VANDREDI 9-11-2018

Koulè Blan.

KONSEKRASYON GRAN LEGLIZ LATRAN-AN.

Fèt.

PREMYE LEKTI

NAN LIV PWOFÈT EZEKYÈL EZ 47, 1-2.8-9.12

Aprè sa, nonm lan mennen m' tounen devan pòtay pou antre nan Tanp lan. Mwen wè yon dlo k'ap soti anba pa­pòt kay la, li t'ap koule nan direksyon solèy leve. Se nan direksyon sa a pòtay Tanp lan te bay tou. Dlo a t'ap koule desann soti anba fondasyon ki sou bò sid Tanp lan, li pase adwat sou bò sid lotèl la. Nonm lan fè m' soti kite lakou Tanp lan. Mwen pase nan pòtay nò a, nou fè yon detou jouk nou rive bò pòtay ki bay sou solèy leve a. Yon ti dlo t'ap koule soti nan kwen sid pòtay la. Li di m' konsa: Dlo sa a ap koule desann, l'ap travèse pòs­yon tè ki bay sou solèy leve a, jouk li rive nan Fon Jouden an pou l' ton­be nan Lanmè Mouri a. Lè l'a tonbe nan Lanmè mouri a, l'ap fè dlo sale a tounen dlo dous. Tout kote dlo a ap koule pral gen tout kalite bèt ak pwa­son.

Dlo larivyè a pral fè dlo Lanmè Mouri a tounen dlo dous. Kote dlo a pase, l'ap bay lavi. Sou de bò lari­vyè a, tout kalite pyebwa pral pouse pou bay fwi pou moun manje. Fèy yo p'ap janm fennen, yo p'ap janm sispann donnen. Y'ap bay yon donn chak mwa, paske dlo k'ap koule soti nan Tanp lan pral wouze yo. Pyebwa yo pral bay fwi pou moun manje. Fèy yo ap sèvi renmèd.

Pawòl Granmèt la.

SÒM REPONS 45, 2-3. 4-5. 89-9 (r.: 5)

R/ Kouran rivyè yo met kè kontan nan vil Bondye-a, nan tant Sa-a ki anwo nèt la, nan joupa ki sen yo.

Bondye se kachèt nou ak fòs nou,

li pote nou anpil sekou nan tray nou yo.

Se pousa nou pap pè, menm si tè-a chanje,

menm si mòn yo travèse nan fon lanmè-a.R.

Kouran rivyè yo met kè kontan nan vil Bondye-a,

nan tant Sa-a ki anwo nèt la, nan tant ki sen yo.

Bondye nan mitan l’, li p’ap souke;

Bondye ap pote l’ sekou granmaten devan jou.R.

Granmèt lame yo avèk nou,

kachèt pou nou, Bondye Jakòb la.

Vini, n’a wè travay Granmèt la,

li mete mèvèy sou tè a.R.

DEZYÈM LEKTI

"Nou se Tanp Bondye a".

LEKTI PREMYE LÈT APOT PÒL KI SEN POU KORENTYEN YO 3, 9b-11.16-17

Frè m’ yo:

Nou se kay Bondye. Daprè gras Bondye-a, sa l’ fè m’ nan, mwen poze fondasyon tankou yon enjenyè ki gen sajès; yon lòt bati sou li. Men se pou chak moun gade byen kijan l’ap bati sou li. Sèke pèsòn pa kapab poze dòt fondasyon pase sa k’ deja poze-a, sa vle di Jezikri.

Èske nou pa konnen se Tanp Bondye-a nou ye, epi Espri Bondye-a abite nan nou? Si yon moun derespekte Tanp Bondye a, Bondye ap fini ak li. Sèke Tanp Bondye a sen, epi kay Tanp sa a se nou menm.

Pawòl Granmèt la.

LEVANJIL

"Li t’ap pale osijè tanp kò l’ la".   

MEN BÒN NOUVÈL JEZI KRI A DAPRÈ JAN KI SEN JN 2, 13-22

Fèt Delivrans jwif yo te vanse rive. Se konsa Jezi moute Jerizalèm. Li jwenn yon bann moun nan tanp lan ki t'ap vann bèf, mouton ak pijon. Gen lòt menm ki te chita dèyè tab yo ap chanje lajan. Li pran kèk kòd, li mare yo ansanm, li fè yon fwèt ak yo. Epi li mete tout moun yo deyò nan tanp lan ansanm ak tout mouton yo ak tout bèf yo. Li chavire tab moun ki t'ap chan­je lajan yo, li jete tout kòb yo atè. Li di moun ki t'ap vann pijon yo: Wete sa la. Pa fè kay Papa m' lan tounen yon boutik kote yo fè komès. Disip li yo vin sonje pawòl sa yo ki te ekri nan Liv la: O Bondye, mwen sitèl­man renmen kay ou a, mwen santi se tankou yon dife k'ap boule tout ann­dan mwen. Jwif yo mande li: Ki mi­rak ou ka fè pou moutre nou ou gen dwa fè sa w'ap fè la a? Jezi reponn yo: Kraze tanp sa a koulye a. Nan twa jou m'ap rebati l' ban nou. Jwif yo di li: Yo pran karannsizan pou yo bati tanp sa a, pou ou menm, pou ou ta pran twa sèl jou pou rebati li? Men Jezi li menm, lè l' t'ap di mo tanp lan se pwòp kò li li te gen nan tèt li. Lè Jezi leve soti vivan nan lanmò, disip li yo vin sonje li te di sa. Se konsa yo te kwè sa ki te ekri nan Liv la ansanm ak tout pawòl Jezi te di yo.

An nou fè lwanj ak konpliman pou pawòl Granmèt la.

REFLEKSYON: Nan premye lekti a, yo pale de dlo k’ap desanm. Sa ka fè nou sonje sans dlo genyen nan Labib ak nan Legliz la. Se yon senbòl ki chaje ak sans nan batèm nou. Sa fè nou sonje dlo se senbòl pirifikasyon pou nou; lè nou batize, se plonje nou plonje nan lanmò Jezikri pou nou kapab leve vivan ansanm ak Li pou n’ fè yon sèl ak Jezi Kri nan Bondye lavi a. Dlo se Lavi.

Nan Levanjil la, nou konstate kalite travay Jezi t’ap fè nan tanp lan. Nou ta kapab poze tèt nou kesyon: Men sa k’ap pase konsa? Sa ki pase Jezi menm? Jezi ap preche nou lapè, lanmou epi l’ap aji konsa?  Men sa ki enpòtan se pou nou chèche konnen kisa ki pouse Li aji nan fason sa a epitou kisa Li vle di nou jodi a.

Jezi te vle fè volonte Papa a nèt ale. Se li ki te di: «Mwen pa vini pou moun ki gaya yo men se pou sila yo ki bezwen doktè».Nou menm tou, an nou sonje kè nou se espas pou nou rankontre ak Bondye, an nou mande li ede nou debarase li ak tout move santiman ki ranpli li e ki anpeche nou rankontre ak Li tout bon vre.

LAPRIYÈ: Bondye, tanpri kraze kè di mwen an, ban mwen yon kè mizerikòd, ki ouvè pou akeyi tout frè ak sè mwen yo.

PWOPOZISYON: Legliz la se espas kote Bondye manifeste prezans li, mwen p’ap fè li tounen biznis. Bondye vle abite nan kè mwen, m’ap netwaye li, pou m’ wete move santiman ki ladan l’.