DIMANCH 24-3-2019

Koulè Vyolèt

TWAZYÈM DIMANCH KARÈM, ANE-C

PREMYE LEKTI

"Sila a ki toujou la a voye m’ kote nou".

NAN LIV EKZÒD

3, 1- 8a. 13-15

Jou sa yo:

Moyiz t’ap gadiyen mouton Jetwo, bòpè l’, prèt Madyan; antan l’ap kondui bann mouton yo nan fon savann nan, li rive sou mòn Bondye a, Orèb. Granmèt la parèt devan l’ nan yon flanm dife, andan yon touf raje; li wè touf raje a ap flanbe san l’ pa fè sann.

Moyiz di: "M’ap pwoche pou m’ wè kalite gran vizyon sa a; pouki touf raje a pa fè sann nan". Granmèt la obsève kijan li t’ap pwoche pou l’ gade, li rele l’ antan l’ nan touf raje a, li di: "Moyiz, Moyiz”!

Li reponn: "Men mwen".

Li di: "Pa pwoche isit la; wete sapat ou nan pye ou: sèke tè kote ou kanpe a, se yon tè ki sen". Li di: "Se mwen menm Bondye zansèt ou a, Bondye Abraam, Bondye Izaak, ak Bondye Jakòb". Moyiz kache fas li; sèke li pa t’ oze fikse je l’ pou l’ kontre ak Bondye.

Granmèt la di l’: "Mwen wè tray pèp mwen an nan Lejip, mwen tande rèl li, poutèt move tretman chèf travay yo ap fè l’ sibi, mwen konnen doulè l’, mwen desann pou m’ delivre l’ sot nan men Ejipsyen yo, m’ap fè l’ soti nan tè sa a, pou m’ kondui l’ nan yon tè ki bon, ki laj, nan yon tè kote se lèt ak myèl k’ap koule".

Moyiz di Bondye: "Men m’a pral kot pitit Izrayèl yo, m’ap di yo: Bondye zansèt nou yo voye m’ kote nou. Si yo di m’: Ki non l’? Kisa pou m’ di yo"?

Bondye di Moyiz toujou: "Men sa w’a di pitit Izrayèl yo:

"Granmèt Bondye zansèt nou yo, Bondye Abraam, Bondye Izaak ak Bondye Jakòb voye m’ kote nou; se non sa a m’ap gen pou tout tan, se souvni m’ sa pou jenerasyon ak jenerasyon".

Pawòl Granmèt la.

SÒM REPONS

102, 1-2. 3-4. 6-7. 8 e 11

R/ Granmèt la pran pitye, li sansib.

Fè konpliman pou Granmèt la, nanm mwen;

tout sa k’ andan m’, fè konpliman pou non l’ ki sen.

Fè konpliman pou Granmèt la, nanm mwen, pa bliye tout sa l’ fè yo.R.

Li menm ki padonnen tout fot ou yo, ki geri tout maladi ou yo;

li menm ki delivre lavi w’ sot nan fòs la, ki kouwonnen ou ak kè sansib, ak pitye.R.

Granmèt la fè jistis ak jijman pou tout moun k’ap soufri afwon.

Li fè Moyiz konnen chemen l’ yo, li fè pitit Izrayèl yo konnen mèvèy li yo.R.

Granmèt la pran pitye, li gen kè sansib, li pran pasyans, li gen anpil kè sansib.

Sèke otan syèl la wo anlè tè a, kè sansib li debòde sou sila yo ki respekte l’ yo.R.

DEZYÈM LEKTI

"Lavi pèp la avèk Moyiz nan savann nan, se pou ledikasyon nou yo te ekri li".

NAN PREMYE LÈT APOT PÒL POU KORENTYEN YO 10. 1-6.10-12

Mwen pa vle nou pa konn sa, frè m’ yo, sèke zansèt nou yo, yo tout te anba nyaj la, yo tout te travèse lanmè a, yo tout te batize nan Moyiz nan nyaj la ak nan lanmè a, yo tout te manje menm manje lespri a, yo tout te bwè menm bwason lespri a (sèke yo t’ap bwè nan wòch lespri a ki t’ap suiv yo a; wòch sa a se te Jezikri). Men se pa pifò nan yo ki te fè Bondye plezi, paske yo te tonbe nan savann nan.

Bagay sa yo menm, se nan pòtre yo rive pou nou, pou nou pa mèt lide nou sou sa k’ mal, tankou yo menm yo te met lide yo sou sa a. Pa babye, tankou kèkzen nan yo te babye, Sila a k’ap touye a te fè yo peri.

Tout bagay sa yo menm se nan pòtre yo te touche yo; men yo ekri yo pou ledikasyon nou, nou menm ki rive nan finisman syèk tan yo. Se pousa moun ki konprann li kanpe, se pou l’ fè atansyon pou l’ pa tonbe.

Pawòl Granmèt la.

LEVANJIL

"Si nou pa fè penitans, nou tout ap peri menm jan".

MEN BÒN NOUVÈL JEZIKRI A DAPRÈ LIKKI SEN 13,1-9

Gen kèk moun ki pwoche lè sa a, yo pote nouvèl bay Jezi sot Lagalile, osijè moun yo Pilat te mele san yo avèk sakrifis yo t’ap ofri yo; li pran lapawòl, li di yo:

"Èske nou kwè Galileyen sa yo te fè peche plis pase tout Galileyen yo, pou yo soufri kalite bagay sa yo? Non, mwen di nou; men si nou pa fè penitans, nou tout ap peri menm jan".

Li t’ap di yo parabòl sa a tou: "Yon mesye te gen yon pye fig frans ki te plante nan jaden rezen l’; li vin chèche fwi ladan l’, li pa jwenn. Li di jeran jaden pye rezen an: "Sa fè twazan m’ap vin chèche fwi nan pye fig frans sa a, epi mwen pa jwenn; koupe l’ poukisa pou l’ap okipe plas nan tè a?

Jeran an reponn, li di l’: "Mèt", kite l’ ane sa a ankò, joustan mwen fouye alantou l’, mwen mete fimye; pètèt l’ap donnen fwi, otreman, w’a koupe l’ aprè".

An nou fè lwanj ak konpliman pou pawòl Bondye a.

REFLEKSYON: Pawòl Bondye jodi a envite nou fè penitans, yon atitid pwòp tan karèm nan.

Kisa penitans la ye?

Penitans la se pa lè nou mete yon rad sak,  oubyen yon rad devosyon sou nou pou lapriyè, pwomennen tout kote nan jèn pou yon pwoblèm nou genyen; se pa liminen sou non lòt la pou madichonnen li. Penitans, se chèche Bondye pi plis, se chèche mete nou chak jou pi plis pi pre Granmèt la. Bondye envite nou avanse vin jwenn li, se yon envitasyon pou nou pran wout konvèsyon, pou nou chanje mantalite; penitans se pataj, se mete tout konfyans nou nan Bondye epi nan li menm sèl, se rete kole sou Bondye. Paske li se sila a ki toujou la, Sila a ki p’ap janm lage nou, tankou li te di Moyiz la: «Mwen se Bondye zanzèt nou yo, mwen se sila ki toujou la, Bondye tout bon vre a».

Lè a rive, pa pèdi tan. Vin jwenn Bondye. Sa w’ap tann frè m’, sa w’ap tann sè m’? Kite move chemen an, kite zidòl yo: zansèt nou yo te sèvi yo, yo pa regle anyen pou yo; se mizè yo kite pou nou, se nan prizon bagay sa yo ap mete nou, y’ap fè n’ tounen esklav. Pa aksepte tounen esklav peche ankò. Jezi vini pou delivre nou, apiye w’ sou li, li sèl Granmèt. Vini jwenn li, kore w’ sou li. Priye, veye pou satan pa pran w’ nan pèlen. Bondye renmen nou, li mande nou renmen, fidelite; se sa li mande nou, pou li ka ba nou lavi a gogo, lavi san limit. Se pou Bondye beni nou tout byen beni!

LAPRIYÈ: Granmèt, ede nou konvèti tout bon vre pou nou kapab tounen moun nouvo nan ou. Konsa nou p’ap peri nan pyèj satan. Pa pouvwa Jezikri. Amèn

PWOPOZISYON: M’ap chèche viv nan renmen ak mizerikòd antan m’ap fè jefò pou mwen kole sou Bondye chak jou pi plis.