MЀKREDI 2-5-2018

Koulè Blan

ATANAZ KI SEN, Evèk e Savan sakre Legliz la

(Memwa)

PREMYE LEKTI

"Yo deside pou yo monte kot Apot yo ak ansyen yo Jerizalèm osijè kesyon sa a".

LEKTI TRAVAY APOT YO 15, 1-6

Jou sa yo:

Gen kèk moun ki desann sot nan Lajide, yo t’ap anseye frè yo: "Si nou pa resevwa lasikonsizyon daprè abitid Moyiz la, nou pa kapab sove". Vin gen diskisyon ki pa piti ant Pòl ak Banabe kont yo, yo deside pou Pòl ak Banabe monte avèk kèkzen nan lòt yo kot Apot yo ak prèt yo Jerizalèm poutèt kesyon sa a. Yo menm, Legliz la kondui yo, yo travèse Fenisi, ak Samari, y’ap rakonte kijan payen yo chanje wout vin nan lafwa; yo fè tout frè yo vin gen gran kè kontan. Lè yo rive Jerizalèm, Legliz la ak Apot yo ak ansyen yo resevwa yo, yo anonse tout sa Bondye te fè avèk yo. Men gen kèkzen nan ti gwoup farizyen yo ki te gen lafwa yo ki leve, yo di se pou payen yo resevwa sikonsizyon, epi se pou yo pase yo lòd pou yo obsève lalwa Moyiz la. Apot yo ak ansyen yo rasanble pou yo ekzamine kesyon sa a.

Pawòl Granmèt la.

SÒM REPONS 121, 1-2. 3-4a. 4b-5 (r.: 1)

R/ Nan lakay Granmèt la n’a prale ak kè kontan.

Mwen kontan poutèt yo di m’: "nan lakay Granmèt la n’a prale"

Pye nou deja kanpe nan pòt ou yo, Jéruzalèm.R.

Sèke se la ras yo ap monte, ras Granmèt la, temwayaj Izrayèl, pou fè lwanj non Granmèt la.

Sèke se la fotèy yo enstale pou jijman an, fotèy kay David la.R

LEVANJIL

"Moun ki rete nan mwen, epi mwen menm nan li, moun sa a pote anpil fwi".

MEN BÒN NOUVÈL JEZIKRI A DAPRÈ SEN JAN 15, 1-8

Lè sa a: Jezi di disip li yo:

"Mwen se veritab pye rezen an, Papa m’ se kiltivatè a. Tout branch nan mwen ki pa donnen fwi, l’ap wete l’; tout branch ki donnen fwi, l’ap netwaye l’ pou l’ donnen plis fwi. Nou menm nou deja pwòp gras a pawòl la mwen te pale nou an. Rete nan mwen, epi mwen menm nan nou. Menm jan branch la pa kapab donnen fwi pou kont li a, si l’ pa ret nan pye rezen an, konsa tou nou menm non plis, si nou pa rete nan mwen. Mwen se pye rezen an, nou se branch yo; moun ki ret nan mwen, epi mwen menm nan li, moun sa a donnen anpil fwi, paske san mwen menm nou pa kapab fè anyen. Si yon moun pa ret nan mwen, y’ap jete l’ deyò, tankou branch la, l’ap seche, y’ap ranmase l’ y’ap jete l’ nan dife, l’ap boule. Si nou ret nan mwen, epi pawòl mwen yo rete nan nou, tout sa nou vle, nou mèt mande l’, l’ap rive pou nou. Se nan sa Papa m’ jwenn bèlte l’, pou nou donnen anpil fwi, pou nou vin disip mwen".

An nou fè lwanj ak konpliman pou pawòl Bondye a.

REFLEKSYON: Frè ak sè m’ yo, nan filozofi yo di konsa chak bagay genyen yon nannan ki fè l’ sa l’ ye a. Sa vle di chak bagay gen yon prensip ki di sa l’ ye. Menm jan tou pou nou menm ki se kretyen gen yon bagay a la baz ki fè yo ka idantifye nou kòm kretyen. Nou se kretyen paske nou se patizan Jezikri. E pandan tout lavi nou, nou pa dwe bliye sa. Se tankou yon chanson pou n’ap chante chak jou e chache ranje lavi nou jan Jezi mande sa. Tèks nou sot li jodi a prezante nou yon mesaj ki klè, yon mesaj ki pa mande anpil eksplikasyon. Si nou ta pran pati sa a: « Mwen se veritab pye rezen an, Papa m’ se kiltivatè a. Tout branch nan mwen ki pa donenn fwi, l’ap jete l’; tout branch ki donenn fwi, l’ap netwaye l’ pou l’ donenn plis fwi ». Nou ta ka di ke lavi nou se tankou yon branch bwa ki atache l’ ak yon pye bwa. Pye bwa sa a ki se Jezi ki defini tèt li kòm Chemen an, Verite a ak Lavi a, se nan li nou jwenn lavi.

Konsa, depi nou detache de li nou pèdi tout nannan lavi nou. Sa vle di, sa ki fè nou sa nou ye a. Nou se moun, nou se pitit Bondye. E n’ap rete moun e pitit Bondye si nou rete soude ak Jezi. Jou nou deside fè otreman, nou p’ap ni moun ankò, ni pitit Bondye tou. Se travay sa a peche a fè. Nou chak dwe pran yon ti tan pou gade nan lavi nou ki sa k’ fè l’ detache de Jezi, ki fè l’ pa ka bay fwi. Nou konnen trè byen fwi sa yo, se renmen, lapè, la charite, pataj elatriye. Nou ta kapab di tout sa ki sòti nan Jezi, sous lavi a. Si nou rete soude ak Jezi, epi pawòl li yo rete nan nou, tout sa nou vle, nou mèt mande l’, l’ap rive pou nou. Paske se Jezi li menm menm k’ap viv nan nou e se Lespri Sen an k’ap priye nan nou.

LAPRIYÈ: Granmèt ede nou manifeste epi konsève idantite nou kòm kretyen nan mond sa k’ap transfòme chak jou pi plis.

PWOPOZISYON: M’ap rete soude ak Bondye Papa nan lapriyè pou nou ka gen lavi nan li. An nou fè solidarite youn ak lòt antan youn ap ede lòt.