avèg nan Siloe a, genyen lòt kalite avèg, tankou sila ki ki chwazi pa wè sa li wè oubyen ki chwazi wè sèlman sa li vle wè. Men gen lòt moun tou, malgre yo wè ak je yo, yo pa gen vizyon pou konprann okenn detay fondamantal. Se sila yo ki fè ekspre pou yo pa wè.

Pou sa ki konsène avèg nan levanjil la, nou wè Jezi enterese pou geri li, etan l’ap pase e li wè li. Malgre Jezi te geri avèg la, nou wè farizyen yo t’ap chèche pretèks, kòmsi se pa Jezi ki te fè mirak la. Yo pa t’ vle rekonèt mèvèy sa Jezi te fè nan lavi avèg la.

Yo poze kesyon, yo gade nèg ki te avèg la, yo ekzaminen li, e lè yo wè se yon mirak ki te fèt nan lavi li, yo fè konnen Jezi se pa nan Bondye li sòti akoz li fè gerizon an jou Saba. Men kijan yo montre yo avèg la, yo pa vle ni yo pa kapab wè sa ki fèt devan je yo a. Jiskaprezan, gen anpil ki refize kwè Jezi se vrèman Pitit Bondye, ki gen misyon pou sove tout moun e se nou menm moun ki te klouwe li sou kwa, e li te pote lavikwa sou lanmò a. Nou nan tan Karèm kote n’ap sonje evénman sa a ki fondamantal nan lavi tout moun.

Jezi pa fè mirak pou moun bat bravo pou li ni pou li atire atansyon moun, men se yon fason pou li ede nou rive jwenn Bondye, pou li montre li se temwen vrè Limyè a, li ale pi lwen pase aparans la, li fè nou gade tout bagay nan yon pèspektiv  ki depase sa nou ta kapab konprann.

Petèt, sa rive nou nan lavi a, nan moman difisil yo nou konn gen dout. Konsa tou, nan moman sa yo nou tankou farizyen yo ki avèg, nou pa vle wè grandè Jezi.

Nan tan Karèm sa, nou gen opòtinite pou nou priye pou sila yo ki chwazi avèg, pou sila yo ki poko wè, sila yo ki refize wè misyon Jezi a, pou nou priye tou pou sila yo ki pito lòt yo pa wè.

LAPRIYЀ: Granmèt, mwen se yon avèg. Tanpri, geri mwen. Mwen kwè, mwen vle kwè plis toujou.

PWOPOZISYON: M’ap dekouvri k isa ki anpeche mwen wè bèlte Bondye k’ap aji nan pwochen mwen.