DIMANCH 1-7-2018

Koulè Vèt

TRÈZYÈM DIMANCH ÒDINÈ, ANE-B.

PREMYE LEKTI

"Se poutèt lanvi dyab la lanmò a antre sou fas tè a".

LEKTI LIV LASAJÈS 1, 13-15; 2, 23-25.

Bondye pa t’ fè lanmò, ni li pa kontan poutèt vivan yo k’ap pèdi a; sèke li te kreye tout bagay, pou yo ekziste, li te fè nasyon yo an sante sou fas tè yo; pa gen pwazon lanmò nan yo, ni rèy lanfè sou tè a; sèke jistis la dire tout tan, li p’ap kapab mouri.

Sèke Bondye te kreye moun nan pou l’ pa t’ mouri, epi se sou pòtre resanblans li li te fè l’. Se lanvi dyab la ki lakòz lanmò a vin antre sou fas tè a; sila yo ki disip li yo, y’ap pran modèl sou li.

Pawòl Granmèt la.

SÒM REPONS 29, 2 e 4. 5-6. 11 e 12a 13b (r.: 2a)

R/ M’ap fè lwanj ou, Granmèt, paske ou delivre m’.

M’ap fè lwanj ou, Granmèt, paske ou delivre m’, ou pa bay lènmi m’ yo kè kontan sou do m’.

Granmèt, ou wete lavi m’ sot anba tè a, ou fè m’ viv, pou m’ pa desann nan fòs la.R.

Chante pou Granmèt la, sen l’ yo, fè lwanj pou souvni l’ ki sen.

Sèke pou yon moman kòlè l’ rive, men se pou lavi renmen l’ nan dire.

Nan aswè gen dlo nan je, nan maten se kè kontan.R.

Koute, Granmèt, pran pitye pou mwen Granmèt, pote m’ sekou.

Ou chanje plent mwen an nan chante dans.

Granmèt Bondye m’, pou tout tan m’ap fè lwanj ou.R.

DEZYÈM LEKTI

"Sa nou gen ki twòp la, se pou l’ konble sa frè nou yo ki pòv yo a pa genyen an".

LEKTI DEZYÈM LÈT APOT PÒL KI SEN POU KORENTYEN YO 8, 7. 9. 13-15

Frè m’ yo:

Menm jan nou plen nan tout bagay ak lafwa ak pawòl ak konesans ak tout kalite devouman, sitou ak charite nou genyen ki sòti nan nou menm nan, se pou nou fè anpil tou pou pote lòt yo konkou nan mizè yo.

Nou konnen favè Granmèt nou Jezikri, poutèt nou vin pòv, malgre li te rich, pou nou te kapab vin rich antan l’ vin pòv.

Yo pa mande pou nou nan tray pou soulaje lòt yo, men se egalite. Koulye a sa nou genyen ki twòp la, se pou l’ konble sa yo manke, pou sa yo menm y’ap gen ki twòp la tou, li rive konble sa nou menm nou manke a, pou kapab gen egalite, daprè sa labib la di: "Moun ki te gen anpil la, li pa t’ gen twòp, moun ki te gen ti kras la, li pa t’ manke".

An nou fè lwanj ak konpliman pou pawòl Bondye a.

LEVANJIL

"Ti fi, mwen di ou, leve".

MEN BÒN NOUVÈL JEZIKRI A DAPRÈ SEN MAK 5, 21-43

Lè sa a:

Kòm Jezi te travèse ankò nan batiman an lòt bò lanmè a, gen yon gran foul moun ki vin jwenn li; li te bò lanmè a. Gen youn nan chèf kay reyinyon yo ki rive, yo te rele l’ Jayi; lè l’ wè l’, li tonbe nan pye l’; li t’ap lapriyè l’ anpil, li t’ap di: "Pitit fi m’ nan prèske mouri; vini poze men sou li, pou l’ kapab sove, pou l’ viv". L’ale avèk li, yon gran foul moun t’ap suiv li, yo t’ap kraze l’.

Gen yon madanm, ki t’ap pèdi san depi douzan, li te deja konsilte anpil doktè ki te preskri l’ anpil remèd, li te fin depanse tout richès li, men li pa t’ jwenn okenn rezilta, okontrè se pi mal li t’ap vin pi mal; lè l’ tande pale sou Jezi, li vin nan foul la, dèyè, li touche rad li. Li t’ap di: "Si o mwen mwen touche rad li, m’ap sove". Menm lè a sous san l’ nan tari, li santi nan kò l’ li te geri sot nan maladi a.

Menm lè a Jezi rekonèt anndan l’ gen yon fòs ki te sòti nan li, li vire kot foul la, li t’ap di: "Kilès ki touche rad mwen an".

Men disip li yo t’ap di: "Ou wè foul la k’ap kraze ou, epi w’ap di: «Kilès ki touche m’?» Men li vire pou l’ wè madanm nan ki te fè bagay sa a. Madanm nan menm te pè, li t’ap tranble, li te konnen sa k’ te pase nan li, li vini, li lage kò l’ devan l’, li di l’ tout laverite.

Li menm menm li di l’: «Mafi, lafwa ou sove ou; ale ak lapè, se pou ou geri sot nan maladi ou la».

Pandan li t’ap pale toujou, moun yo vin kot chèf kay reyinyon an, yo di: «Ti fi ou la mouri; pouki sa w’ap trakase Mèt la? »

Jezi menm, lè l’ tande pawòl yo te di a, li di chèf kay reyinyon an: «Pa pè; se pou ou kwè sèlman». Li pa pèmèt pèsòn suiv li, sof Pyè, Jak avèk Jan, frè Jak la.

Yo rive nan kay chèf kay reyinyon an, li wè bwi, moun k’ap kriye, k’ap rele anpil. Li antre, li di yo: «Pouki sa nou twouble, n’ap kriye a? Ti fi a pa mouri, se dòmi l’ap dòmi». Yo t’ap pase l’ nan rizib.

Li menm menm, li mete tout moun deyò, li pran papa ak manman ti fi a epi moun yo ki te avèk li a; li antre kote ti fi a te kouche a. Li kenbe men ti fi a, li di l’: «Talita, koumi»; sa vle di: «Ti fi, mwen di ou, leve». Menm lè a ti fi a leve, li t’ap mache (li te gen douzan); yo te sezi yon gran sezisman. Li pase yo lòd sevè pou pèsonn pa konn sa; li di pou yo ba l’ manje.

An nou fè lwanj ak konpliman pou pawòl Bondye a.

REFLEKSYON: Anpil moun t’ap suiv Jezi paske yo te rekonèt grandè ak pwisans li. Se konsa chèf sinagòg la, Jayi, te vin met ajenou nan pye l’ pou l’ te mande l’ fè kichòy pou pitit fi li a ki te malad, pou l’ te kapab sove li, Jezi te tande rèl lapriyè li. Men pandan li sou wout la, li rankontre ak yon dam ki t’ap pèdi san depi douzan, doktè pa t’ kapab fè anyen pou li. Dam sila a te tande pale de Jezi epi li te kwè si l’ ta rive touche rad Jezi omwen l’ap jwenn gerizon paske l’ te gen lafwa epi l’ te kwè Jezi te kapab sove l’’.

Se konsa lè l’ te wè Jezi, li te antre nan foul la pou l’ te kapab touche l’, epi l’ te rive touche l’ vre: menm lè a Jezi te santi l’ pèdi yon fòs epi l’ te mande ki moun ki te touche l’ la. Apot yo t’ap ri paske Jezi te nan mitan yon fou l’ moun epi l’ t’ap mande kiyès ki touche l’ la! Dam ki t’ap pèdi san an kouri vin met ajenou nan pye Jezi epi l’ te rakonte l’ tout bagay, epi Jezi te di l’ lafwa l’ sove l’. Non sèlman dam nan te jwenn gerizon, men Jezi te di l’ lafwa l’ sove li; sa vle di li jwenn tikè pou lavi ki p’ap janm fini an.

Frè ak sè m’ yo, menm jan ak madam sa, ann chèche gen yon lafwa solid pou n’ ka rive kwè tout bon vre anyen pa enposib pou moun ki kwè nan Bondye, konsa n’a rive jwenn tikè pa nou pou lavi ki p’ap janm fini an. Kòm Jezi pa t’ sòti pou dam nan, foul la kontinye wout li. Epi se konsa te gen kèk moun ki sòti kay Jayi, yo di li li mèt kite Mèt la trankil paske tifi a gen tan mouri. Jezi di Jayi li pa bezwen pè epi fè l’ konfyans. Èske nou kwè tout bon vre, frè ak sè m’ yo, anyen pa enposib pou moun ki kwè nan Bondye?

Jezi pran Pyè jak, Jan ak Jayi yo ale, lè yo rive yo wè tout moun ap kriye, Jezi mande yo poukisa tout rèl sa yo? Epi li di yo tifi a pa mouri, se dòmi l’ap dòmi. Men moun ki te la yo pa t’ kwè nan li, yo t’ap joure l’, pase l’ nan rizib. Lè Jezi wè sa, li fè tout sòti. Li pran mesye yo ki te akonpanye l’ yo ak papa ak manman tifi a, yo antre kot tifi a te ye a. Jezi pran men tifi a, li di l’ «talitha koum», sa vle di, «pitit fi mwen, leve»!

Pou Jezi, lanmò pèdi pouvwa. Tout swit aprè tifi a fin leve, li kòmanse mache, li te gen douzan. Moun ki te la yo te sezi anpil, men Jezi te di yo piga yo pale sa, apre l’ te mande pou yo te bay tifi a manje. Lavi ranpòte laviktwa sou lanmò. Si nou kwè tout bon vre nan Bondye, menm si nou ta kouche nan sèkèy, li kapab delivre nou. Mwen ankouraje nou chak jou pi plis pou n’ met konfyans nou nan Granmèt la, chèche fè volonte l’ nan tout sa n’ap fè, ak tout sa n’ap di, epi tout kote nou pase. Konsa l’a toujou pran defans nou, tout kote nou ye ak nan tout sitiyasyon.

LAPRIYÈ: Granmèt, tanpri, vin kraze sèkèy nou yo, ba nou yon lavi tou nèf. Pa pouvwa Jezikri.

PWOPOZISYON: Jezi pote laviktwa sou lanmò: m’ap kenbe li dyanm pou m’ ka gen laviktwa avèk li.