DIMANCH 31-3-2019

Koulè vyolèt

KATRIYÈM DIMANCH KARÈM, ANE C

PREMYE LEKTI

"Pèp Bondye a antre nan tè yo te pwomèt li a, l’ap fete Pak la".

NAN LIV JOZYE 5, 9a.10-12

Jou sa yo:

Granmèt la di Jozye: "Jodi a mwen wete lawont Lejip la sot sou nou".

Pitit Izrayèl yo ret Gilgal, yo fè Pak la katòzyèm jou mwa a, nan aswè, nan plenn Jeriko yo, yo manje nan fwi tè a nan landmen: pen san leven ak ble ane sa a.

Lamán nan sispann tonbe, lè yo fin manje nan fwi tè a, pitit Izrayèl yo pa t’ sèvi ak manje sa a ankò, men yo manje nan fwi tè Kanaan an te donnen ane sa a.

Pawòl Granmèt la.

SÒM REPONS

33 2-3. 4-5. 6-7

R/ Goute, n’a wè kijan Granmèt la bon.

M’ap fè konpliman pou Granmèt la tout tan, tout tan lwanj li nan bouch mwen.

Nan Granmèt la nanm mwen ap jwenn bèlte l’, se pou pòv yo tande, pou yo kontan.R.

Fè lwanj Granmèt la avèk mwen, se pou nou leve non l’ anlè ansanm.

Mwen chèche Granmèt la, li reponn mwen, anba tout sa k’ fè m’ pè, li delivre m’.R.

Gade nan direksyon l’, n’ap klere, fas nou p’ap wont.

Pòv sa a rele, Granmèt la tande l’ anba tout tray li sove l’.R.

DEZYÈM LEKTI

"Bondye rekonsilye nou pa lentèmedyè Jezikri".

NAN DEZYÈM LÈT APOT PÒL KI SEN, POU KORENTYEN YO 5, 17-21

Si gen yon nouvo kreyati nan Jezikri, ansyen an pase: men tout bagay vin sot nan Bondye, li menm ki rekonsilye nou pa lentèmedyè Jezikri, li ba nou sèvis rekonsilyasyon an. Sèke se Bondye ki te nan Jezikri, l’ap rekonsilye tè a avèk li, li pa konsidere fot moun yo te fè, li mete pawòl rekonsilyasyon an nan bouch nou. Pou Jezikri nou sèvi komisyonè, se tankou si se Bondye k’ap bay ankourajman pa lentèmedyè nou.

N’ap ensiste kote nou pou Jezikri, kite yo rekonsilye nou avèk Bondye. Li menm ki pa t’ konnen peche a, li fè l’ vin tounen pechè pou nou, pou nou te kapab vin tounen jistis Bondye nan li.

Pawòl Granmèt la.

LEVANJIL

"Frè w’ la ki la a, li te mouri, li reviv".

MEN BÒN NOUVÈL JEZIKRI A DAPRÈ LIK KI SEN 15, 1-3. 11-32

Lè sa a:

Pibliken yo ak pechè yo t’ap pwoche kot Jezi, pou yo koute l’. Farizyen yo ak pwofesè yo t’ap babye, yo t’ap di: "Sila a resevwa pechè yo, li manje avèk yo".

Li di parabòl sa a pou yo, li di:

"Te gen yon mesye ki te gen de pitit, pi jèn nan yo a di papa a: "Papa, ban m’ pòsyon eritaj ki destine pou mwen an". Li separe eritaj la ba yo. Pa gen anpil jou ki pase, pi jèn ti gason an ranmase tout afè l’, li pati, l’al fè wout li nan yon peyi byen lwen lè l’ rive la, li gaspiye eritaj li a antan l’ap viv nan libètinaj.

Lè l’ fin depanse tout bagay, vin gen yon gwo grangou nan rejyon sa a, li menm li kòmanse nan bezwen. Li pati, 1’al nan sèvis yon mesye nan peyi sa a, mesye a voye l’ nan jaden l’, pou l’ gade kochon. Li te anvi plen vant li ak grenn bwa yo, sa kochon yo t’ap manje yo; men pèsòn pa t’ ba li.

Li antre nan fon kè l’, li di: "Konbyen jounalye nan lakay papa m’ gen kont pen yo, kanta mwen menm menm m’ap mouri grangou isit la! M’ap leve, m’a pral lakay papa m’, m’ap di l’: Papa, mwen fè peche kont syèl la ak devan ou: mwen pa merite ankò pou yo rele m’ pitit ou: trete m’ tankou youn nan jounalye w’ yo". Li leve, li vin jwenn papa l’.

Pandan l’ te lwen toujou, papa l’ wè l’, kè l’ boulvèse ak sansibilite, li kouri, li lage kò l’ nan kou l’, li anbrase l’. Pitit la di l’: "Papa, mwen fè peche kont syèl la ak devan ou: mwen pa merite ankò pou yo rele m’ pitit ou".

Papa a menm di sèvitè yo: "Fè vit pote pi bèl rad la, abiye l’; mete yon bag nan men l’, ak soulye nan pye l’. Mennen towo a yo t’ap angrese a, touye l’, n’ap manje, n’ap fete; paske pitit mwen sa a ki te mouri a, li reviv, li te peri, nou jwenn li". Epi, yo kòmanse fete.

Men pi gran pitit li a te nan jaden, lè l’ rive li pwoche bò kay la, li tande chante-danse, li rele youn nan sèvitè yo, li poze l’ kesyon ki kalite bagay sa yo. Sila a menm di l’: "Se frè w’ la ki vini, papa w’ fè touye towo a yo t’ap angrese a, paske li jwenn pitit la an sante". Lòt la menm fache, li refize antre; papa l’ blije sòti, li kòmanse lapriyè l’. Li menm menm li reponn, li di papa l’: "Men konbyen ane m’ap sèvi w’, mwen pa janm dezobeyi yon kòmandman w’ epoutan ou pa janm ban m’ yon ti kabrit, pou m’ fete avèk zanmi m’ yo; men pitit ou sa a, ki fin devore eritaj li a avèk fi move vi, kon l’ rive, ou touye towo yo t’ap angrese a, akòz li".

Li menm li di l’: "Pitit mwen, ou toujou avèk mwen, tout sa m’ genyen se pou ou. Sèlman se pou nou te fete, se pou nou te fè kè nou kontan, paske frè w’ sa a te mouri, li reviv, li te peri, nou jwenn li".

An nou fè lwanj ak konpliman pou pawòl Bondye a.

REFLEKSYON: Chak ane Legliz la, Manman nou, ba nou posiblite pou n’evalye, relasyon nou genyen avèk Bondye, pou nou ka vin pi pwòch li antan nou youn soude ak lòt, antan n’ap viv nan tèt ansanm.

Bondye vle se nou tout ansanm ki mache al jwenn li. Tan Karèm nan ofri nou posiblite pou nou kase tèt tounen vin jwenn Bondye pandan n’ap mande li padon, pou n’ ka rekonsilye avèk li, pandan n’ap rekonsilye ak tèt pa nou tou, epi ak frè ak sè nou yo, se rekonsilyason sa k’ap pèmèt nou rive bò kot Bondye.

Non sèlman Legliz la ofri n’ posiblite sa a, men ane sa li trè espesyal : Pap Franswa deklare l’ kòm ane mizerikòd ; sa vle di, ane kè sansib. Kidonk, menm jan Bondye toujou gen pitye pou nou, nou menm tou nou dwe gen pitye pou frè ak sè nou yo. Mizerikòd la, se manifestasyon renmen an. Se poutèt sa, frè ak sè m’ yo, nou dwe kite renmen Bondye a anvayi, transfòme nou, pou n’ ka rive viv li tout kote nou pase epi ak tout moun nou rankontre sou wout nou.

Ane mizerikòd sa a mande n’ pou n’ resezi nou, pou n’ gade relasyon nou ak moun k’ap viv avèk nou, pou n’ kapab amelyore fason n’ap viv. Nan ane mizerikòd la, se yon dènye chans Bondye ba nou pou nou kase tèt tounen vin jwenn li.

LAPRIYÈ: Granmèt, ede nou pou nou rive genyen matirite nan renmen, pou nou kapab asime defi ak responsablite ke lafwa enplike.

PWOPOZISYON : Lapriyè pou Legliz la kenbe fèm.